O Na Upu
“Aua tou te tauto i lo’u igoa ma le pepelo, aua foi e te faaleaga le igoa o lou Atua” (Levitiko 19:12).
Sa le fiafia Shelby e faalogo i upu leaga, aemaise lava pe a ta’u fua e ana uo i le aoga le suafa o le Alii.
“Faamolemole aua ne’i faia na upu a o ou i ai,” sa ia fai atu ai i ana uo.
Ae o nisi taimi e galo ai ia te i latou, ona ia toe faamanatu ai lea ia i latou.
I se tasi aso sa faasesepa ai mata o le uo a Shelby o Beth ma fai mai, “Oi, ioe, ua galo ia te au. E leai se tasi e faia na upu i luma o Shelby. O loo taumafai o ia ia tatou lelei e faapei o ia.”
Sa talie isi teineiti.
Sa maasiasi Shelby. Sa lagona lona le fiafia i lona fai soo i ana uo e aua le faia na upu pe a i ai o ia—aemaise lava pe a latou manatu e le leaga ia upu.
Ina ua taunuu Shelby i le fale mai le aoga, sa faapalasi ifo i lona moega. E lei umi ae sau lona tina, ma sa faamatala i ai e Shelby le mea na tupu.
“Taumafai e aua e te popole i ai,” o le tala lea a Mama. “Tau lava o lou faia o le mea sa’o, ona oo lava lea ina le toe mananao au uo e toe fai na upu.”
“E afaina i se a pe a fai e a’u uo na upu?” o le fesili lea a Shelby. “E le faapea o o’u palauvale ai.”
“Ua aoaoina i tatou e perofeta e tatau ona tatou tausisia lo tatou agavaa ia lagonaina le Agaga i taimi uma. O upu leaga e faatiga ai i le Agaga,” o le tala lea a Mama.
Sa manatua e Shelby taimi na ia lagonaina ai le Agaga: i afiafi faaleaiga, pe a ia tuuina atu lana molimau, pe a ia mauaina se faamanuiaga mai lona tama. Sa fiafia Shelby i lona lagonaina o le Agaga, ma sa ia le manao e faia se mea e taofia ai lena toafilemu, mafanafana.
Sa tonu ia te ia e avea pea ma se faataitaiga i ana uo ma fesoasoani ia i latou ia malamalama sa le’i manao o ia e faalogo i na upu.
O le aso na sosoo ai i le aoga, sa ia toe faalogo ai foi i na upu.
“Faamolemole aua nei faia na upu pe a ou i ai,” na aioi atu ai Shelby ia Becca.
Sa faataupupula atu Becca ia Shelby ona lē ano lea i ai. Sa fiafia Shelby ina ua ia fai atu i ai ae sa lagona le faanoanoa ona ua le fiafia lana uo.
I le malologa, sa toe faalogoina foi e Shelby na upu. O le taimi lea, o Beth.
“Faamolemole aua nei faia na upu pe a ou i ai,” na fai atu ai Shelby.
“Malie lou loto,” na fai atu ai Beth ma faasesepa ona mata.
Sa toe le lelei foi le lagona o Shelby.
I le taimi o a’oga sofipolo ina ua tuua le aoga, sa ta ai e Shelby le polo. Sa taavale agai i le tulimanu muamua ma taunuu i ai a o lei oo atu Shelby. Sa faalogoina e Shelby ia Bonnie, le teineitiiti fou o lana ‘au, o ta’ufua le suafa o le Alii.
Sa faatuatuai Shelby. Ua le lava o ia i le fai atu i tagata e aua le faia na ituaiga upu a o i ai o ia. Sa lei manao o ia i isi teineiti e ula ia te ia.
“Faamolemole aua nei faia na upu a o i ai o ia.”
Sa faliu Shelby e vaai po o ai la na tautala.
Sa ta’u atu e Beth ia Bonnie, o Shelby o se Au Paia o Aso e Gata Ai ma na te le faia na ituaiga upu ma e na te le maua foi se fiafia i le faalogoina o na upu.
Sa faliu atu Bonnie ma tilotilo atu ia Shelby. “Malie lou loto Shelby. Ou te lei iloaina.”
Sa ataata atu Beth ia Shelby. “Ou te masalo ua matou faapei uma lava o oe,” o le tala lea a Beth.
Sa ataata Shelby. Sa fiafia o ia ona sa ia faia se faaiuga e avea o se faataitaiga lelei i ana uo ma mulimuli i fautuaga a le perofeta ina ia tausisia e ia le Agaga.
Ata na tusia e Ben Simonsen