Manatu mo Afiafi Faaleaiga

O lenei lomiga e aofia ai tusiga ma gaoioiga e mafai ona faaaoga mo afiafi faaleaiga. O nai faataitaiga nei.

“ O La’u Auaunaga o se Tagata Nofofua o le Ekalesia,” itulau e 12: A uma ona faitau le tala a Sister Burdett, ia mafaufau e talanoaina faamanuiaga e oo mai mai le auauna atu i le Ekalesia. E mafai ona e valaaulia tagata o le aiga e faasoa atu se aafiaga aoga na latou maua a o auauna ai i se valaauga.

“O Le Filemu ma le Olioli i le Iloa o loo Soifua le Faaola,” itulau e 18: Mafaufau e fesili atu i tagata o le aiga po o le a se mea e mafai ona latou faia mo le Faaola i le tausaga a sau. Faitau ia parakalafa mulimuli o le tusiga i lalo o le “O La Tatou Meaalofa ia te Ia.” O le a le saunoaga a Elder Nelson, o le a le meaalofa sili e mafai ona tatou tuuina atu i le Alii?

“O Mai, Tatou Vivii ia te Ia,” itulau e 42: A o lei faia le lesona, ia filifili ma le agaga tatalo le vaega po o ni vaega e sili ona talafeagai i lou aiga. Afai e te filifilia le vaega e uiga i leoleo mamoe, atonu o le a e manao e faasoa atu le fautuaga a Peresitene Monson ia “aua nei e tolopoina le mulimuli i se musumusuga” ma ia talanoaina ma lou aiga le taua o lenei saunoaga. Ina ia faaali atu lenei manatu i tamaiti e laiti ifo, ia musumusu atu se faatonuga i o latou taliga, ma ia uunaia i latou e mulimuli i ai.

“Feiloai ia Uso Iosefa,” itulau e 58: Mafaufau e faaali atu se ata o Iosefa Samita a o e faitauina le lisi o mea moni mai le tusiga e uiga ia te ia. Atonu e te manao e fai se taaloga pe a uma le lesona e iloa ai pe fia mea moni e mafai ona manatua e lou aiga.

“O Na Upu,” itulau e 60: A uma ona faitauina o se aiga le tala, ia mafaufau e talanoaina po o a ni faamatalaga e mafai ona fai atu e tagata o le aiga pe afai e faaaoga e se tagata o latou i ai faatasi ia gagana mataga. Atonu e te manao foi e faamalamalama atu i tamaiti laiti le mafuaaga ua poloaiina ai i tatou i le Esoto 20:7 e aua le ta’u fua le suafa o Ieova (tagai foi i le MF&F 63:60–64).

Fefaasoaa’i o Tala i le Liua ma le Agaga

A o ou i ai i se uarota a le autalavou matutua, sa ou fai afiafi faaleaiga faatasi ma lo’u aiga o le uarota. O se tasi o afiafi faaleaiga na sili ona matagofie sa ou auai, o se afiafi lea na taitai ai e faifeautalai faamisiona.

Sa valaaulia e alii faifeautalai ia nisi o tagata liliu mai o le matou uarota e faasoa mai tala o o latou liliuga. A o talanoa mai tagata liliu mai, sa le mafaafitia le i ai o le Agaga.

Ina ua uma ona faasoa mai ia tala, sa toe foi lo’u mafaufau i o’u lava aafiaga faafaifeautalai—o se faifeautalai faamisiona ma se olaga atoa faafaifeautalai. Sa ou toe iloiloina au lava faatinoga i le faasoaina atu o le talalelei i lea aso-ma-lea aso, ma faaauau ai pea ona ou manatunatu i ai i vaiaso na sosoo ai.

Ina ua tofia mulimuli ane au e taitai i le afiafi faaleaiga a le uarota, sa ou faia se sini e faaauau pea mai lea taimi i lea taimi le gaoioiga “o le po o tala o le liua,” ma fesili atu i tagata eseese na liliu mai o le matou uarota ina ia auai.

Janna McFerson, Kalefonia, ISA