O Le Kerisimasi Mulimuli a Linda
J. Audrey Hammer, Utah, ISA
I lo’u tausaga lona lua i le Iunivesite o Polika Iaga, sa saini ai e le au epikopo o la matou uarota le uarota mo le polokalama mo se Sui-mo-Santa, lea o le a matou saunia ai ni meaalofa o le Kerisimasi mo se aiga e manaomia.
Peitai, sa fai lava ma lē vaaia le igoa o la matou uarota i le lisi o volenitia. Ina ua latalata mai le Kerisimasi, sa leai lava se aiga e fesoasoani i ai. Ona fai mai lea o se tasi o fesoasoani o le epikopo, e i ai se aiga atonu e faaaogaina la matou fesoasoani. Ina ua matou iloa lenei aiga, sa matou mautinoa uma lava ua tatau ona matou taulai atu i ai.
O Linda (ua suia le igoa), e i ai lana fanau tama e amata mai i le 9 tausaga e oo atu i le 15, sa tauivi o ia ma se taua faigata o le kanesa o le susu. I le taimi o le mafatiaga o lena ma’i, sa tuua ai o ia e lona toalua. Faatoa siitia ane lava o ia mai i se tasi setete e faigaluega i Provo, Iuta, ae sa faaletonu foi le galuega, ma o lea sa tuua ai o ia e aunoa ma se tupe maua.
Ina ua matou feiloai ma Linda, sa vave ona matou taliaina o ia i o matou loto. Sa faamanuiaina i matou e vaai atu ia te ia i le ala sa faia ai e le Faaola—o se agaga maoae ma le tamalii o lē sa faatoilaloina le tele o luitau faigata. Sa lei avea lava o ia o se tiute ia i matou; ae, sa avea o ia o se uo e faavavau. Sa saofagā tagata uma o le uarota e fesoasoani ai ia te ia ma lana fanau tama. O i matou uma lava o ni talavou aooga i le iunivesite, ma e matitiva foi i o matou lava manatu, ae sa matou foai fiafia atu lava aua sa matou alolofa ia te ia.
Sa sau Linda i le pati a la matou uarota o le Kerisimasi, ma o le taimi lea sa o ai le toatele o tagata o le uarota i lona fale sa mautotogi ai ma faatutumu ana kapoti ma le pusaaisa i meaai. Sa latou teuteuina se laau Kerisimasi ma faatumulia i meaalofa mo le aiga atoa. Sa latou tuua ai foi ni pa’u taavale fou se fa ma totogi le lisi o lona fale mo ni masina. Ou te le iloa pe na mafai faapefea e a matou saofaga faalē’a’u’a’u ona faatino uma ai na mea, ae ou te iloa sa faaaogaina e le Tama Faalelagi a matou osigataulaga e faamanuia ai o ia.
I se tausaga mulimuli ane sa ou i ai i se isi uarota a tamaiti a’oga, ae sa ou toe foi i le taimi o le Kerisimasi e asiasi i le matou au epikopo talu ai. Sa ou iloa ai na toe foi ane le toalua o Linda i le aiga, ma sa mautu o latou tulaga tautupe. Peitai, sa toe foi ane lona kanesa ma sa i’u ai lona ola. Sa ou iloaina na matou fesoasoani e avatu ia Linda lana Kerisimasi mulimuli.
I le lagonaina “o le alofa lē pona o Keriso” (Moronae 7:47) sa matua malosi i lena aafiaga, sa ou aoao ai o le alofa moni o se meaalofa faaleagaga anagata lea e uunaia i tatou e galulue i le tulaga o le Faaola.