O Le Auala Na Ou Iloa Ai
Sa Liligi Mai e le Alii Faamanuiaga
Sa ou taumafaufau, “Pe o ai le Atua? Pe o Puta, Iesu Keriso, po o se isi atua?”
Sa ou fanau i Kemupotia, lea o le toatele o tagata e Lotu Puta. Ina ua mavae le fasiotiga o le anoanoai o tagata i le puleaga a Khmer Rouge, sa toatele i latou na sao mai e lei malamalama pe aisea, ae pe i ai se Atua, ua Na faatagaina ai lenei mea e tupu i o matou tagata. I le 14 o o’u tausaga, sa ou taumafaufau ai foi i le mea lava lea e tasi.
Ina ua muta lea puleaga, e toatele tapuaiga sa amata ona mauaa i Kemupotia. Sa ou le mautonu aua sa aoaoina e lotu le tele naua o mea eseese. Sa tumau pea lo’u aiga i le Lotu Puta, ae sa ou manao i ni tali i fesili o lo’u agaga: o fea na matou o mai ai, aisea ua matou i ai iinei, a o fea foi matou te o i ai pe a uma lenei olaga?
I se tasi aso ina ua ou fo’i mai le aoga, sa fai mai le uso o lo’u tina e i ai ni alii talavou se toalua e ofutino papae ma fusiua sa o mai i lona fale ma talanoa atu e uiga ia Iesu Keriso. Sa ofo o ia aua sa lelei le la faa-Kemupotia. Sa ou fia aoao e uiga ia Keriso. Sa ou fia iloa po o ai na faia i matou. Sa ou taumafaufau, “Pe o ai le Atua? Pe o Puta, Iesu Keriso, po o se isi atua?”
Sa ma taliaina ma le uso o lo’u tina ia faifeautalai. I le lesona muamua, sa ma lagonaina le Agaga o ta’u maia ia i ma’ua e moni mea sa la fai mai ai. Sa la tuu maia ia i ma’ua se Tusi a Mamona ma folafola mai afai ma te faitauina, mafaufau loloto i ai, ma fesili atu i le Atua ma se loto faamaoni, ma le faatuatua ia te Ia, o le a Ia faaalia mai le moni ia i ma’ua. Sa ou lagonaina le moni. Sa ou taliaina le talalelei, faatasi ai ma le uso o lo’u tina ma lana fanau. Pe tusa o se masina mulimuli ane, ae papatisoina i matou uma ma faamauina.
Sa ou auai i le seminare mo le fa tausaga ma le inisitituti mo le tasi le tausaga ma sa avea foi o se faiaoga seminare. Ina ua 19 o’u tausaga, sa ou lagona ua tatau ona ou alu i se misiona. Sa ou talanoa i o’u matua, ma sa la fai mai atonu o se manatu lelei, o lea sa ou tuuina ai i totonu la’u talosaga. I se masina mulimuli ane, sa ou maua lo’u valaauga e galue i le Misiona a Sacramento Kalefonia, i le gagana Peretania ma le Kemupotia.
Ona ua ou taliaina lo’u valaauga, ua tele faamanuiaga e tuuina mai e le Alii ia te au. O lo’u uso laitiiti na te lei faia ni faaiuga sili. Sa ou anapogi ma tatalo mo ia, ma sa tupu se vavega ae ou te lei alu mo la’u misiona. Sa ou papatisoina o ia, ma ua toaga nei o ia i le Lotu ma ua alu i le seminare. E tele isi faamanuiaga ua maua e lo’u aiga, ma sa liligiina mai foi e le Alii i o’u luga ia faamanuiaga i le taimi o la’u misiona.
O Iesu o le Keriso. O loo soifua o Ia. E alofa o Ia ia i tatou taitoatasi ma e silafia i tatou i o tatou igoa. Na te silafia o tatou luitau ma faafitauli, ma ou te iloa o le a Ia faamanuiaina i tatou a o tatou taumafai e tausi Ana poloaiga.
Atapue mai le faaaloaloga a Kim Koung