O Le Faailoga Lenei ia te Outou
“E oo i perofeta uma o e sa vavalo talu mai le amataga o le lalolagi—sa latou lei tautatala tetele pe itiiti mai ea e uiga i nei mea?” (Mosaea 13:33).
O le Kerisimasi o se taimi e faatumulia i le faanaunauga—faanaunauga i meaalofa, o meaai lelei, ma faafiafiaga. O nisi taimi e foliga mai e uumi tele ona faatalitali i aso muamua e 24 o le Kerisimasi. Mafaufau la pe afai e te faatalitali mo le 1,000 tausaga!
O le uluai Kerisimasi—le soifua mai o le Faaola—sa valoia mo le fiaselau o tausaga, mai ia Isaia i le Feagaiga Tuai e oo mai ia Samuelu le sa Lamana i le Tusi a Mamona. Sa silafia e perofeta anamua ma sa faatalitali i faailoga o le afio mai o Keriso, ma sa latou faatalitali ma le onosai mo na faailoga. Sa latou valoia Lona afio mai ina ia mafai ai e isi ona iloa ia faailoga ma latou olioli ai i le iloa na afio mai o Ia! O le faataunuuga o na valoaga o se molimau lea i Lona valaauga paia o le Faaola ma le Togiola.
Faitau ia valoaga nei i le soifua mai o Iesu Keriso ma tulaga faavavega e faatatau i ai ma aoao ai i le ala na faataunuuina ai nei valoaga.
Fanau mai ia Maria, o se Taupou
Valoaga: E fituselau tausaga a o lei fanau mai o ia, sa valoia ai Maria o le a avea ma tina o Keriso. Na tusia e Isaia, “E tuuina mai e le Alii lava le faailoga ia te outou; Faauta, e to le taupou ma fanau mai se tama tane, na te faaigoa foi ia te ia o Emanuelu!” (Isaia 7:14).
Sa faailoa foi e Alema le Itiiti ia Maria o le tina o le Faaola pe tusa o le 80 tausaga a o lei fanau mai Iesu ma mai le isi afa o le lalolagi le va ma Isaia: “O le a fanau mai o ia ia Maria, … ona o ia o se taupou, o se ipu pele ma filifilia, o lē o le a faamalumaluina ma to i le mana o le Agaga Paia, ma fanau mai se atalii, ioe, o le Alo lava o le Atua” (Alema 7:10).
Faataunuuga: E valusefulu tausaga mulimuli ane, ae faaali le agelu o Kaperielu “i se taupou na faufautane i le tagata e igoa ia Iosefa, …o Maria foi le igoa o le taupou” (Luka 1:27). O Maria le tina o Iesu, o le Alo o le Atua.
Ua Fanau mai mo i Tatou se Tama
Valoaga: Sa valoia e Isaia le fanau mai o le Mesia: “Aua ua fanau mai mo i tatou le tama, ua foaiina mai mo i tatou le atalii: e i lona ua le malo, e igoa foi o ia, o le Silisili Ese, o le Faipule, O le Atua malosi, O le Tama o le Faavavau, O le Alii o le Filemu”(Isaia 9:6).
Faataunuuga: Na faataunuuina i le misiona a le Faaola mea uma sa valoia e Isaia, ae na fanau mai Keriso i tulaga maualalalo: “Aua o le aso nei ua fanau ai i le aai a Tavita lo outou Faaola, o le Alii ia o Keriso. … e iloa e outou le tama meamea ua aui i le ie, o loo taoto i le fale povi” (Luka 2:11–12).
Fanau mai i Peteleema
Valoaga: Na soifua le perofeta o Mika pe tusa o le taimi lava lea na i ai Isaia. Sa ia valoia le fanau mai o le Alii i le nuu o Peteleema: “A o oe Peteleema Efarata, e itiiti oe i afe o Iuta, a e tupu mai ia te oe mo a’u o lē na te fai ma faipule ia Isaraelu, o lona tupu mai talu mai anamuā lea, talu mai ona po o le vavau lava” (Mika 5:2).
