O Le Laau Kerisimasi
Mai ia Harriet R. Uchtdorf, “‘Der Weihnachtsbaum’: Memories Linger of Small Tree,” Church News, 12 Tes., 2009, 11.
Faatoa uma lava le Taua Lona Lua a le Lalolagi, ma o le toatele o tagata i Siamani sa tau leai ni meaai po o ni tupe. E le o toe tele ni vaiaso ona oo mai lea o lo’u aso fanau a o lei oo i le Kerisimasi. E lei i ai so’u faamoemoe e maua ni a’u meaalofa o le Kerisimasi po o le aso fanau, aua ua ou iloa lelei—e ui o a’u o se teineitiiti laitiiti—sa tauivi o matou matua e tau faafetaui mea autu matou te manaomia. I lo matou aai tele, sa i ai i taimi uma le fia aai. O se taimi faanoanoa ma le pogisa.
I le aso o lo’u aso fanau, sa ou te’i ma sa ou fiafia, i se meaalofa matagofie—mo na o au lava—sa tuu i luga o le laulau i le umukuka. O le meaalofa aupito sili ona manaia sa mafai ona ou mafaufau i ai: o se tamai laau Kerisimasi Weihnachtsbaum,e na o le tasi le futu (30 cm) le maualuga, sa ufitia i meateuteu maaleale na gaosilima i pepa siliva iila. Sa atagia mai i pepa siliva iila le malamalama o lo matou potu malolo i se ala ofoofogia. Ina ua ou vailiilia ia meateuteu siliva iila, sa ou iloa ai ma le maofa tele sa faatumulia i fasilole suka susunu. Sa pei o se vavega. Pe o fea na aumai ai e lo’u tina si tamai laau lanumeamata laitiiti, o le pepa siliva iila, ma si nei suka?
E oo mai lava i le taimi nei, ou te le iloa pe na faapefea ona ia faia lenei vavega i se taimi sa leai se mea o na mea taua na maua ai. O loo tumau pea i lo’u loto o se faatusa o le alofa loloto o o’u matua ia te au, o se faatusa o le faamoemoe, alofa, ma le uiga moni o le Kerisimasi.
I le vaitau o le Kerisimasi, o loo i ai lava i lo matou fale se laau Kerisimasi, ua teuteuina nei i moli eletise ma meateuteu o ituaiga eseese. A matou faatasitasi ma le ma fanau ma a latou fanau, e faamafanafanaina lo’u loto i le matagofie o le laau ma le feilafi o moli ma e toe aumaia ai i le mafaufau mea matagofie o se aiga fiafia sa aumaia e se tamai laau ma ona meateuteu siliva iila.
Ata na tusia e Taia Morley