O Se Lalolagi Lautele o Faatinoga

Suesue i mea nei, ma pe a talafeagai ai, ia talanoaina faatasi ai ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga.

Faatuatua • Aiga • Toomaga

E manaomia e le Alii, Lana Ekalesia, aiga, ma alalafaga ia faatosinaga a tamaitai amiotonu. E moni, na aoao mai e Elder M. Russell Ballard o le Korama a Aposetolo e Toasefululua faapea “o tuafafine uma i lenei Ekalesia, o e ua osi feagaiga paia e fesoasoani ai i le laveaiina o agaga, e taitai tamaitai o le lalolagi, e faamalolosia aiga o Siona, ma fausia le malo o le Atua.”¹

Atonu e tau mafaufau nisi o tuafafine pe mafai ona latou ausia nei ituaiga faamoemoega maualuluga. Peitai na faamalamalama mai e Eliza R. Snow (1804–87), o le peresitene aoao lona lua o le Aualofa, “E leai se uso ua mamao ese naua pe ua utiuti naua sona silafia e le mafai ai ona tele sona sao mo le atinaeina o le Malo o le Atua i le lalolagi.”² Na toe aoao mai foi Sister Snow faapea na faatulagaina le Aualofa “mo le ausiaina o galuega lelei ma le tautupu.”³

O le auai i le Aualofa e faalauaitele ai lo tatou lalolagi o uunaiga e ala i le tuuina atu o avanoa i tamaitai taitasi e fausia ai le faatuatua, faamalolosia aiga ma auaiga, ma tuuina atu auaunaga i le aiga ma le lalolagi atoa. Ma o le mea e lelei ai, o a tatou taumafaiga o ni tagata taitoatasi ma ni Aualofa e le manaomia ona tetele ma lofituina, peitai e tatau ona fuafuaina ma faifai pea. O gaoioiga amiotonu e pei o le tatalo faaletagata lava ia ma faaleaiga i aso uma, suesueina o tusitusiga paia i aso uma, ma le faalauaiteleina o valaauga i le Ekalesia o le a fesoasoani lea i le faateleina o le faatuatua ma le fausiaina o le malo o le Alii.

Mo tuafafine o e tau mafaufau pe o i ai se eseesega o nei sao ua foliga e filemu, ua faamautinoaina mai e Elder Ballard: “O tuafafine uma lava e tutu atu mo le upumoni ma le amiotonu, o le a faaitiitia faatosinaga a le tiapolo. O tuafafine uma o loo faamalosia ma puipuia lona aiga, o loo ia faia le galuega a le Atua. O tuafafine uma o loo ola o se tamaitai o le Atua, o loo ia avea ma faataitaiga mo isi e mulimuli ma totoina fatu o le faatosinaga amiotonu lea o le a seleseleina i augatupulaga o i luma.”⁴

Mai Tusitusiga Paia

1 Korinito 12:4–18; 1 Timoteo 6:18–19; Mosaea 4:27; Mataupu Faavae o le Faatuatua 1:13

Mai lo Tatou Talafaasolopito

Na tofia e Peresitene Polika Iaga (1801–77) ia Eliza R. Snow, o le sa galue o se failautusi ina ua faatulaga le Aualofa i Navu, e malaga i le Ekalesia atoa, ma fesoasoani i epikopo e faatulaga le Aualofa i a latou uarota.

Na aoao mai Sister Snow: “Afai o i ai soo se tamaitai ma tina i Isaraelu o loo lagonaina le le lava o lo latou silafia, o le a latou maua nei le tele o avanoa mo soo se malosi ma tomai e fai ai mea lelei lea ua matuai faamanuiaina ai i latou. … Ua tatalaina e Peresitene Iaga le lalolagi lautele o faatinoga ma le aoga.”⁵

Ata na tusia e Jerry Garns