Savali a le Au Peresitene Sili
O Le Filifiliga ina Ia Maua Le Agaga Faafetai
Ua poloaiina i tatou e lo tatou Tama o i le Lagi ina ia tatou faafetai mo mea uma lava (tagai i le 1 Tesalonia 5:18), ma e Na te manaomia lo tatou tuuina atu o le faafetai mo faamanuiaga ua tatou maua (tagai i le MF&F 46:32). Ua tatou iloa o Ana poloaiga ua fuafuaina tatou te maua ai le fiafia, ma e tatou te iloa ai foi o le solia o poloaiga e taitai atu ai i le malaia.
O lea la ina ia fiafia ma aloese mai le malaia, e tatau ona tatou maua le agaga faafetai. Ua tatou vaaia i o tatou olaga le fesootaiga i le va o le agaga faafetai ma le fiafia. Tatou te fia lagona uma lava le agaga faafetai, ae peitai e le faigofie ona tumau ai pea le agaga faafetai i mea uma ona o luitau o le olaga. O le mama’i, lē fiafia, ma le aveesea atu o e pele ia i tatou i taimi o o tatou olaga. Ua faafaigata e o tatou faanoanoaga ona tatou iloa atu o tatou faamanuiaga ma le talisapaia o faamanuiaga ua faapolopolo e le Atua mo i tatou i le lumanai.
O se suega le faitauina o o tatou faamanuiaga aua ua tatou masani lava i le taliaina o ni mea lelei e aunoa ma le amanaiaina. Afai ae leai se taualuga i luga atu o o tatou ulu, meaai e aai ai, po o le mafanafana o uo ma aiga, ona tatou iloa lea sa tatau ona tatou lotofaafetai i le taimi na tatou maua ai.
O le mea pito i sili, o nisi taimi e faigata ai mo i tatou ona lava lo tatou agaga faafetai mo meaalofa silisili ua tatou maua: o le fanau mai o Iesu Keriso, o Lana Togiola, o le folafolaga o le toetu, o le Toefuataiga o le talalelei ma le perisitua ma ona ki. Ua na o le fesoasoani lava a le Agaga Paia tatou te amata lagonaina ai po o a uiga o na faamanuiaga mo i tatou ma mo i latou tatou te alolofa i ai. Ma ua na o le pau lea o le mea ua mafai ona tatou faamoemoe e maua mai ai le loto faafetai i mea uma, ma aloese mai ai i le solitulafono i le Atua ona o le le loto faafetai.
E tatau ona tatou ole atu i le tatalo ina ia fesoasoani mai le Atua, e ala i le mana o le Agaga Paia, ina ia tatou vaai ma le manino i o tatou faamanuiaga e oo lava i le lotolotoi o o tatou tofotofoga. E mafai ona fesoasoani o Ia ia i tatou e ala i le mana o le Agaga ina ia iloa ma ia maua le loto faafetai mo faamanuiaga tatou te le o amanaiaina. O le mea sa sili ona fesoasoani ia te au o le ole atu lea i le Atua i le tatalo, “Pe mafai ona Ia taitaiina atu a’u i se tasi e mafai ona ou fesoasoani atu i ai mo Ia?” O le fesoasoani atu i le Atua ina ia faamanuia isi ua ou vaai ai ma le sili ona latalata i ou lava faamanuiaga.
Sa taliina la’u tatalo i se tasi taimi ina ua valaauliaina a’u e se ulugalii ou te lei iloaina muamua matou te o i le falemai. O iina sa ou maua ai se pepe matuai laitiiti lava na mafai ona ofi i lo’u lima. I le na o ni nai vaiaso o lona ola, ae ua tele ni ona taotoga ua faia. Sa ta’u atu e le fomai i matua e faigata atu taotoga o le a manaomia mo le fatu ma ona mama ina ia ola ai pea lena atalii laitiiti a le Atua.
I se talosaga mai a matua, sa ou tuuina atu ai i le pepe se faamanuiaga faaleperisitua. Na aafia i le faamanuiaga se folafolaga o le a faaauau lona ola. Na sili atu i lo le na o le tuuina atu o se faamanuiaga, sa ou mauaina se faamanuiaga mo au lava ia o le lotofaafetai sili atu.
O le fesoasoani mai a lo tatou Tama, ua mafai ai e i tatou uma ona filifili ina ia lagonaina atili le agaga faafetai. E mafai ona tatou aioi atu ia te Ia e fesoasoani mai ina ia tatou vaai atu ma le manino i o tatou faamanuiaga, e tusa lava po o a tulaga. Sa ou talisapaia, mo au lava ia i lena aso, le vavega o le lelei o lo’u lava fatu ma o’u mama. Sa ou tuuina le faafetai ao agai atu i le fale mo faamanuiaga i la’u fanau ua mafai ona ou vaai atu ma le manino o ni vavega o le agalelei mai le Atua ma mai tagata agalelei o loo siomiaina i latou.
O le mea pito i sili, sa ou lagona le agaga faafetai mo le faamautinoaga o le Togiola o loo aoga i olaga o na matua popole faapea foi ia a’u. Sa ou vaai i le faamoemoe ma le alofa mama o Keriso o loo susulu mai i o latou foliga, e oo lava i o latou luitau faigata. Ma sa ou lagonaina le faamautinoaga e mafai ona e lagonaina pe a e fesili atu i le Atua ina ia faailoa mai ia te oe e mafai e le Togiola ona faatagaina oe ia lagona le faamoemoe ma le alofa.
Tatou te mafai uma lava ona fai se filifiliga ina ia tuuina atu le faafetai i le tatalo ma aioi atu i le Atua mo le taiala e auauna atu ai i isi mo Ia—aemaise lava i lenei taimi o le tausaga ao tatou faamanatuina le fanau mai o le Faaola. Na tuuina mai e le Tama Lona Alo, ae na tuuina mai ia i tatou e Iesu Keriso le Togiola, o le meaalofa silisili lea o meaalofa uma ma foai uma (tagai i le MF&F 14:7).
O le avatu o le faafetai e ala i le tatalo o le a faatagaina ai i tatou ina ia iloa atu le tulaga o nei faamanuiaga ma isi o tatou faamanuiaga uma ma ina ia maua ai le meaalofa o se loto faafetai atili.
Po Filemu, saunia e Liz Lemon Swindle, e le mafai ona kopiina