O Tatou Aiga, O Tatou Auaiga
E Pa’ulua ae e Tautonu Lava
Sa usuina e lo’u tama se laina o le pese i lona lava leo—e le o le ato, e le o le malu, ae o se mea e lavea uma ai lava na vaega e lua. E ui lava e na te le mafai ona iloa le eseesega o le C ogatotonu mai le A paulua, ae na usu leotele ma le malosi lava Tama.
Ou te le manatuaina so’u maasiasi i le pese a lo’u tama, ae ou te manatuaina lo’u fiafia ma le le mautonu i si ona maloā fiafia. Pe na te le o iloa o la e faalogologo isi tagata?
O le fiafia ia o lo’u tama i viiga o le talalelei, ma e na te le avea lona le talenia e fai ma faalavelave i le vivii atu e ala i musika. Sa ia pese ma le fiafia, naunautai, ma le lagona. Ou te fiafia i le auala e na te usuina ai ma le malosi ma le tuuto se viiga e pei “O Le Agaga o le Atua” ona toe usuina lea ma le leovaivai ma le migao i ni nai minute mulimuli ane o se viiga o le faamanatuga.
Sa aoaoina au i se tasi aoauli e lo’u tama i se lesona mamana e ala i se viiga. Sa ou taina le piano e pei ona ou masani ai ou te mapu i ai pe a maea se aso mai le aoga maualuga. E masani lava ona taumafai lo’u tama e saili se taimi ia tau ai o ma’ua, ma o lea na sau ai ma faatasi mai. O se tulaga ou te masani ai: e na te sueina itulau o le tusipese, saili se pese, ona tuu mai lea ou te taina ae pese.
I lenei la aso faapitoa, sa toso mai ai e Tama le tusipese ma susue i se pese.
“O se pese matagofie lenei. O se tasi o pese ou te fiafia i ai,” o lana tala lea, ma tuu le tusi i luga o le piano. O le pese “Se Tagata Mativa Faanoanoa.” Sa ta’u mai e Tama ia te au o se viiga na sili ona fiafia i ai le Perofeta o Iosefa Samita ma na talosagaina e Iosefa ia Ioane Teila e usuina le pese i Karefasi i sina taimi a’o lei toe mamao le maliufasia o Iosefa ma Ailama.
Ona usuina lea e Tama o fuaiupu uma e fitu ao ou taina le piano. I lena taimi, e lua mea mata’ina na tutupu. O le mea muamua na usuina e lo’u tama le pese atoa e aunoa ma se nota e misi. O ana A paulua na mo’i lava o A paulua! Na fetaui ma faigofie le leo o Tama, ma e ia te au lava ia na manaia le leo. O le mea mata’ina lona lua na itiiti le faateia ae na sili atu lona taua. Ao usu lo’u tama, sa ou iloa ai e alofa o ia ia Iosefa Samita ma sa i ai sana molimau i lona valaauga faaperofeta. Na molimau mai le Agaga ia te a’u o Iosefa Samita o se perofeta.
Na maliu lo’u tama i ni nai tausaga mulimuli ane, ma e masani lava ona ou mafaufau i lena aso ma le aafiaga na oo ia te au. O se vaega taua o la’u molimau i le talalelei ua mausali ona o se tamā “sa le mafai ona pese” ae na filifili lava e pese ma lona loto atoa.
Ata na tusia e Diane Hayden