O Le Ki i Avanoa
Faamanatuina o le 10 Tausaga o le Tupe Faaagaga mo Aoga
I le sefulu tausaga talu ona fofogaina mai e Peresitene Gordon B. Hinckley le Tupe Faaagaga mo Aoga, ua matua faamanuiaina le fuafuaga ma ona tagata auai.
I le 1850, na o le tolu tausaga talu ona taunuu mai i le Vanu o Sate Leki, sa amataina ai e Peresitene Polika Iaga (1801–77) ona faatuina a’oga ma iunivesite e aooga ai le Au Paia o Aso e Gata Ai. Sa faamalosiauina e perofeta uma o lenei tisipenisione le aoaoina o tagata o le Ekalesia.
O se tasi o i latou o Peresitene Gordon B. Hinckley (1910–2008), o lē sa faatomua maia le Tupe Faaagaga mo Aoga (TFA), e mamanu i se tasi o fuafuaga a Polika Iaga i le seneturi lona 19, o le Tupe Faaagaga mo Femalagaaiga. O lenei teugatupe faaleaoaoga o le a avea, i upu a Peresitene Thomas S. Monson, o se tasi o pinefaamau iloga o le taitaiga a Peresitene Hinckley.1 Na silasila Peresitene Hinckley i le mativa ma le lē lava o aoaoga ma le aoaoina ua taofia ai le toatele o talavou matutua o le Ekalesia mai le ausiaina o mea latou te gafataulimaina. Sa ia saili atu i le Alii mo ni tali.
I le konafesi aoao i le aso 31 Mati, 2001, sa fofogaina mai ai e Peresitene Hinckley lana vaaiga mamao i le polokalama. Sa ia ioe o se “taumafaiga matautia” ae o loo i ai le “aoaoga o le ki lea i avanoa.”2 Sa valaaulia e Peresitene Hinckley i latou uma o ē fia fai saofaga i ai, ina ia faia, ma sa amataina loa le polokalama.
O lea, i le 10 tausaga mulimuli ane, o saofaga tetele ma saofaga laiti mai tagata foai i le lalolagi atoa ua mafai ai e le fuafuaga—ma ona tagata auai—ona manuia. Na saunoa Elder John K. Carmack, o se Fitugafulu ua faamalolo faamamaluina ma o le Faatonu Sili o le TFA, “ua laveai mai ai le Au Paia mai le fetu’u o le mativa.” Ua manuia i lena laveai, o le tala lea a Rex Allen, o le faatonu volenitia o aoaoga ma fesootaiga mo le TFA, aua sa faavae i luga o mataupu faavae e faavavau ma o loo aumaia faatasi ma folafolaga faaperofeta e i ai “se aafiaga e sili atu ona o’oo’o e le mafai e se tasi o i tatou ona malamalama i ai.”
O Se Taumafaiga Matautia
Sa faamalamalama mai e Peresitene Hinckley i le 2001, o le teugatupe na faavae mai foai tautupe; o le tului o loo maua mai i le tupe faavae o loo nono atu i tamaiti ua faamoemoe e aooga.
O talavou matutua e fia auai e mafai ona faafesootai taitai perisitua i le lotoifale ma faatonu o le inisitituti. Faatasi ai ma la latou faamaoniga e maua ai e nei “alii ma tamaitai talavou sogasoga,” o le toatele lava ua mae’a misiona, ia nonogatupe e ō ai i a’oga i o latou lava nuu.3 A o i ai lava i a’oga, latou te amata totogiina le nonogatupe, ina ia mafai ai e isi tamaiti a’oga ona faaaogaina foi lea tupe.
I le sefulu tausaga talu lona amataga, ua faaleleia e le polokalama ia olaga o le 50,000 tagata auai i atunuu e silia ma le 50, ua fesoasoani ai ia te i latou e “tulai ese mai le mativa sa feagai ma i latou ma augatupulaga na muamua ia i latou,” e pei ona saunoa ai Peresitene Hinckley.4
Ua faamatalaina e Uso Allen le TFA i le ala lenei: “Sa faia e le perofeta se mea ofoofogia i lena aso. I aso lava la ua leva, sa faaloaloa ai e Mose lona tootoo i luga o le Sami Ulaula ona vaeluaina ai lea o le sami. Sa faataitai foi e Peresitene Hinckley lea lava faatuatua ina ua ia faaloaloa atu faavaoli’a lona ofutalaloa i luga o le vasa pogisa o le mativa ma amatalia le TFA.”
Mataupu Faavae
O le Tupe Faaagaga mo Aoga o loo fausia i luga o se faavae o mataupu faavae o le talalelei—faatuatua ma le faamoemoe ia Iesu Keriso, aoaoga, galuega, ositaulaga, faalagolago o le tagata ia te ia lava, amiosa’o, ma le auauna atu. Ua faatinoina e tagata auai o le TFA ma le au faau’u i le lalolagi atoa nei mataupu faavae i o latou olaga.
