O Se Molimau Mautinoa
O lo’u ola ae i se aiga e malolosi o le Au Paia o Aso e Gata Ai, ou te manatu ai sa ou ola a’e ua i ai se molimau. Ou te lei masalomia moni lava le moni o le talalelei. E faapei o le tele o talavou, e i ai lava taimi ou te fesiliga ai ni mea i lo’u mafaufau, ae ou te lei lagonaina lava faapea e le’i moni le Ekalesia.
O le faatuatua lenei sa musuia ai a’u e auauna i se misiona. Sa ou iloaina e tatau ona ou auauna atu. Peitai e ui lava ina leai ni o’u masalosaloga matuia e uiga i le Ekalesia, ae sa ou iloaina e tatau ona maua sa’u lava molimau.
Sa amata la’u misiona ia Fepuari 1961, ina ua ou tuua le taumalulu o le Aai o Sate Leki mo le vevela o le taumafanafana o Atenitina. Sa leai ni aoaoga faamasani o le gagana mo faifeautalai i lena taimi, ae sa folafola mai e lo’u peresitene o le misiona o le a lelei le matou tautala faa-Sipaniolo pe a uma ona faitauina atoa leotele le Tusi a Mamona. Sa ou aoaoina le faa-Sipaniolo a o ou laitiiti ma sa matuai lelei la’u tautala ai i nai vaiaso muamua, ae sa ou mulimuli lava i faatonuga a lo’u peresitene o le misiona.
I le taulaga muamua sa tofi i ai a’u, sa ma nonofo ma la’u soa i le fale i tua o se faleoloa tuai. Sa le mafai ona ma talai i le aoauli i le taimi malolo i Atenitina, o lea sa ou faaaogaina ai lena taimi e tatalo ai ma faitau le Tusi a Mamona i luma o le faitotoa o le faleoloa tuai.
I se tasi aso, i le fiaafe maila mai le fale i luma o lena faleoloa, sa ou tu ai e mafaufau i le mea sa ou faitauina. A e tatalo ma mafaufau loloto i le Tusi a Mamona, e mafai e le Agaga ona uunaia oe. Sa ou mafaufau loloto i le mea sa aoao mai e le Tusi a Mamona, sa ou mafaufau e uiga ia Iosefa Samita o faaliliuina ia papatusi, ma sa ufitia au i se lagona faafuasei. O le taimi lena sa ou iloa ai e moni mea uma sa aoaoina ai au i lo’u olaga atoa. Sa faafuasei ona manino mai ia te au o Iosefa Samita o se perofeta ma o loo ou faitauina le afioga a le Atua. E moni uma lava.
O lena lagona faafuasei sa pei e faauila. Sa ufitia ai lo’u tino atoa mai le ulu e oo i o’u tamatamaivae. E le o se lagona maalili, e le o se lagona mu foi. Ae o se molimau mautinoa.
Ou te lei faagaloina lava lena aso, ma talu mai lena taimi e tele taimi na ou lagonaina ai le Agaga Paia. Ona o lena aafiaga, ua ou iloa ai le Agaga Paia pe a Ia molimau mai ia te au. E le tutusa lena lagona i taimi uma, ae e mafanafana lava ma mautinoa i taimi uma.
E ui ina fetalai patino mai le Agaga ia i tatou, ae o le folafolaga a Moronae e mo tagata uma (tagai Moronae 10:3–5). O le folafolaga a Moronae i le Tusi a Mamona e faapea o le a molimau mai e le Agaga ia te outou le moni o le Tusi a Mamona pe afai o le a outou faitau i ai, suesue, mafaufau loloto, ona tatalo ai lea ma le loto faamaoni. E faatatau lena folafolaga ia te au, ia te oe, ma tagata uma o i le lalolagi. O le a oo mai se molimau mautinoa ia i latou o ē sailia.
Ata na tusia e Keith Larson