O Le Auala i le Malumalu
E ui lava ina eseese ala e ui ai tagata o le Ekalesia, ae ua iloa e le Au Paia o Aso e Gata Ai i Iukureini o auala uma lava o le amiotonu e tau atu i le malumalu.
O le malaga atu i taavale a’o lei tafa ata i le Auala o Kiltseva i Kyiv, Iukureini, na maua ai e le au malaga se ala e matuai toafilemu i le Malumalu o Kyiv Iukureini. Sa na o ni nai moli o taavale sa susulu i le puaoa o le taeao a o faatafatafa ese atu taavale i nai omoomo laiti.
O le susulu o le malumalu i luma atu sa avea o se moli faailo, na aumaia ai se sulu taiala e faaali atu ai ia i latou o loo malaga atu i le malumalu le mea tonu e tatau ona o i ai.
E ui ina sa faamanuiaina nisi e mulimuli i lenei ala toafimalie i le malumalu talu ona faapaiaina ia Aokuso 2010, e mafai foi e isi ona faamaonia sa le’i laulelei lo latou ala i le malumalu.
Ina ua tafa mai ata ma ua oso mai foi le la i le tafailagi, sa faatumulia le Auala o Kiltseva i taavale laiti ma pasi. Ua lilofia nei i taavale, ma o le ala sa toafimalie ua avea nei ma nofoaga pisapisao ua paka ai taavale.
I le iloa ai o le pisi o feoa’iga o se vaega masani o le auala, o le toatele o tagata e o i le malumalu sa i luga o le auala, sa o ma le onosai a latou taavale mo nai futu i le taimi ona tutu foi lea. O le malumalu lava le mea e ō i ai, ae sa telegese le ō a taavale.
O isi na filifilia nisi auala. I tua atu o le malumalu e i ai ni auala e le faatāina ma ni magaala ‘alo. E le manino le makaina o le ala, ma e faigofie lava ona toe foi avetaavale. Peitai, afai e tilotilo i luga le avetaavale, e mafai e ia ona iloa atu le tumutumu o le malumalu, lea lava e avea ma se taiala, e valaaulia tagata uma e o mai i le malumalu.
O ala faaleagaga na ui ai tagata o le ekalesia i Iukureini ina ia oo i le maota o le Alii, e le faapea e le tutusa ma auala o loo siomia ai le malumalu.
E ui ina i ai ni talavou ua faamanuiaina i le ola a’e i totonu o le Ekalesia ma ua mafai nei ona auai atu i le Malumalu o Kyiv Ukraine e fai o latou lava sauniga, e toatele isi na ui atu i le fe’oma’i o feoa’iga faaleagaga ina ia oo atu iina.
O le malumalu, na fofogaina mai i le 1998 e Peresitene Gordon B. Hinckley (1910–2008), na mae’a i le 2010. I na tausaga e 12, e toatele tagata o le Siteki a Kyiv Iukureini sa nonofo ai lava i le ala—e ui lava ina tuai tele—ma vaiti, ae sa faatalitali pea ma le onosai mo le malumalu se’ia mae’a. O isi na ui i nisi ala ese, ma galoma atu ai mo sina taimi a latou sini mo le malumalu.
Po o le a lava le eseese o ala faaleagaga o loo ui ai tagata o le au paia ina ia oo atu ai i le malumalu, ae ua iloa e tagata faamaoni o le Ekalesia i Iukureini o auala uma lava o le amiotonu e toe taitai atu ai i latou i le malumalu.
O Le Ala Sa’o
E toatele talavou matutua o le Ekalesia i Europa Sasae sa taitai mai i le talalelei a o laiti. O lena uluai iloa o le talalelei ua le gata ina mafai ai e i latou ona atiina ae molimau mai lo latou talavou ae ua fausia ai se faaiuga malosi ina ia faaipoipo i le malumalu.
O Nikolai Chemezov ma lona toalua, o Asiya, o le Uarota a Kharkivs’ki, sa muai faailoa atu i ai le talalelei a o laiti i la’ua—Nikolai i le valu o ona tausaga a o Asiya a o talavou.