Fai mai Carolina Tello Vargas, o sē ua faauu mai Kolumipia, o le TFA o “se ‘ave o le faamoemoe” ma o se faamaoniga o le fesoasoani a le Tama Faalelagi, o lē “o loo taialaina [o ia] ma tatalaina le ala i le alualu i luma.”
Ua malamalama o ia i le taua o a’oga ma le galue ma le ositaulaga o loo alu ai. A o le’i auai o ia i le TFA, sa faigaluega Carolina i ni galuega se tele ma sa ia faatauina atu ana maataua ina ia mafai ai ona a’oga i le tulafono. Sa ositaulaga foi lona aiga.
“Sa ou iloa ina ia mafai ona suesue, e tatau ona ou ositaulaga,” na faamatala ai e Carolina. “Sa ou naunau e faia ina ia ou maua ai ni avanoa faigaluega e sili atu i le lumanai.”
Peitai o le taimi lena na tulai mai ai luitau i lona aiga i lona tausaga faaiu i le a’oga, ma sa le mafai ai ona ia totogiina lona pili. Sa ia maua se nonogatupe mai le TFA ma sa faaaogaina e faamae’a manuia ai lona faailoga.
O loo ola foi Shirley Mwelase o Aferika i Saute i nei mataupu faavae. Sa ia faaaogaina se nonogatupe mai le TFA e faamae’a ai lana kosi o le faapolokalamaina o komepiuta, ma ina ua ia maua se galuega i se kamupani inisiua, sa vave ona totogi uma le mea na totoe o lana nonogatupe, ma sa fesoasoani e lagona ai lona “faalagolagoina ma le faatuatuaina.”
Sa faamatala e Shirley, “O se galuega e lelei se totogi o lona uiga o le maualuga foi lea o le lelei o le olaga. O lona uiga e mafai ona ou fesoasoani i o’u matua ma le aiga, ma ua fesoasoani tele nei tomai ma le faaleleiga atili ua ou maua mai le faigaluega, ua sili atu ai la’u auaunaga i o’u valaauga uma i le Ekalesia.”
O le faigaluega o se faipolokalama komepiuta, ua tele naua ai mea ua ia ausia. Fai mai a ia, “Ua ou lagona ana leai a’u suesuega ma lo’u auai pea lava pea i le lotu, semanu e leai sa’u galuega, semanu foi e le mafai ona ou ausia se tasi o nei mea lelei.”
O Folafolaga ma Faamanuiaga
Ina ua fofogaina mai e Peresitene Hinckley le Tupe Faaagaga mo Aoga, sa ia folafola mai o le a aumaia ai faamanuiaga i tagata taitoatasi, i o latou aiga ma nuu, faapea le Ekalesia atoa e ala i avanoa mo galuega, auaunaga, ma le taitaiga.
Sa folafola mai e peresitene Hinckley o le a mafai e tagata auai ona “maua tulaga lelei faaleaoaoga o le a siitia a’e ai i latou mai le matautia o le mativa. … O le a latou faaipoipo ma fetuleni atu i luma ma tomai latou te agavaa ai mo galuega lelei, ma maua ai o latou tulaga i nuu lea e mafai ai ona tele so latou sao.”5
Ua faataunuuina lenei folafolaga mo le fiaafe o tagata auai i le TFA, e aofia ai Pable Benitez o Iurukuei. Sa faigaluega Pablo i le 12-itula i le aso i se faleoloa, sa tau le ‘a’u’a’u le faasoa e ola ai, ae tonu loa ia te ia e suia lona olaga. Sa amata ona alu i le aoga, ae ona ua sii le totogi o a’oga, sa ia iloa ai e le mafai ona ia faatupeina na o ia lana a’oga.
O le TFA na mafai ai ona faauma sona tikeri i a’oga faamalositino. O le taunuuga, sa tele ni ana galuega na maua i le gasologa o tausaga, o galuega taitasi sa faaleleia atili ai ana tupe maua. Sa ia lipotia mai, “E tele lava ina ou maua galuega e ofo mai mo le taimi atoa po o le sui i isi sa le mafai ona ou taliaina ona e le lava lo’u taimi. Ma o nei mea uma e faafetai ai i le TFA ma avanoa sa tatala mai ia te au ona o a’u aoaoga.”
Ona o avanoa sa maua e ala mai i a’oga, ua mafai ai e Pablo ona lagolago lona aiga a o auauna atu o ia ma atiina ae lona nuu i le avea ai ma se faiaoga.
