Bakit Kailangan Natin ang Aklat ni Mormon

Paglalarawan ni Bryan Beach; video capture © 2001 IRI

Maaari kayong tanungin ng ilang tao kung bakit kailangan natin ang Aklat ni Mormon samantalang mayroon na tayong Biblia. Katunayan, nagpatotoo si Jesucristo na mangyayari ito (tingnan sa 2 Nephi 29:3). Maraming dahilan kung bakit mahalaga ang Aklat ni Mormon sa ating panahon (halimbawa, tingnan sa 2 Nephi 29:7–11). Narito ang ilang dahilan kung bakit ito mahalaga.

Isa Pang Saksi ni Jesucristo

Ipinakikita sa atin ng mga banal na kasulatan ang huwaran sa paggamit ng maramihang saksi para maitatag ang katotohanan sa Simbahan ni Cristo. Ang Aklat ni Mormon ay pumapangalawa sa Biblia sa pagsaksi sa katotohanan ni Cristo. Sinabi minsan ni Elder Mark E. Petersen (1900–84) ng Korum ng Labindalawang Apostol, “Ang pangunahing dahilan kaya tayo may Aklat ni Mormon ay, sa bibig ng dalawa o tatlong saksi mapapatunayan ang lahat ng bagay. (Tingnan sa II Cor. 13:1.) Mayroon tayong Biblia; mayroon din tayong Aklat ni Mormon. Sila ang bumubuo sa dalawang tinig—dalawang aklat ng banal na kasulatan—mula sa dalawang lubhang magkahiwalay na sinaunang mga tao, na kapwa nagpapatotoo sa kabanalan ng Panginoong Jesucristo.”¹ Idinagdag pa ni Pangulong Ezra Taft Benson (1899–1994), “Hindi natin dapat kalimutan na ang Panginoon mismo ang nagbigay ng Aklat ni Mormon bilang pangunahin Niyang saksi.”²

Ang Kabuuan ng Ebanghelyo

Alam natin na may “malilinaw at mahahalagang bagay … na inalis” sa Biblia sa paglipas ng panahon (1 Nephi 13:40). Nililinaw ng Aklat ni Mormon ang doktrina ni Cristo at inihahatid muli ang kabuuan ng ebanghelyo sa lupa (tingnan sa 1 Nephi 13:38–41). Halimbawa, tinutulungan tayo ng Aklat ni Mormon na malaman na ang binyag ay kailangang isagawa sa pamamagitan ng paglulubog sa tubig (tingnan sa 3 Nephi 11:26) at na hindi kailangang binyagan ang maliliit na bata (tingnan sa Moroni 8:4–26).

Pinakamahalaga sa Ipinanumbalik na Simbahan

Nagpatotoo si Joseph Smith na ang Aklat ni Mormon “ang saligang bato ng ating relihiyon.”³ Yamang alam natin ito, mukhang hindi lamang nagkataon na Ang Simbahan ni Jesucristo ng mga Banal sa mga Huling Araw ay itinatag noong Abril 6, 1830, 11 araw lamang matapos unang lumabas ang Aklat ni Mormon na mabibili ng publiko noong Marso 26, 1830. Ang Simbahan ay hindi itinatag hangga’t wala ang saligang banal na kasulatan nito sa mga miyembro.

Isang Pagpapala sa Ating Buhay

Tungkol sa Aklat ni Mormon, itinuro ni Joseph Smith na, “ang isang tao ay malalapit sa Diyos sa pamamagitan ng pagsunod sa mga tuntunin nito, nang higit kaysa sa pamamagitan ng alin mang aklat.”⁴ May kapangyarihan itong baguhin ang mga buhay—pati na ang sa inyo at sa mga binabahaginan ninyo ng Aklat ni Mormon. Pinatotohanan ni Pangulong Henry B. Eyring, Unang Tagapayo sa Unang Panguluhan na, “Talagang may epekto ang Aklat ni Mormon sa inyong pagkatao, lakas, at katapangan na maging saksi ng Diyos. Ang doktrina at magigiting na halimbawa sa aklat na iyon ay magpapasigla, gagabay, at magpapalakas ng inyong loob. … Ang mapanalanging pag-aaral ng Aklat ni Mormon ay magpapatatag ng pananampalataya sa Diyos Ama, sa Kanyang Pinakamamahal na Anak, at sa Kanyang ebanghelyo. Patatatagin nito ang inyong pananampalataya sa mga propeta ng Diyos, noon at ngayon. … Mas ilalapit kayo nito sa Diyos kaysa anupamang ibang aklat. Patitinuin nito ang buhay.”⁵

Mga Tala

1. Mark E. Petersen, “Evidence of Things Not Seen,” Ensign, Mayo 1978, 63.

2. The Teachings of Ezra Taft Benson (1988), 204.

3. Joseph Smith, sa pambungad sa Aklat ni Mormon.

4. Joseph Smith, sa pambungad sa Aklat ni Mormon.

5. Henry B. Eyring, “Isang Saksi,” Liahona, Nob. 2011, 69–70.

Dalawang Saksi

“Ang Biblia ay isang saksi ni Jesucristo; isa pang saksi ang Aklat ni Mormon. Bakit napakahalaga ng pangalawang saksing ito? Maaaring makatulong ang sumusunod na paglalarawan: Ilang tuwid na linya ang maiguguhit ninyo mula sa iisang tuldok sa papel? Ang sagot ay walang katapusan. Sandaling ipagpalagay na ang iisang tuldok ay kumakatawan sa Biblia at na daan-daan sa mga tuwid na linyang iginuhit patawid ng tuldok na iyon ay kumakatawan sa iba’t ibang interpretasyon ng Biblia at bawat isa sa mga interpretasyong iyon ay kumakatawan sa ibang simbahan.

“Gayunman, ano ang mangyayari kung sa papel na iyon ay may isa pang tuldok na kumakatawan sa Aklat ni Mormon? Ilang tuwid na linya ang maiguguhit ninyo sa pagitan ng dalawang tuldok na ito: ang Biblia at ang Aklat ni Mormon? Isa lang. Isang interpretasyon lang ng mga doktrina ni Cristo ang mamamayani sa patotoo ng dalawang saksing ito.

“Muli’t muli ang Aklat ni Mormon ang saksing nagpapatibay, naglilinaw, [nagbibigkis sa] mga doktrinang itinuro sa Biblia.”

Elder Tad R. Callister ng Panguluhan ng Pitumpu, “Ang Aklat ni Mormon—Isang Aklat mula sa Diyos,” Liahona, Nob. 2011, 75.

Sumali sa Usapan

Sa buong buwan ng Abril pag-aaralan ninyo ang Apostasiya at Panunumbalik sa mga klase ninyo sa priesthood quorum at Young Women at Sunday School (kung ang inyong ward o branch ay mayroon ng bagong mga aralin sa inyong wika). Ang paglabas ng Aklat ni Mormon ay mahalagang bahagi ng Panunumbalik. Matapos basahin ang artikulong ito, pag-isipan kung paano naiba ang inyong buhay dahil nasa inyo ang Aklat ni Mormon. Maisusulat ninyo sa journal ang inyong damdamin at isiping ibahagi ang mga ito sa iba sa pamamagitan ng pagpapatotoo sa bahay, sa simbahan, o sa social media.

Mga Araling Pang-Linggo

Ang Paksa sa Buwang Ito: Ang Apostasiya at ang Panunumbalik