Faamanuiaina Peresitene Fou o Misiona ona o le Faaaogaina o le Faatuatua
Ia Iuni, e toa 128 peresitene fou o misiona ma o latou faletua sa valaaulia i le Nofoaga Autu e Aoao ai Faifeautalai i Provo, Iuta, ISA, mo le mauaina o aoaoga a o le’i tuuvaa atu mo o latou tofiga.
Sa tatalaina e Peresitene Thomas S. Monson le semina e fa aso, sa faagasolo mai le aso 22 o Iuni e oo i le aso 26, 2011, i lana saunoaga, “Ua filifilia outou mai ia i latou e sili ona faatuatua o le Ekalesia, ma o lenei ua outou maua le avanoa e o atu ai i le fanua o le seleselega a le Alii. … E leai se isi fanua ua ou iloa e sili atu le manogi sasala ma le tele o rosa nai lo fanua o misiona ua valaauina i ai outou.”
E o mai nei ulugalii mai itu uma o le lalolagi—i atunuu eseese e 22—ma o le a galulue i le lalolagi atoa i gagana e 18. E eseese mea e malaga mai ai, ae peitai ua i ai se mea ua laugatasia ai i latou.
A o faia e nei peresitene fou o misiona ma o latou faletua ni osigataulaga e sauniuni ai faaletino ma faaleagaga, ua latou vaaia na toetoe lava i le taimi lava lea ia faamanuiaga o le faaaogaina o le faatuatua.
Faia o Osigataulaga
O le auauna ai o se peresitene o le misiona o se tofiga e tolu tausaga ma e luitauina ma faafiafiaina faaleagaga. O lo latou tuuto atu i lenei valaauga, ua toatele ai ulugalii ua faataatia ese o latou olaga tuai, e aofia ai a latou galuega ma aiga.
O le motusia o galuega e faigaluega ai, o nisi taimi o lona uiga o le le toe i ai o se tupe maua. E ui ina tuuina atu e le Ekalesia i peresitene o misiona sina alauni itiiti e ola ai, ae e masani lava ona i ai ni seleni a ulugalii lava ia e faaopoopo atu i lena alauni.
Ina ua maua e Marcus Martins ma lona faletua o Mirian mai Laie, Hawaii, ISA, lo laua valaauga i le Misiona a Pasila São Paulo i Matu, sa fautuina i laua e Elder Jeffrey R. Holland o le Korama a Aposetolo e Toasefululua e faapea, o le a tatau lava ona i ai le ositaulaga, ae sa ia ta’u atu ia i laua e aua nei tele naua ni mea e ositaulagaina.
Sa foi le au Martins i le fale ma tatalo e fia iloa pe o le a faapefea ona la gafatia le tau mo le taliaina o lenei avanoa. Sa la faatauina atu a laua mea uma. “O le faamanuiaga—e tasi le aso sa ma faatauina atu ai mea uma,” o le tala lea a Sister Martins. “Sa o se vavega mo i maua.”
E le o tagata uma e ositaulaga i mea tautupe, ae o peresitene uma o misiona ma o latou faletua, o le a feagai ma se osigataulaga e tofotofoina ai le faatuatua po o le a lava le ituaiga.
Mo Gary ma Pamela Rasmussen o Tucson, Arisona, ISA, o le taliaina o le valaauga i le Misiona a Iapani Sendai o lona uiga o le tuua o le la fanau e toaono ma a latou fanau e 23.
Fai mai Sister Rasmussen, “Ou te iloa o le a sili atu le tausiga a le Tama Faalelagi o le fanau nai lo a’u. O lea ua ma fiafia ai e fai lenei mea ma maua lenei lagona o le a avea ma se faamanuiaga tele ia i latou.”
O le toatele o e ua taliaina le valaau e auauna atu o ni peresitene o misiona ma ni soa o peresitene o misiona, ua faaalia lena uiga lelei o le naunau e ositaulaga.
“O isi taimi ou te mafaufau ai po o le a tonu le mea e ta’u o le ositaulaga, aua o isi taimi o lena mea e mafai ona faigata tele mo se tasi tagata ae e le o se mea faigata i le isi,” o le saunoaga lea a Peresitene Martins. “E tele taimi i o maua olaga … sa ma faapea ai, o le a ma faamuamua le Alii ma o le a ma faia soo se mea mo le Alii, o le a ma o i soo se mea. O lea ma te le mafaufau tele i ai e faapea o se ositaulaga. … O se faamanuiaga; o se faamamaluga le faataatia ese o mea uma.”
O Le Saunia
I le taimi a o le’i amataina e peresitene o misiona ma o latou faletua o latou tofiga faamisiona, e tele ni tapenapenaga faaleagaga ma faaletino e faia. O peresitene o misiona e masani lava e ono masina e maua ai le valaauga a o le’i oo i le aso e amata ai, peitai e i ai lava foi taimi e laitiiti ai se taimi e tapenapena ai. O Brent ma Anne Scott o Eden, Iuta, ISA, na valaauina e vaaia le Misiona a Kanata Toronto, i le na o le toe tasi o le vaiaso amata le semina mo peresitene o misiona, ae toe lua masina ona amata lea o le la auaunaga.
I le va o le ta’uina atu i uo ma aiga ma le taumafai e fai feutagaiga mo lo laua fale, sa la suesueina ai tusi lesona, faalogologo i CD, ma fai isi sauniuniga faaleagaga. Ae fai mai i laua, o le la sauniuniga maoae lava o le semina lea i le NAF.
“Ua na o se faatofuga faaleagaga i le malamalama,” o le saunoaga lea a Peresitene Scott. “O le i ai faatasi ma se vaega o tagata o e ua [ositaulaga e auauna i le Alii] ma le aoaoina e perofeta, tagatavaai, ma talifaaaliga … ua avea ma se tasi o aafiaga aupito maoae o o maua olaga.”
Aoaoina o le Poto
I aso e fa o le semina ia Iuni, sa fafagaina ai peresitene o misiona ma o latou faletua i savali mai le Au Peresitene Sili, ma nai isi sui o le Korama a Aposetolo e Toasefululua.
“A o matou faalogologo atu ia i latou, a o latou aoao mai i matou, [sa matou lagonaina] sa i ai iina le Alii, ma e manatu mai o Ia, ma o Lana galuega lenei, ma o Ana auauna nei, ma ua matou maua le avanoa o le o atu e fai ma sui o lo tatou Faaola,” o le tala mai lea a Sister Scott.
Sa faailoa atu e Elder Russell M. Nelson o le Korama a Aposetolo e Toasefululua ia nisi o ona faamoemoega mo peresitene o misiona ma a latou soa o le a o malaga atu i misiona.
Sa ia saunoa,“Ia outou maua le malosi lelei faaletino, faalelagona, ma faaleagaga [ma] ia faamanuiaina i le aoaoina, aoao atu, ma le faaaogaina o aoaoga faavae a Iesu Keriso. O ou faamoemoega e aofia ai lo outou gafatia ona faaaogaina le malosi o au paia; ia taulai atu i sauniga; [ma] ia tasi ma le Alii, ma tagata o le Ekalesia, ma na faifeautalai faapelepele ua tuuina atu i lau vaavaaiga.”
Sa auai peresitene fou o misiona i se fonotaga e fa aso o aoaoga faamasani i le Nofoaga Autu e Aoao ai Faifeautalai i Provo, Iuta, ISA, a o le’i ulufale atu i latou i le galuega faamisiona.
© IRI