Leiloa & toe Maua

Saunia e Adam C. Olson

Mekasini a le Ekalesia

E faigofie ona leiloa lo tatou ala pe afai e le fesootai a tatou faaiuga i aso taitasi ma lo tatou taunuuga faavavau.

Toetoe lava ina atoa lona 30, ae iloa e Roberta Tuilimu sa le’i fiafia o ia. E toatolu lana fanau aulelei, ma sa alofa foi i le tama o lana fanau, o Daniel Nepia, ae e le’i faaipoipo Roberta ma Daniel. O Daniel e le o se tagata o le Ekalesia, ma sa umi se taimi talu ona auai e le aunoa ia Roberta i le lotu.

Sa mamao o ia mai le faaipoipoga i le malumalu lea sa moemiti pea i ai o se teine talavou sa alu i le lotu i vaiaso uma faatasi ma ona matua i Aukilani, Niu Sila. Peitai, o le fulitua i ana sini o le faavavau sa le o se faaiuga na faia i le taimi e tasi; o se liliu faifai malie na i’u lava ina mae’a e ala i faaiuga laiti sa ia faia i aso taitasi.

Faaiuga E Le Fesootai

Ia Roberta lava ia, e tasi le faaiuga na manino le tu matilatila e pei o le taimi na ia faatoa laa ese ai mai le ala o le talalelei, e ui e i ai isi filifiliga sa aumaia ai o ia i lena tulaga. A o talavou Roberta, sa faamisi e ia le alu i le lotu i ni nai vaiaso ina ia fai ai ana meaa’oga. “E uiga ese ona e mafai ona amata i se mea sa foliga e matua itiiti lava i le taimi,” o lana tala lea.

Ina ua uma ona misi ni nai vaiaso, sa matua faigofie lava ia te ia ona le alu i le vaiaso na sosoo ai. Na liua vaiaso o le misimisi o le auai e avea ma masina. Ina ua atoa lona 18, sa uunaia o ia e ana uo latou te o i falekalapu i le tuneva o le po i Aso Toonai, lea na atili ai ona faigata ona alu i le lotu i Aso Sa. Na iu ai foi ina amata ona inu o ia.

“Sa ou iloaina e le sa’o, ae sa ou mafaufau faapea e mafai lava ona ou taofia loa lava pe afai ou te manao ai,” o lana tala lea. “Sa ou taumafai e ta’uamiotonuina a’u faaiuga.”

Sa ola o ia i se ituaiga olaga e le talafeauga ma le ulu atu i le malumalu, ae ina ua mae’a ona ia feiloai atu ia Daniel, sa ia aveina o ia i le lotoa o le Malumalu i Hamilton i Niu Sila, ma fai atu ia te ia e manao e faaipoipo iina.

“Sa ou iloaina o iina sa ou manao ou te alu i ai,” o lana tala lea. Peitai o faaiuga leaga taitasi sa foliga mai ai ua faigofie atu ona faia ai foi le isi faaiuga leaga—ma saga taitai ese mamao atu ai o ia mai lona taunuuga sa manao ai. E lei leva ae nonofo faatasi Roberta ma Daniel.

“Sa i ai se mea na motusia i le va o le mea sa ou manao ai—ma le mea sa ou iloa e sa’o—ma faaiuga sa ou faia,” na ia fai mai ai. “Ua ou i ai i le taimi nei. Sa ou le faafesoota’ia faaiuga o le taimi nei ma le mea o le a aveina i ai au.”

E Sailia e le Alii I Latou ua Leiloloa

E tusa ma le mea sa faamoemoe o ia e alu i ai, e lei leiloa Roberta i le Alii. E ui ina sa le’i iloaina e Daniel ma Roberta i le taimi lea, ae sa sailia e le Leoleo Mamoe Lelei, o lē na sau “e saili ma faaola i le na leiloa” (Luka 19:10), i la’ua i le taimi atoa.

Sa galue le Agaga ia Daniel, ina ua aveina o ia e Roberta i le lotoa o le malumalu ma ina ua faamanuia e le tama o Roberta le la fanau. E ui ina sa tele taimi na siitia ai i latou, ae o taimi taitasi e siitia ai latou te feiloai ai—ma aoao faatasi mai lea taimi i lea taimi ma—faifeautalai.

Ina ua mae’a ona toe siitia i le 2006, sa latou feiloai ma nisi na latou aooga, o Dan ma Lisa Nathan, o e sa malolosi i le Ekalesia. Faatoa siitia atu lava Daniel ma Roberta i totonu o tuaoi o le uarota a le au Nathan.

E tolu vaiaso o tolotolo lava e Roberta le valaaulia a Lisa la te o faatasi i le lotu. “Sa ou le manao e faamatala le tulaga sa ou i ai,” o lana tala lea. “Peitai sa tonu ia te au ou te fia manao i la’u fanau i le Peraimeri.”

