Kerisimasi mo Paionia Anamua

O masina faigata o le taumalulu na oo mai ai taimi faigata mo le tele o paionia, ma ua tau le maua ai ni punaoa mo ni meaalofa ma ni faafiafiaga o le Kerisimasi. Ae peitai e le’i faavaivai ai ia paionia anamua mai le foafoaina o ni mea faapitoa e manatua i le vaitau o aso fiafia. O ni nai faamaumauga nei o le auala na faamanatuina ai le Kerisimasi i vaitaimi o paionia:

O La’u Kerisimasi Aupito Sili ona Fiafia

“O la’u Kerisimasi muamua lava i le Vanu o [Sate Leki] na oo mai i le Aso Toonai. Sa matou faamanatuina i le aso Sapati. Sa matou potopoto uma faatasi e siomia le pou o le fu’a i le ogatotonu o le malae. O iina sa faia ai le matou sauniga. O se matuai sauniga lava. Sa matou usuina viiga i le Atua. Sa tuufaatasia i matou i le tatalo amata, ma o le failauga o lena aso e le galo lava ia te au. O ni upu o le loto faafetai ma le fiafia, e le’i i ai lava se upu le lelei na saunoa i ai. Sa i ai le faamoemoe ma sa fiafia ia tagata, ona o lo latou faatuatua i le lumanai. Ina ua mae’a le sauniga sa lulu lima tagata uma. O nisi sa fetagisi i le fiafia. Sa taaalo tamaiti i le malae ma i autafa o le afitafu i lena po. Sa matou faatasitasi ma usu le, ‘O mai, o mai, outou le Au Paia, galulue fiafia.’ O le lapiti na saka ma sina falaoa laitiiti o le matou aiga lea o le afiafi. Sa matou maoona ma sa i ai le lagona o le filemu ma le fiafia moni. E le’i i ai se isi Kerisimasi na sili atu ona fiafia i lo’u olaga.”

E le mailoa le tusitala, upusii a Bryant S. Hinckley, i le Kate B. Carter, tuufaatasi, Our Pioneer Heritage, 20 volu. (1958–77), 14:198.

Oka, Se Televave o le Taimi

“I se tasi po i le sefuluono o o’u tausaga, sa faia ai e Tama se pati o le Kerisimasi mo lana lava fanau ma o latou aiga ma tuaoi e lalata ane. Sa matou sisiva. O le aufaili o o’u tuagane lava. Sa matou iloa o loo faamoemoe ia Tama e faaiu le pati i le sefulu, lea na ia faia tonu lava i le ogatotonu o se siva faasikuea e ala i le faatonuina o le faili e taofi le pese. Peitai e le’i iloa e Tama le tele o taimi na sii ai a’u e o’u tuagane i luga i le uati i lena po. O taimi uma lava ou te kiina ai i tua i le 30 minute. Masalo o le te’a o le vaeluapo na taape ai le pati.”

Mai faamaumauga a le aiga o Christian Olsen, i le Carter, Our Pioneer Heritage, 15:199.

O Se Taimi Fiafia

“Ina ua ala mai tamaiti i le taeao o le Kerisimasi o le 1849, e leai ma se pepe meataalo na maua i le nuu atoa, leai, e oo lava i se lole laau, po o se apu na maua i totonu o fale. Peitai na fiafia lava tamaiti ma o latou matua mo mea uma. Sa latou fiafia o loo maua lava sina meaai e aai ai, ma sa amata ona malamalama mai i aso taitasi o latou faamoemoega i o latou fale fou. Peitai, afai e leai ni pepe meataalo po o ni meataalo mo le fanau, o le a le galo lava i matua le Kerisimasi, ma a o le’i uma le aso sa latou maua uma lava se aso fiafia.

“Sa latou potopoto i le afiafi i le fale o John Rowberry. O le fale lea sa fai ai a latou uluai sauniga. O iina sa fai ai se siva faaanamua e faaiu ai le aso, ma e le’i i ai lava se faatasiga faapenei muamua i se Kerisimasi ua sili ona faafiafiaina. … Peitai o le faafitauli sili lava o le musika. E le’i i ai ma se mea faifaili o soo se ituaiga na maua i i. O Cyrus Call o se tagata e lelei tele lana mapumapu ma sa na ia mapumapuina ia fati o pese ao sisiva ma le fiafia ia le au paionia.”

Sarah Tolman, i le Kate B. Carter, tuufa., Treasures of Pioneer Heritage, 6 volu. (1952–57), 4:197–98.