O le galue ai i itula uumi ae tau le lava se tupe e maua e totogi ai mea e ola ai ma le sefuluai, e mafai ai ona avea le auaunaga i le Ekalesia o se lu’itau tele, o le saunoaga lea a Brother Allen. O se tauiviga lea mo le toatele o tagata o le Ekalesia i le lalolagi atoa, ae o le folafolaga lenei na faia e Peresitene Hinckley e uiga ia i latou e auai i le TFA: “O le a avea i latou ma taitai i lenei galuega tele i o latou lava nuu. O le a latou totogiina a latou sefuluai ma taulaga, lea o le a mafai ai e le Ekalesia ona faalautele tele atu lana galuega i le lalolagi atoa.”6
E toatele ua auai ua latou iloa o aoaoga ua latou maua e ala mai i le TFA ua tau atu ai i galuega e sili atu ona lelei faatasi ai ma itula ua mafai ai ona tele o latou taimi e auauna ai i le Ekalesia. O Miriam Erquiza, o se tasi ua mae’a le misiona mai Filipaina, sa ia faamae’aina se polokalama e mamanu ai uepi i le initoneti mo le lua tausaga ma, e ala i le “tatalo faatauanau,” sa maua ai se galuega i se ofisa malaga. O lea galuega na mafai ai e ia ona lagolago lona aiga ma maua ai se taimi e avea ai o se peresitene o Tamaitai Talavou ma se faiaoga o le inisitituti.
O Vanderlei Lira o Pasila, sa avea ma se peresitene o le paranesi mo le ono tausaga, ma fesoasoani i lana paranesi e tuputupu a’e mai le 18 tagata e oo atu i le 110 tagata malolosi, a o faigaluega o ia o se leipa aua e le i lelei sana a’oga. Ina ua fofogaina mai le TFA, sa mafai ona ia aoaoina galuega o le saogalemu ma maua ai se galuega fou, lea sa fesoasoani e faateleina ai lona totogi ma sa vave ona ia totogiina ai lana nonogatupe. O loo faaauau pea ona ia auauna atu i le Ekalesia i le taimi nei. E faamatalaina o ia e lona peresitene o le siteki o “se sau’ai ua faasaolotoina e le avanoa.”
Sa ta’u mai e Peresitene Hinckley i tagata o le Ekalesia o le a manuia le polokalama aua ua i ai i le Ekalesia “o le faalapotopotoga … ma auauna faamaoni a le Alii” e tatau ai mo le manuia.7 Ioe, ua manuia le Tupe Faaagaga mo Aoga aua o loo aofia ai le galulue faatasi o tagata auai ma taitai perisitua i lotoifale i lalo o le taitaiga a le Au Peresitene Sili, Korama a Aposetolo e Toasefululua, ma isi taitai aoao o le Ekalesia. O loo taufai punouai foi nofoaga autu o punaoa mo galuega a le Ekalesia ma seminare ma inisitituti i le taumafaiga.
O aafiaga o le tupe e faaagaga pe faifai pea e le gata i le itu tautupe, aua e toe totogi le tupe ona faaune atu foi lea i isi tamaiti a’oga, ae e faaleagaga foi ma faaagafesootai a o faamanuiaina ai i latou e auai, o ē o loo foa’i i le teugatupe, taitai, ma le isi e le mafaitaulia i soo se itu. “O Aoaoga o le ki lea,” o le saunoaga lea a Uso Allen, “e tatala ai faitotoa i se papuipui mausali, e le gata mo tagata taitoatasi ae faapea foi i o latou aiga ma nuu.”
I le 10 tausaga ua tuanai, sa fesoasoani tekinolosi ma le poto masani i le faaleleia o le faagasologa mo tagata auai ma faufautua, ae o loo saili pea le Tupe Faaagaga mo Aoga e faataunuu le vaaiga faaperofeta na faatuina ai. O lenei “taumafaiga lototoa” o le a tumau pea o se taumafaiga faaperofeta. O loo faaauau pea e Peresitene Monson le galuega a le teugatupe, lea na ia saunoa ai, o le a “mamao lona alu i le lumanai.”8
I le sefulu tausaga talu lona amataga, ua faaleleia atili e le Tupe Faaagaga mo Aoga ia olaga o le 50,000 tagata auai i atunuu e 51, e pei o Kevin Moore o West Indies ma tagata mai Peru (tauagavale).
O Miriam Erquiza, o se tasi ua mae’a le misiona mai Filipaina, sa faafaigaluega i se ofisa malaga; o itula faigaluega ua faatagaina ai o ia e galue o se peresitene o Tamaitai Talavou ma se faiaoga o le inisitituti.
O Vanderlei Lira o Pasila, sa avea o se peresitene o le paranesi mo le ono tausaga a o faigaluega leipa. Ina ua uma ona faalautele lana a’oga, sa ia faafetai i se nonogatupe i le TFA, ua ia maua ai se galuega fou ma se totogi ua faateleina. E faamatalaina o ia e lona peresitene o le siteki o “se sau’ai ua faasaolotoina e le avanoa.”
Ata na pueina e Brian Wilcox; aikona na saunia e Brent Croxton