Nai Otootoga o le Lalolagi

Ua Fofogaina Mai Maimoaga, Faapaiaga o le Malumalu o Quetzaltenango

Ina ia faamanatuina le faapaiaga o le Malumalu o Quetzaltenango Kuatemala, o le a auai ai le autalavou a le Ekalesia i le atunuu i se faaaliga o musika ma siva faaleaganuu i le Aso Toonai, 10 Tesema, 2011.

Ae o le Aso Sa, 11 o Tesema, 2011, o le a faapaiaina ai le malumalu i sauniga e tolu, lea o le a faasalalauina i iunite uma i Kuatemala.

A maea le faapaiaga, o le a tatalaina le malumalu mo sauniga i le Aso Lua, 13 o Tesema, 2011.

Ua Faamoemoe le Ekalesia e Fausia se Malumalu i Farani

Sa fofogaina mai e Peresitene Thomas S. Monson ia Iulai e faapea, ua faamoemoe le Ekalesia e fausia sona uluai malumalu i Farani i se fanua i fafo ane lava o Pale.

Ua tele ni masina o galulue ai le Ekalesia ma taitai i le lotoifale.

Sa i ai ni isi taumafaiga sa faia muamua e saili ai se tulaga talafeagai mo se malumalu i Farani, peitai e leai se mea na faamautuina. O le au paia o le Ekalesia i Farani o loo moomoo e fia malaga atu i se malumalu, e masani lava ona malaga atu i atunuu Europa e tuaoi ane.

Faiga Fou mo Tusitusiga Paia e Faalogologo i Ai ua Faateleina Ai le Mauagofie

Ua faalauiloa mai e le Ekalesia se lomiga faalogologo o tusitusiga faavae o le AAG mo le siiina i iTunes i le tusifaalogologo (e taua o le “faaleleia o ‘anoleo” i iTunes) po o le MP3.

O le lomiga faalogologo o tusitusiga faavae atoa o loo maua i le gagana Peretania ma le Sipaniolo, ma o loo maua foi lomiga faalogologo o le tusi fusitolu i le gagana Iapani, Potukale, ma Korea.

Ina ia maua nei punaoa fou, alu i le vaega o tusitusiga paia o le alaleo o le Ekalesia i le iTunes.lds.org.

Ua maua nei lomiga faalogologo o tusitusiga faavae i nisi o gagana i le iTunes.lds.org.