Aumaia o le Peraimeri i le Fale
Ua Aoao Mai e Tusitusiga Paia ia te Au e uiga i le Soifua Mai ma le Afio Mai Faalua o le Faaola
E mafai ona e faaaogaina le lesona ma le gaoioiga lenei e aoao atili ai e uiga i le autu o le Peraimeri i le masina lenei.
“Aua e sau le Atalii o le tagata faatasi ma ana agelu i le mamalu o lona Tama; ona tauia lea e ia e taitasi e tusa ma lana galuega” (Mataio 16:27).
Mo le fiaafe o tausaga, sa molimau mai ai perofeta o Iesu Keriso, le Alo o le Atua, o le a fanau mai i le lalolagi. I tusitusiga paia, e mafai ona tatou faitau i mea na ta’ua e nei perofeta. I le Feagaiga Tuai, fai mai Isaia, o Iesu o le a avea ma Alii o le Filemu ma o le a avea o Ia ma ulu o le Ekalesia moni. I le Tusi a Mamona, sa vaai Nifae i le tina o Iesu, o Maria i se faaaliga vaaia, ma sa ia vaaia Iesu o faiaoga i tagata i le lalolagi. Sa aoao e le Tupu o Peniamina lona nuu e uiga i vavega o le a faatinoina e Keriso pe a afio mai o Ia i le lalolagi.
I ni nai tausaga a o lumanai le soifua mai o le Faaola, sa tu ai le perofeta o Samuelu i luga o se papuipui e ta’u atu i tagata sa Nifae e uiga i faailoga o le a oo mai. Fai mai a ia a fanau mai le Faaola, o le a alia’e mai se fetu fou i le lagi. I le Feagaiga Fou e mafai ona tatou faitau e uiga i lena lava fetu—sa mulimuli ai le Au Makoi e saili le tamaitiiti o Keriso.
I tusitusiga paia, o loo aoao mai ai foi e perofeta e uiga i le Afio Mai Faalua o Iesu Keriso i le lalolagi. I le Tusi a Mamona, o loo molimau mai ai Moronae i le toe foi mai o le Faaola. I le Feagaiga Tuai, o loo talanoa Malaki e uiga i le mea o le a tupu i aso mulimuli a o lumanai le Afio Mai Faalua.
O tusitusiga paia o loo i ai molimau a perofeta a Iesu Keriso mai le tele o taimi eseese i le talafaasolopito. I totonu o tusitusiga paia, e mafai foi ona tatou faitau ai e uiga i le faataitaiga a Iesu. E tatau ona tatou mulimuli i Lana faataitaiga a o tatou sauniuni mo le taimi e toe afio mai ai o Ia e toe soifua ai i le lalolagi.
Gaoioiga
E mafai ona e faia lau lava tusi ata o le soifuaga o Iesu Keriso. Tipi ese ia ata i totonu o le itulau 65. Fai ni pu i luga o itulau taitasi i le mea o loo faasino atu ma faaputu i le faasologa ia itulau. Faaaoga le manoa e nonoa faatasi ai itulau i pupu. E mafai ona outou matamata ma lou aiga i lenei tusi i le taimi o afiafi faaleaiga ma talanoa e uiga i le soifuaga o le Faaola.
Ata na tusia e Paul Mann