“Talu ona ou papatiso, sa ou iloaina o le fuafuaga a le Tama Faalelagi o le ala lea i le faaeaga,” o le tala lea a Uso Chemezov. “O aoaoga a le Ekalesia i le misiona paia a le aiga sa taua pea lava pea ia te au.”
Sa iloaina foi e Tuafafine Chemezova le taua o aiga e faavavau a o laitiiti o ia. “Ina ua ou auai i le ekalesia o se tamaitai talavou, sa aoaoina au i le taua e ulu atu ai i feagaiga paia o le malumalu,” o lana tala lea. “Sa ou moemiti pea i se faaipoipoga i le malumalu, ma sa ou taumafai pea lava ia ou agavaa ia mafai ai ona ou faaipoipo i le malumalu.”
Sa amata ona tafafao faamasani i la’ua i le 2009. Ina ua totogo a’e le alofa ma ua amata foi ona liliu atu talanoaga i le faaipoipoga, sa iloa e le toalua lea la la’ua laasaga e sosoo ai. “Ina ua fofogaina mai o le a faapaiaina le Malumalu o Kyiv ia Aokuso 2010, sa tonu ia i ma’ua o le a faamauina i ma’ua iina,” o le tala lea a Tuafafine Chemezova.
“Manaia e lei umi ona ma faatalitali,” na faaopoopo mai ai Uso Chemezov.
Sa faamauina le ulugalii i le faaipoipoga i le aso 1 o Setema, 2010.
“O le aso e sili ona matagofie lea o lo’u olaga,” le tala lea a Uso Chemezov. “Sa ou lagona le fiafia e u’u le lima o la’u pele o Asiya ma ave o ia i le maota o le Alii. E sili le faapea atu o le aso lena na faataunuuina ai la’u miti—o le miti o le fatuina o se aiga e faavavau.”
O Le Ala Umi
E ui ina sa sa’o le ala i le faaipoipoga e faavavau mo tagata o le Uarota a Vynohradars’kyi o Petr ma Adalina Mikhailenko, ae sa matua umi naua. O le au Mikhailenko o se tasi o uluai aiga na auai i le Ekalesia i Iukureini, na papatiso i le 1993—na o le lua tausaga talu ona faavaeina le uluai paranesi i Kyiv.
E ui o lea, o le mamao mai le malumalu ma isi tulaga moni na taofia ai le ulugalii mai le faamauina i le malumalu mo le tele o tausaga. E aunoa ma le lotovaivai, sa tumau pea lo la’ua faamaoni a’ia’i o le tasi i le isi ma la la’ua miti mo se faaipoipoga e faavavau.
“Sa ou faatalitali ma le onosai mo le malumalu,” o le tala lea a Uso Mikhailenko. “Sa leai lava se manatu e tuua le Ekalesia. Sa manino i taimi uma le ala.”
Ina ua uma ona faapaia e Peresitene Thomas S. Monson le malumalu ia Aokuso 2010, sa matua le ma taofiofia le naunau o le toalua lea ina ia faamauina. “Sa ma usupo mai tele i le aso sa tatau ona faamau ai i ma’ua ae e lei tatalaina le malumalu,” o le tala lea a Tuafafine Mikailenko.
Sa le na o lea ulugalii. E toatele tagata o le uarota sa o mai ai foi i le malumalu i lena aso, ma le naunau e olioli faatasi ma le au Mikhailenko.
“Sa matagofie le faamauga,” o le tala lea a Tuafafine Mikhailenko. “Sa i ai se lagona e pei e te le’i alofa moni lava i lou toalua e pei ona e alofa nei i ai i lena taimi.”
Na uunaia lagona o le alofa talu mai lena aso. “Ua i ai se eseesega mautinoa i la ma sootaga,” o le tala lea a Uso Mikhailenko. “Ua leva ona ma faaipoipo, ae o lea ua i ai nei se lagona ese. Ua ma mananao e faia nisi mea se tele e le tasi mo le isi, ma ua ma faia ma le alofa ua tele atu.”
Toe Foi i le Ala
O Andrei ma Valentina Dudka o le Uarota a Vynohradars’kyi sa uluai faafeiloai atu i le talalelei e ni tuaoi i le 2003. Ina ua mavae ni feiloaiga mo ni nai vaiaso ma faifeautalai, sa tonu loa i le toalua lea e auai i le Ekalesia.