E lei leva ae toe feiloai Daniel ma Roberta ma faifeautalai. Sa amata ona alu Daniel i le lotu, lea sa i ai se faiaoga lelei o Mataupu Faavae o le Talalelei sa faia se eseesega. Sa asiasi atu i ai faiaoga asiasi i masina taitasi. Sa feiloai foi le toalua lea ma Elder David A. Bednar o le Korama a Aposetolo e Toasefululua i le taimi o se faigalotu faapitoa.

Sa vaaia e Roberta i ona aafiaga ia le faamaoniga sa saunia lava e le Tama Faalelagi “le tele o tagata lelei sa fesoasoani ia i ma’ua.”

Mafaufau i Ou Ala

E ala mai i aafiaga eseese ma tagata, na saunia ai e le Tama Faalelagi ia avanoa mo Daniel ma Robert e “mafaufau [i o la’ua] ala” (Hakai 1:7). Peitai e tatau ona la “tuuina atu [lo la’ua] ala ia Ieova” (Salamo 37:5) a o lei mafai ona la agaigai i luma.

“Sa ou iloaina o o’u ala e le o Ona ala ia,” o le tala lea a Roberta (tagai Isaia 55:8–9), “ae sa ou le iloaina pe faapefea ona faafesoota’i le lua.”

Na oo mai le faaiuga tonu ina ua fai atu faifeautalai ia Daniel ma Roberta e filifili po o fea la te mananao e o i ai, i le tulaga faaleagaga, ma le mea sa manaomia ona la faia ina ia oo atu ai iina.

“Ina ua tonu ia i ma’ua i le faaiuga e faapea o le mea sa ma mananao i ai o le i ai lea i le nofoaga e tau atu i ai Lona ala,” o lana tala lea, “sa amata ona ma vaavaai i le mea e tatau ona ma ui ai e mulimuli ai i Lona ala iina.”

I masina na sosoo ai, sa galue ai Roberta e fulitua i faaiuga leaga i le taimi ua fano ae toe foi i le ala sa ia tuua i le silia ma le sefulu tausaga talu ai. E faapei ona amata lona fulitua i le ala o le talalelei i faaiuga laiti a o talavou, na faapena foi le toe foi mai o Roberta i le ala na amata i le faia o nai mea laiti lava i aso taitasi.

“Ina ua amata ona ou taumafai e faia mea faavae i aso taitasi—tatalo taitoatasi ma faaleaiga, faitauina o tusitusiga paia, aveina o tamaiti i le lotu, fesoasoani i isi pe a mafai ai—sa mafai ona ou lagonaina le tausia o i matou e le Tama Faalelagi ma faafofogaina a matou tatalo,” o le tala lea a Roberta. “Sa sili atu le fiafia o lo matou aiga.”

Sa fesoasoani na faaiuga laiti e faamalolosia ai Daniel ma Roberta pe a oo i taimi e fai ai faaiuga tetele. Sa tonu ia i la’ua e faaipoipo. Ona oo lea ina ua toeitiiti atoa le tausaga talu ona amata feiloai Daniel ma Roberta ma faifeautalai, o lo la naunau ia faatasia e faavavau ma lo la aiga, na taitai atu ai Daniel e papatisoina.

Mulimuli ane, ina ua mavae le lua tausaga o la taumafai e faatusatusa mea sa la faia i aso taitasi i mea sa la mananao ai i le lumanai, sa faamauina Daniel ma Roberta i le malumalu—ma ua faataunuuina ai le miti a Roberta a o laitiiti.

Ola i le Taimi Nei mo le Faavavau

Ina ia avea o se vaega o le fuafuaga a le Tama Faalelagi, e i ai le avanoa o Daniel ma Roberta e filifili ai i aso taitasi po o le fea ala o le a la’ua filifilia—po o lo la’ua po o Lona. Ua sili atu nei ona nofouta le ulugalii i le itu o le a ave i ai i la’ua e a la filifiliga i aso taitasi.

Mai aafiaga patino, ua la malamalama ai i le faigofie ona leiloa lo la’ua ala pe a faia faaiuga i aso taitasi e aunoa ma le mafaufau i le aafia ai o taunuuga e faavavau. Peitai, e faafetai foi i la’ua i lo la’ua muai aoaoina e i ai se ala e toe foi ai.

“Ou te iloa e alofa le Alii ia te au ma e finagalo ia ou toe foi atu aua sa Ia faamanuiaina o ma’ua olaga i tagata sa matou feiloai i la ma’ua faigamalaga o ē sa fesoasoani ia i ma’ua e toe foi mai, “o le tala lea a Roberta. “Na te lei faagaloina a’u i le taimi na ou aluese ai mai le Ekalesia.”

Faafetai i le alofa—ma le taulaga togiola—a le Leoleo Mamoe Lelei, “[e mafai] e le amioleaga ona lafoai lona ala, ma … ia foi mai ia Ieova, ona alofa mai lea o ia ia te ia … , aua na te matua faamagaloina” (Isaia 55:7).

Ua taumafai nei le au Nepia e taulai atu i le mea ua la mananao ia i ai. “A oo ina e iloaina e tele atu isi mea o i lenei olaga nai lo mea o i ai i le taimi nei,” o le tala lea a Daniel, “e suia au filifiliga.”

Ata na pueina e Adam C. Olson