O Mataupu Faavae o le Faatuatua o Le Ekalesia a Iesu Keriso o le Au Paia o Aso e Gata Ai

Tesema 2011

O Mataupu Faavae o le Faatuatua
o Le Ekalesia a Iesu Keriso o le Au Paia o Aso e Gata Ai

Matou te talitonu i le Atua, le Tama Faavavau, ma Lona Alo o Iesu Keriso, ma le Agaga Paia.
Matou te talitonu o le a faasalaina tagata ona o a latou lava agasala, ae lē ona o le solitulafono a Atamu.
Matou te talitonu e ala i le Togiola a Keriso, e mafai ai ona faaolaina tagata uma, e ala i le usiusitai i tulafono ma sauniga o le Talalelei.
Matou te talitonu o uluai mataupu autu ma sauniga nei o le Talalelei: muamua, Faatuatua i le Alii o Iesu Keriso; o lona lua, Salamo; o lona tolu, Papatisoga e ala i le faatofuina mo le faamagaloga o agasala; o lona fa, Faaeega o lima mo le meaalofa o le Agaga Paia.
Matou te talitonu e ao ina valaauina se tagata e le Atua, e ala i le valoaga, ma ala i le faaeega o lima o i latou o e o i ai le pule, e tala’i atu ai le Talalelei ma faia sauniga o i ai.
Matou te talitonu i le faatulagaga lava lea sa i ai i le Ekalesia Anamua, e pei o, aposetolo, perofeta, epikopo, aoao, tagata folafola le talalelei, ma isi tofiga faapena.
Matou te talitonu i le meaalofa o gagana, valoaga, faaaliga, faaaliga vaaia, faamaloloina o ma’i, faamatalaga o gagana, ma isi mea faapena.
Matou te talitonu o le Tusi Paia o le afioga ia a le Atua e tusa ma mea ua tonu ona faaliliuina; matou te talitonu foi o le Tusi a Mamona o le afioga ia a le Atua.
Matou te talitonu i mea uma na faaali mai e le Atua, mea uma ua Ia faaalia mai nei, ma matou te talitonu foi o le a Ia faaali mai le tele o mea silisili ma le taua tau i le Malo o le Atua i le lumanai.
Matou te talitonu i le faapotopotoina moni o Isaraelu ma le toefuataiga mai o Ituaiga e Sefulu; ma o le a faatuina Siona (le Ierusalema Fou) i luga o le konetineta o Amerika; o le a nofotupu lava Keriso i le lalolagi; ma o le a faafouina le lalolagi ma maua lona mamalu faaparataiso.
Matou te tautino atu ua ia te i matou le aia tatau matou te tapuai atu ai i le Atua Mamana e tusa ai ma o matou lava lotofuatiaifo, ma ua matou tuuina atu foi lea lava aia tatau i tagata uma, e faitalia i latou, pe faapefea, po o fea, po o le a foi le mea latou te tapuai atu i ai.
Matou te talitonu i le usiusitai i tupu, peresitene, faipule, ma faamasino, i le usiusitai, faamamaluina, ma le lagolagoina o le tulafono.
Matou te talitonu i le faamaoni, amiotonu, nofomama, agalelei, amiomama, ma le faia o mea lelei i tagata uma; e moni e mafai ona matou faapea atu, ua matou mulimuli i le apoapoaiga a Paulo—Matou te talitonu i mea uma, matou te faamoemoe i mea uma, ua uma ona matou onosai i mea e tele, ma ua faamoemoe o le a mafai ona matou onosai i mea uma. Afai o i ai nisi mea e mamā, matagofie, pe logoleleia, pe tauleleia, matou te saili atu i nei mea.

Iosefa Samita