E ui ina sa naunau le au Dudka e aoao i upumoni o le talalelei e pei o le manaomia o malumalu i aso e gata ai ma le tulaga e mafai ai ona maua se aiga e faavavau, ae sa faifai malie lava ona se’e atu i la’ua i le lē toe toaaga mai. “Sa na ona ma sueina o mafuaaga e le ō ai i le lotu,” o le tala lea a Tuafafine Dudka. “Sa ma faatagaina mea e tula’i mai—pei o le, ua ma le lavavā tele po o le, e i ai le ata ma te fia matamata ai i le TV.”
O le le toaaga mai o le au Dudka na matua aafia ai lo la’ua fiafia. “Sa amata ona ma vaaia se eseesega moni i le va o le olaga i le Ekalesia ma le olaga faalelalolagi ina ua ma tuua le Ekalesia,” o le tala lea a Uso Dudka. “Ma te le’i fiafia.”
Pe tusa ua fa masina ma te lei toe o i le lotu, ae taunuu Tuafafine Dudka i lona tulaga e faia ai se suiga. “Na oo mai se Aso Sa patino, ma sa ou faapea atu, ‘Afai ou te le alu i le asō, atonu ou te le ola,’” o lana tala lea. “Sa pei a’u o se tagata ua tele ni aso e le o inu. Sa ou manaomia lena vai.”
Ina ua toe toaga mai, sa tatalo ma le onosai Tuafafine Dudka mo lona toalua ma faamalosiauina e toe foi mai i le lotu. Pe tusa ma le afa tausaga talu ona toe foi mai o ia i le lotu, ae toe foi mai lona toalua.
“O tatalo a lo’u toalua na aafia ai au,” o le tala lea a Uso Dudka. “Sa ou iloaina o le umia ai o le Perisitua Mekisateko, sa ia te au le tiutetauave e avea ma tagata toaga. Sa ou iloaina a aunoa ma le Atua, e leai se mea ou te mafaia.”
Ina ua toe foi mai le au Dudka i le Ekalesia, sa toe foi o la’ua mafaufauga i sauniga laveai o le malumalu. Sa auai le ulugalii faatasi ma isi o le Au Paia o Aso e Gata Ai o Iukureini e talisapaia le suatiaina o le eleele o le malumalu i le 2007.
“Ina ua mavae le amataga o le fausiaina o le malumalu, ma te o mai soo lava tau lava ina vaavaai i le galuega sa faia,” o le tala lea a Uso Dudka.
“Sa matua ou oso i luga ina ua ou vaaia i latou o tuuina ifo le ulua’i maa,” na faaopoopo mai ai Tuafafine Dudka.
Ina ua faatuina le faatagata o le agelu o Moronae i le tumutumu o le malumalu, sa anoanoai ni feopoa’iga ma loimata o le Au Paia aemaise lava i le au Dudka.
“Ina ua mae’a le fausiaina o le malumalu, sa i ai le mafanafana aua sa ma iloaina ua ma agavaa e ulufale i ai,” o le tala lea a Uso Dudka.
Fai mai le au Dudka, o le faamauina i le malumalu na fausia ai ia i la’ua se vaaiga malosi atu o le faavavau i le olaga. “Ua e malamalama o lou aiga ua le na o oe ma lau tane—o lea ua avea nei le Alii ma se vaega,” o le tala lea a Tuafafine Dudka. “Ua tilotilo atu le tasi i le isi i mata o le faavavau.”
Mai luga: Asiya ma Nikolai Chemezov na faamauina i le Malumalu o Kyiv Iukureini ina ua mavae aso e tolu talu ona faapaiaina. E faafetai Petr ma Adalina Mikhailenko ua mafai e le tama teine a le la tama, o Masha, ona sagisagi fiafia atu e auai i le malumalu i lona lava nuu. Sa asiasi soo Andrei ma Valentina Dudka i le nofoaga o le malumalu a o fausiaina.
Ata na pueina e Marina Lukach
Luga: atapue mai le faaaloaloga a le aiga o Chemezov; o isi ata na pueina e Chad E. Phares