Peresitene Lorenzo Snow (1814–1901)

E ui lava ina sa avea mulimuli ane o ia ma Peresitene lona lima o le Ekalesia, ae e le’i fiafia Lorenzo Snow e papatiso pe ana le valaauliaina o ia e lona tuafafine o, Eliza, e auai i vasega o le gagana Eperu i le Aoga a Perofeta i Katelani, Ohaio. Sa auai ai foi ia Iosefa Samita ma isi taitai o le Ekalesia. E le’i leva ae fiafia Lorenzo i le talalelei ma auai ai loa i le Ekalesia i le aso 19 o Iuni, 1836. Sa galue faamisiona ia Elder Snow i Italia, Atumotu o Sanuisi (lea ua ta’ua nei o Hawaii), ma Peretania Tele, lea na ia tuuina atu ai se kopi o le Tusi a Mamona i le Masiofo o Victoria.

Sa ia Elder Snow ni meaalofa mataina lea na ia faaaogaina e auauna atu ai i le Alii. I lona faamanuiaga faapeteriaka na folafola atu ai ia te ia, o le a ia soifua seia loa ona tausaga, ae o le ana le lagonaina ia aafiaga o le matua. O lona malosi na mafai ai ona ia tumau malosi ai i tausaga mulimuli ane o lona soifua a o avea ma se aposetolo ma se perofeta. Na ia faaaogaina foi le perisitua e toe faatutu mai ai nai tagata mai le oti.

O le vaitaimi ao avea Peresitene Snow ma perofeta, na aafia ai le Au Paia o Aso e Gata Ai i saute o Iuta i le leai o se timu. Na musuia Peresitene Snow a o lauga atu i se konafesi i le taulaga o St. George i saute o Iuta, ina ia folafola atu i le Au Paia o le a oo mai timuga ma o le a latou fiafia i se seleselega o fua o faatoaga matua tetele pe a fai latou te totogiina le sefuluai. E ui lava na totogiina e tagata o le au paia a latou sefuluai, ae na mavae ni nai masina o leai lava se timu. Na aioi atu Peresitene Snow i le Tama Faalelagi ina ia auina mai se timu. I nai aso mulimuli ane na ia maua ai se feau faauaealesi o loo ta’u mai ai, “Timuga i St. George.”

Luga: Ata o Lorenzo Snow pe tusa o le 1865. Ogatotonu: O Peresitene Snow (ogatotonu) ma ona fesoasoani i le Au Peresitene Sili o, George Q. Cannon (agavale) ma Iosefa F. Samita (taumatau) i le 1900. Lalo: Ua faamanuiaina le Au Paia o Aso e Gata Ai i timuga mo fua o a latou faatoaga ina ua usitaia le fautuaga a Peresitene Snow e totogi le sefuluai.