Faataunuuga: E fituselau tausaga mulimuli ane, ae poloaiina e Herota ua ta’u atu e ana tusiupu le mea e mafai ona maua ai le faipule fou: “Ua ia fesili atu ia te i latou po o fea e fanau ai le Keriso. Ona latou fai mai ai lea ia te ia, O Peteleema i Iutaia” (Mataio 2:4–5).
Mai le Fanauga a Tavita
Valoaga: Sa ta’u atu e le Alii ia Ieremia i le ono seneturi a o lei fanau mai le Keriso e faapea o le a sau o Ia i le gafa o Tavita: “O ia ona po, ma lena lava tausaga, ou te faatupuina ai ia Tavita o le La laau amiotonu; e faia foi e ia le faamasinoga ma le amiotonu i le nuu” (Ieremia 33:15).
Faataunuuga: Ua tuuina mai e Mataio ia i tatou le gafa o Keriso, o loo faaalia ai le auala ua tupuga mai ai le Alii mai lena tupu o aso anamua: “O le tusi i le gafa o Iesu Keriso, o le atalii o Tavita, o le atalii ia o Aperaamo. … O lenei, o tupulaga uma e afua mai ai Aperaamo e oo ia Tavita, e sefulu ma le fa ia tupulaga; e afua foi ia Tavita e oo i le tafeaga i Papelonia, e sefulu ma le fa ia tupulaga; e afua foi i le tafeaga i Papelonia e oo i le Keriso, e sefulu ma le fa ia tupulaga” (Mataio 1:1, 17).
Asiasia e Tupu
Valoaga: E ui lava i tulaga maualalalo o Lona soifua mai, ae na tautino mai lava e perofeta o le a o mai tupu e vaai le Keriso: “E o mai Nuu Ese i lou malamalama, o tupu foi e o mai i latou i le pupula o lou alu ae” (Isaia 60:3).
Sa ta’u atu e Samuelu le sa Lamana ia sa Nifae i le lima tausaga a o loma le fanau mai o Keriso e uiga i faailoga o le a faafeao maia Lona afio mai. O se tasi o nei faailoga o le fetu sa mulimuli ai le Au Makoi: “O le a i ai se fetu fou e oso mai, o se ituaiga o fetu tou te lei vaai lava i ai; ma o lea foi o le a avea mo se faailoga ia te outou” (Helamana 14:5).
Faataunuuga: Sa iloa e le Au Makoi le faailoga latou te sailia aua ai lava na latou sailia le faataunuuga o valoaga. Ua latou faapea mai, “Po o fea o i ai le ua fanau mai o le Tupu o tagata Iutaia? Aua ua matou vaaia lona fetu i sasae, ua matou o mai ai e ifo atu ia te ia” (Mataio 2:2).
I le Lalolagi Fou, sa vaaia foi e sa Nifae ia faailoga ma sa latou iloaina ua faataunuuina ia valoaga: “Ma ua faataunuuina, ioe, mea uma lava, o mea auiliili taitasi, e tusa ma upu a perofeta. Ma sa oo ina oso mai se fetu fou, e tusa ma le upu” (3 Nifae 1:20–21).
Mafaufau i le tele o lou olioli pe a e tatalaina au meaalofa o le Kerisimasi. E faapefea ona e faatusaina pe afai sa e faatalitali mo faailoga o le soifua mai o Keriso seia iu lava ina vaaia ua faataunuuina? Ua leva ona saunia e lo tatou Tama Faalelagi nei faailoga e le gata ia olioli faatasi ai le au faatuatua i le lalolagi atoa i le soifua mai o Lona Alo, ae ia molimauina ai foi le valaauga paia o Keriso.
O Le Soifua mai o le Faaola, saunia e Gustave Doré
O Le Au Makoi o Loo Taialaina e le Fetu, saunia e Gustave Doré