O La’u Kata o le Kerisimasi mai Obregón
Robert Ramos, Oregon, ISA
A o ou faamisiona i Mekisiko, sa ma feiloai atu ma la’u soa i se tamaloa mai Obregón, o se aai i matusisifo o Mekisiko e latalata i le Faga o Kalefonia. Sa fiafia o ia i la ma’ua savali e uiga i le Toefuataiga o le talalelei, peitai sa na o le 10 minute na matou talanoa ai ona sa alu e pue lana nofoaafi. Sa ma aoaoina o ia i mea uma sa ma mafaia i lena taimi puupuu ma avatu ia te ia se kopi o le Tusi a Mamona ma ‘anomea uma sa ia i ma’ua. O le taimi lena, sa leai ni faifeautalai o la matou misiona i Obregón.
Na mavae ni masina mulimuli ane ona ou maua lea o se kata Kerisimasi mai se tasi i Obregón. Sa ou tilotilo i le kata ma tau mafaufau po o ai na aumai ai. Ona ou iloa ai lea sa aumai i le tamaloa lea sa ma talanoa i ai mo le 10 minute. Sa ou faatautauina le kata i lo ma fale ma isi kata o le Kerisimasi sa ma mauaina ma le isi faifeau.
Ina ua uma le Kerisimasi sa toeitiiti lava o’u tia’ia le kata ae ou maua se uunaiga e teu. O lea uunaiga e le o se leo na faalogoina ae o se lagona i lo’u loto. Sa ou le tia’ia le kata, ae ou tuuina i la’u atopa’u.
I ni nai masina mulimuli ane a o ou faitauina le tusi faalemasina mai le ofisa o le misiona, sa ou vaai ai i se faasilasilaga o le a tatala le galuega faafaifeautalai i Obregón. Sa ou toe mafaufau ai foi, “O le a la’u mea e fai i lea aai?” Ona ou toe manatuaina ai lea o le tamaloa mai iina lea sa matou feiloai. Sa ou toe su’eina la’u atopa’u ma maua ai le kata o le Kerisimasi. Sa ou tusia i luga o le kata, “O faifeau nei o a’u uo, ma o lea ua ou auina atu i la’ua e aoao atili oe e uiga i le talalelei.” Ona ou auina lea o le kata i faifeau na totofi e galulue i Obregón ma fai i ai e ō ma ave ma asiasi i le tamaloa lea.
E lei leva ae ou mauaina se tusi mai faifeau i Obregón. Sa faitauina: “Lau Susuga Elder Ramos, sa matua faigata lava le galuega iinei ma o lea sa fuafua ai le peresitene o le misiona e aveese i ma’ua ae te’i ua ma mauaina lau kata. Sa ma o e vaai lenei uso, ma sa matua fiafia o ia i la ma’ua savali ma o lea na ia aveina ai i ma’ua e feiloai i lona aiga uma ma uo. Ona o lenei uso, o lea ua ma amataina ai se paranesi.
Na mavae tausaga, ma o le taimi nei ua tolu siteki ua faatulagaina i Obregón. Ua faalotomaulaloina lava a’u i le iloa ai, aua sa ou faalogo i uunaiga a le Agaga, o lea sa faamanuiaina ai a’u e faatino se vaega itiiti e fesoasoani ai i o’u uso ma tuafafine i Obregón ia maua le talalelei a Iesu Keriso.