Sa Leai Se Matou Mea e ‘Ai
Estilita Chacin Hart, Utah, ISA
Sa ou alapo i le aso i luma mai o le Kerisimasi ma sa ou popole aua sa leai ni a matou meaai mo le toonai o le Kerisimasi i lena po; sa leai foi se matou tupe e faatau ai ni meaai. O le taimi lena sa ma nonofo ai ma lo’u uso o Edicta i Maracaibo, Venesuela.
Ina ua ou alu ese mai lo’u moega, sa ou tootuli i lalo ma amata ona tatalo. Sa ou ole atu i lo’u Tama Faalelagi ia manatua i matou. Sa ou ole atu ia te Ia ia aumai lava na o ni nai meaai mo i matou i lena aso faapitoa, la Noche Buena (Po o le Kerisimasi).
A o ou tatalo, sa faatumulia a’u i le filemu. Sa pei o la ou te faalogoina se leo malu o faapea mai ia te au, “O le a lelei mea uma. Aua e te popole.” Ina ua uma la’u tatalo, sa ou iloa o le a i ai se mea lelei e tupu i lena aso.
Ina ua uma ona fafagu lo’u uso, sa ou alu e salu le poletito i luma. Sa vaai mai lo matou tuaoi i le isi ituala ona sau lea aumai ia te au le 1,000 bolívares sa aitalafu ai ia te au i le ie laulau o le Kerisimasi ma teuga sa ou su’iina mo ia. Sa ou ofo aua sa ou le manatuaina na aitalafu o ia ia te a’u i le tupe.
Sa ou tamoe atu i le potu o lo’u uso ma faaali atu ia te ia le tupe sa ou maua. Sa ofo o ia ma fesili mai po o fea sa ou maua mai ai. “E mafaia mea uma e le Atua” (Mataio 19:26), sa ou tali atu ai.
I ni nai minute mulimuli ane, sa ma faalogoina ai se tasi i fafo o tauvalaau mai i lo’u uso. Ina ua ma iloaina o le tuaoi lava lea e tasi, sa ma o i fafo e talanoa i ai. Ona ia totogiina ai lea i lo’u uso le 1,000 bolívares sa ia aitalafu ai mo ni mea sa ia su’iina. Sa matuai fiafia lava i ma’ua ma lo’u uso aua o lea ua mafai nei ona faatau meaai mo le taeao, aoauli, ma le afiafi.
Ina ua fo’i mai le ma faatauga, sa ma maua mai se ma uo o faatalitali atu mo ma’ua. Sa fesili mai pe mafai ona matou fai la Noche Buena ona sa le manao e fai Kerisimasi na o ia. Sa ma faamatala atu i ai o le a na o si toonai laitiiti lava i le fale, ae ma te talia lelei o ia. Sa ia aumaia foi le 2,000 bolívares e fesoasoani ai i le tau o le toonai. Sa faigata ona ma talitonu i le tele o faamanuiaga a le Atua ia i ma’ua.
Mulimuli ane sa valaau mai si o’u tei e ta’u mai e taunuu mai o ia i le po lena ma aumai le 33 pauna (15 kg) o fasipovi ua uma ona faamalū. I le aoauli sa taunuu mai ai le isi o’u tei ma lona toalua ma le la fanau. Sa fesili mai pe mafai ona toe foi mai i le afiafi lena ma ni meaai matou te faamanatu faatasi ai le Po o le Kerisimasi.
“O le a leai se tatou toonai tele” sa ma tali atu ai, “ae o le a lava meaai mo tagata uma.”
I lena afiafi sa ma taoina ai ma Edicta ia moa, salati pateta, ma se measuamalie i le tipolo, ma le majarete, o se puligi popo masani, lea sa matou fiafia ai ma a matou malo uma. Ae na muamua lava ona matou faafetai i le Tama Faalelagi mo faamanuiaga maoae na Ia tuuina mai mo i matou. O lena aso sa faamanatu mai ai ia i matou afai matou te faatuatua ma le le masalosalo, o le a Ia faamanuiaina i matou pe a ole atu mo Lana fesoasoani.