E Faapei ona Faamafanafanaina i Tatou e Keriso
Angela Fallentine, Niu Sila
O la matou uluai Kerisimasi i le Motu i Matu o Niu Sila—o se nuu manaia ma le matagofie. Ae ui lava i le lasusulu ma le agalelei o tagata o le Ekalesia, sa ou lagonaina le loloto o le tiga o le tuuatoatasi mo o’u matua ma nai o’u tei. Sa matou siitia mai le Iunaite Setete i le amataga o le tausaga, ma sa ou lagonaina le ma’imanatu.
I le matou eria fou, sa amata ona matou faauo ma lo’u toalua ma le au Wilson, o se aiga Aialani talavou o se isi tapuaiga Kerisiano, faatoa taunuu mai foi i Niu Sila. O Noleen Wilson ma te faigaluega, ma e lei leva ae avea i ma’ua o se uo lelei, ua fefaasoaa’i aafiaga o le malaga mai ma lo matou fiafia i o matou aiga fou. A o tuputupu a’e le matou faigauo, sa oo ina ou iloaina o la foi e tauivi lo latou aiga ma le tuua na o i latou faapea foi lagona o le lofituina. E toatolu le la fanau laiti ma le lona fa lea e faatalitali.
I se tasi afiafi ina ua ou matua lagonaina lava lo’u tuuatoatasi ma le faanoanoa mo a’u lava, sa ou maua ai se uunaiga o le ala sili lava e faatoilalo ai lo’u tuuatoatasi o le auauna atu lea i se tasi—aemaise lava i le au Wilsons. Sa tonu ia i ma’ua ma lo’u toalua i lena po e amata ona faamanatu ia aso e 12 o le Kerisimasi i le au Wilsons e ala i le tuuina e aunoa ma le iloa o ni savali ma ni meaalofa laiti i luma o lo latou faitotoa. O po taitasi, sa suia lo’u tuuatoatasi i le sagisagi fiafia ma le naunautai a o matou tolotolo atu i lo latou fale, tuu le matou savali ma meaalofa, tu’itu’i lo latou faitotoa, ona taufetuli ese lea ma le matua fiafia lava.
O aso taitasi i le galuega e faamatala mai ai e Noleen e uiga i “tamai aitu o le Kerisimasi” e le mailoa, sa asiasi atu i le po ua mavae. Na te faamatalaina tala i le faatalitali o lana fanau i le taunuu atu o a latou ‘au asiasi, ia sa avea ai le Kerisimasi a le aiga o se mea fiafia. E tele ni afiafi sa matou auai faatasi ma le autalavou a le uarota i lea mea sa matou fiafia ai.
I le po faaiu, le Po o le Kerisimasi, sa tuu ai e le au Wilson se savali ma ni kuki i luma o lo latou faitotoa, ma talosaga ai ia mafai ona latou feiloai i a latou tamai aitu. Ina ua matou taunuu ma le autalavou e usuusu pesepesega o le Kerisimasi e fai ma a matou meaalofa faaiu, sa matua fiafia tamaiti ma sa opoina i matou e a matou uo i ni sogi ma loimata o le lotofaafetai. Sa suia le tuuatoatasi i lo’u loto i le alofa ma le olioli, ma sa faamalosia ai le noataga o le faigauo i le va o o matou aiga.
Mulimuli ane sa matou mauaina se i-meli mai se tagata o le lotu a le au Wilson lea na fai mai sa matua tuia lava lona loto i le mea sa matou faia mo le aiga, ma o lea sa ia fesili mai ai e uiga i la tatou Ekalesia ma faatinoga o le auaunaga tatou te tuuina atu mo isi. E lei faalogo lava le aulotu i le 12 aso o le Kerisimasi ma o lea ua tuufaatasi ai lenei aga masani ma le Au Paia o Aso e Gata Ai.
O le a le galo lava ia te au lena uluai Kerisimasi i Niu Sila, lea sa ou aoaoina ai se ala e lei mafaufauina e faagalo ai a’u lava ia, ae alu e galue ma “faamafanafana atu ia te i latou o e e manaomia le faamafanafanaga” (Mosaea 18:9)—e faapei lava ona faamafanafanaina i tatou e Iesu Keriso i o tatou taimi e manaomia ai ma tuuatoatasi ai.