Feiloai ia Uso Iosefa

Ua e iloa o Iosefa Samita o le uluai perofeta i nei aso e gata ai, ae pe na e iloaina sa fiafia o ia e ‘ata ma faataliē tagata? po o lo la vaetamaina ma lona toalua o Ema o se masaga? O nai nisi nei o mea atonu e te le o iloaina e uiga i le Perofeta o Iosefa:

Na fanau Iosefa Samita le Itiiti i le aso 23 Tesema, 1805, i Sarona, Veremona, ISA, ma sa faaigoaina i le igoa o lona tama. O uso ma tuafafine o Iosefa, i le faasologa o tausaga, o Alavini, Ailama, Sofaronia, Samuelu Harrison, Efaraima, Viliamu, Katerina, Don Kalosi, ma Lusi.
Ina ua fitu tausaga o Iosefa, sa maua o ia i le fiva taifoi. Sa toe malosi mai o ia i le fiva, ae ua fula ai lona vae. E iva fasi ponaivi na aveesea mai ai e aunoa ma se vai faagase (vai e taofi ai le tiga). Sa savali o ia ma si faavaesi’i teisi i aso uma na totoe o lona ola.¹
Sa 14 tausaga o Iosefa ina ua faatoa tatalo leotele ma vaai ai i le Tama Faalelagi ma Iesu Keriso (tagai Talafaasolopito—Iosefa Samita 1:17).
Na maliu le uso matua o Iosefa, o Alavini, ina ua 17 tausaga o Iosefa. Toetoe a atoa le 13 tausaga mulimuli ane ae vaai Iosefa ia Alavini i se faaaliga vaaia o le malo selesitila (tagai MF&F 137:5–7).
Sa lei taliaina Iosefa e Isaac Hale, le tamā o Ema, ma sa lei manao e faaipoipo i la’ua. Sa tonu ia Iosefa ma Ema e sosola ma sa faaipoipo ai i le aso 18 Ianuari, 1827.²
Sa faaipoipo Ema ma Iosefa mo le 17 tausaga ma e toa 11 le la fanau, e toa 6 na maliliu a o laiti.
Ina ua ta’e lona nifo i le taimi na osofaia ai o ia e tagata leaga i le 1832, sa fai si faaletonu o le faaleoga o upu a Iosefa pe a tautala.³
Sa fiafia Iosefa e taalo i taaloga. O na taaloga sa aofia ai le taalo i le polo, piiga, tau’aigā polo kiona, fagotaga, ma le tosogā fasilaau.⁴
Sa faamatala e se uluai Au Paia o Aso e Gata Ai le leo o Iosefa e pei “o faititili o le Lagi.”⁵
O Iosefa sa malosi ma umi, pe tusa ma le 6′2″ (1.9 m) ma o lona mamafa e tusa ma le 200 pauna (91 kg).⁶
O Iosefa sa le gata o le Peresitene o le Ekalesia, ae sa tauva foi mo le peresitene o le Iunaite Setete.⁷
Ina ua mavae le faamaturoina o Iosefa, sa tusia e Elder Ioane Teila (1808–87), i le taimi lea o i ai i le Korama a Aposetolo e Toasefululua, e faatatau ia te ia, “O Iosefa Samita, le Perofeta ma le Tagatavaai a le Alii, e tele atu mea na ia faia, vagana ai lava Iesu, mo le faaolataga o tagata i lenei lalolagi, nai lo se isi lava tagata na ola ai” (MF&F 135:3).