Auaunaga i le Ekalesia
O La’u Auaunaga o se Tagata Nofofua o le Ekalesia
Ina ua maua so’u valaauga fou, sa ou te’i. “Pe mafai ona ou faia lena mea?” sa ou fesili ai ia te a’u lava ia.
Pe a ma le fitu tausaga ua mavae, a o 29 o’u tausaga, sa ou siitia atu ai i Iuta mai Oregon, ISA. Ina ua uma ona faia ni a’u fetuutuunaiga, sa ou filifili loa e auai i le uarota a lo’u aiga i le lotoifale, ma mafaufau ai ua ou manaomia se suiga mai le uarota a le au nofofua lea sa ou auai.
Sa aoaoina a’u e o’u matua ina ia talia e le aunoa ia valaauga o le Ekalesia, ma o lea sa fai ai so’u avanoa e vaai le epikopo ma faailoa atu au lava e avea ma se tasi o loo manao e galue. E le’i leva ae ou faiaoga loa i tamaiti e ta’i lima tausaga i le Peraimeri, lea sa ou fiafia i ai. E lima masina mulimuli ane ae tofia loa a’u e le epikopo e avea ma peresitene o le Peraimeri. Sa ou te’i. “Pe mafai ona ou faia lena mea?” sa ou fesili ai ia te au lava ia.
O lo’u nofofua ma le leai o se fanau na ou ofo ai pe ua ou agavaa e galue i lena tofiga. O o’u aafiaga ua mavae i uarota faaleaiga, o peresitene o Peraimeri o ni tina e fiafia ua faaipoipo, talenia, ma tuuto. Peitai, o lo’u manatuaina o mea na aoaoina ai a’u e o’u matua, na ou talia ai le tofiga fou. Na matuai faamaoni a’ia’i le epikopo i le tiutetauave e tatau i epikopo ona “sailia ni valaauga ‘anoa mo talavou nofofua matutua uma.”1 Atonu na sili atu ona ‘anoa le valaauga nai lo le mea sa ou faamoemoeina, peitai sa ou matuai faafetai ai lava.
A o ou galue ai i lo’u valaauga fou, sa ou maua ni taimi fiafia, malie, ma le musuia tele ma tamaiti. I se tasi tausaga, i le vaitaimi o le Kerisimasi, sa matou toe faatinoina ai le tala i le Soifua mai o le Faaola mo se taimi o le fetufaaiga faapitoa. Sa matou usuina ni pese. Sa matou aumaia ni ofu talaloa ma pulou e fai i solo mo le au leoleo mamoe ma Iosefa. Sa i ai ni pale ilaila mo ulu o agelu. Sa matou faia ni pulou tupu mai pepa malo ae ufi i pepa iila mo le Au Makoi.
A o matou toe faatinoina le tala o le Kerisimasi ma usu ia pese paia o le vaitau, sa ou vaaia se teineitiiti lalelei o loo avea ma Maria. O ana faataitaiga o le migao ma le agamalu na pa’i mai i lo’u loto, ao ia tootuli, filemu ma siiina le pepe meataalo o loo avea ma Iesu le pepe. O le agaga o lena taimi na ou maua ai le agaga faafetai i se Tama Faalelagi alofa mo lo tatou Faaola ma na fesoasoani lea e faamalosia la’u molimau i Lana misiona maoae ma le alofa. Sa ou maua ai foi le agaga faafetai mo le faamanuiaga ofoofogia sa ou mauaina i le valaauina e galue, ma mo se epikopo musuia o lē na fesoasoani i le faataunuuina o lena auaunaga.
Tatou te faitauina i le Mataupu Faavae ma Feagaiga, “O lea, afai ua ia te outou le manao e auauna atu i le Atua, ua valaaulia outou i le galuega” (MF&F 4:3). E ui lava e tele ina fesootai lenei mau ma galuega faafaifeautalai, ae ou te fia manao ina ia mafaufau e mafai foi ona faasino i soo se tulaga o auaunaga e faatatau i le talalelei.
Po o le a lava le tulaga faaleaiga po o fegalegaleaiga, o le mea muamua lava ma e sili ona taua o i tatou taitoatasi o se atalii/afafine o se Tama Faalelagi alofa, e finagalo ina ia tatou tuputupu ae, auai, atiina ae a tatou taleni, feauaunaai le tasi i le isi, ma fesoasoani le tasi i le isi ina ia toe foi atu ia te Ia.
Sa ou lagonaina le vave ona taliaina ma le alofa i lena uarota ma e tumau ai pea i lo’u loto e oo mai i lenei aso. Sa iloa ma na faaaogaina lo’u naunau ina ia galue, ma e tele tagata na aapa mai ma faamasani mai ia te a’u, ma na faamanuiaina moni lava a’u e le Tama Faalelagi. Ona o ni taitai agalelei ma le mataalia, sa faamanuiaina ai a’u ina ia aoao atu ma aoao mai mai nisi o Ana fanau e sili ona matagofie.
Ata na tusia e Roger Motzkus