Seia Tatou Toe Feiloai
O Le Malamalama o le Alo
E fesoasoani le malamalama tatou te iloa ai le upumoni—ma atili manino ai le vaai.
Ina ua mavae le tele o tausaga o faigaluega i faleoloa e faatau atu ai lavalava o tamaloloa, sa fai lava si o’u talenia i le faafetauia o ofutino ma fusiua i suti. O se tulaga faafiafiaina le pikiina o mea eseese ua fetaui lelei, ma sa masani ona fiafia tagata sa ou tautuaina i mea ou te filifilia ma tuuina atu ia i latou.
Ae ui o lea, i se tasi faleoloa patino, sa tuu suti i se vaega e sesega vaivai lona faamalamalamaina a o ofutino ma fusiua e faaali i se isi itu i lalo o matauila malolosi. O lenei eseesega i le malamalama sa faamaonia e fai lava si faigata.
O le mea na tupu i le tele o taimi, a uma ona filifili e se tagata se suti se tasi pe lua, ona ou alu lea filifili mai ni ofutino ma ni fusiua sa ou manatu o le a fetaui lelei. Peitai, o le taimi lava e aveese mai ai ofutino mai se vaega ma tuu i autafa o suti, sa ofo i le mea e tulai mai—e “sui” ia lanu i le malamalama fou ma e matua le fetaui lava.
O le aveina o se suti i le vaega o loo faaali ai ofutino ma fusiua e sili atu lena. Peitai e oo lava foi i lena faiga, e tele lava ina le mautonu tagata faatau, latou te matauina e le tutusa le foliga mai o suti o i o matou lima ma suti sa latou faatoa filifilia. O se suti sa foliga lanuvao i le malamalama sesega a o lea ua foliga faaefuefu, lanuenaena vaivai, po o le enaena malosi ina ua iloiloina i le malamalama malosi. O suti lanuuliuli, lanu paauli, ma lanuvaiuli, e faapena foi suiga.
O le tele lava o taimi, ou te foia ai le faafitauli i lo’u aveina lea o tagata faatau i autafa o se faitotoa i le malamalama o le ao e tilotilo ai i ofu latou te filifilia. O le vaai i ai i le malamalama o le la, e vave lava ona iloatino ai lanu moni ma faia ai filifiliga talafeagai.
I le lalolagi moni i fafo atu o le faleoloa, tatou te feagai ai ma filifiliga i aso taitasi. O nisi taimi e matafi ai na filifiliga e ala i mataupu a tagata. O isi e puaoa i faaosoosoga a lenei lalolagi. Atonu e le foliga sa’o i taimi uma ia filifiliga e tuu mai i o tatou luma, pe atonu foi tatou te fememea’i po o le fea e mao’i ae o le fea foi e leai. Atonu tatou te manatunatu pe faapefea ona iloatino le mea e moni.
Ua ou iloaina o le vaifofo lava o le vaavaai lea i na filifiliga i le malamalama, po o le faataitaiga, a le Alo, aua sa Ia folafola mai, “Ma o le a avea foi A’u ma o outou sulu i le vao; ma o le a Ou saunia le ala i o outou luma, e tusa ma tou tausiga o a’u poloaiga; … ma o le a outou iloa ai o a’u lava ua taitaia outou” (1 Nifae 17:13; faamamafa faaopoopo).
O le taumafai e filifili i le sulu moni, o le a fesoasoani tatou te faia ai filifiliga lelei mo o tatou aiga ma i tatou lava. O le vaavaai atu foi i le Atua e ala i le taitaiga a le Agaga Paia, o le a le faaseseina ai i tatou ae o le a iloaina le lelei mai le leaga (tagai Moronae 7:16).
A tatou faia filifiliga e mulimuli ia te Ia, ua folafola mai foi lo tatou Faaola alofa o le a Ia faasoa mai ia i tatou Lona sulu: “O le mea e mai i le Atua o le malamalama lea; ma o ia o lē e mauaina le malamalama, ma tumau pea i le Atua, e mauaina le malamalama atili; ma o lena malamalama o le a tupu susulu malamalama tele pea lava pea seia oo i le aso e atoatoa ai” (MF&F 50:24).
Ata na saunia e David Stoker