Mga Hakbang Tungo sa Kaligayahan

Ni Elder D. Todd Christofferson

Ng Korum ng Labindalawang Apostol

Mula sa isang mensaheng ibinigay sa mga kabataan sa Salta, Argentina, noong Nobyembre 2011.

Ang mga utos ay hindi ibinigay para maghigpit kundi para gawing posible ang tunay nating hinahangad at ang nais para sa atin ng ating Ama sa Langit, na nagmamahal sa atin.

Paglalarawan ni David Habben; paglalarawan ni Robert Casey © IRI

Kung minsan, may ilang taong nalilito, na iniisip na ang mga kautusan ay paghihigpit o mga sagabal na nagpapagulo sa buhay, na nag-aalis ng mga pagkakataon o kaligayahan o kasiyahan sa buhay. Ang totoo, pinoprotektahan at ginagabayan tayo ng mga kautusan tungo sa kaligayahan. Ang mga ito ay hindi paghihigpit kundi para gawing posible—para makamtan natin sa buhay na ito at sa kabilang-buhay—ang tunay nating hinahangad at ang nais para sa atin ng ating Ama sa Langit, na nagmamahal sa atin.

Ang mga ito ay parang mga baitang ng hagdanan. Bawat hakbang ay maaaring kumatawan sa isang kautusan, at sa bawat kautusang sinusunod natin, makakaakyat tayo. Pagkatapos, kung nauunawaan natin ang diwa ng mga kautusan, hihingi pa tayo ng iba. Hindi tayo naghihinanakit hinggil sa mga kautusan; humihingi pa tayo ng iba para lalo tayong umunlad. At nagbibigay ang Ama sa Langit na nagmamahal sa atin ayon sa ating mga hangarin. Kung hangad natin ito, bibigyan Niya tayo ng iba pang mga kautusan para mapadali ang ating pag-unlad.

Kaya, mga kabataan, huwag sana kayong magreklamo tungkol sa mga kautusan. Huwag sabihing, “Ayaw ko nang maragdagan iyan,” sa halip ay sabihing, “Sige pa, sige pa. Gusto kong umunlad. Gusto kong lumigaya. Gusto kong maging katulad ng aking Ama sa Langit. At ipinapakita sa akin ng mga kautusan kung paano gawin ito. Inaakay ako ng mga ito tungo sa pag-unlad at pinoprotektahan din ako mula sa masama at sa mga bagay na sumisira sa kaligayahan—at kung minsan ay pinoprotektahan din nito ang buhay mismo.”

Umaasa ako na kumbinsido kayo. Dapat nating gawin ang lahat ng bagay na kailangan para masunod ang mga kautusan, kahit tila nag-iisa tayo sa paggawa nito.

Para sa dagdag na impormasyon tungkol sa paksang ito, tingnan sa Thomas S. Monson, “Ang Pagsunod ay Nagdudulot ng mga Pagpapala,” Liahona, Mayo 2013, 89; at L. Tom Perry, “Ang Pagsunod sa Batas ay Kalayaan,” Liahona, Mayo 2013, 86.

Sumali sa Usapan

Sa buong Setyembre pag-aaralan ninyo ang mga kautusan sa inyong mga priesthood quorum at mga klase sa Young Women at Sunday School. Maaari ninyong isipin ang ilang utos na madalas mahirapan ang mga kaedad ninyo na sundin. Anong mga pagpapala ang natanggap na ninyo at ng iba sa pagsunod sa mga kautusang iyon? Magmungkahi ng mga paraan na mapapatotohanan ninyo ang mga pagpapalang iyon sa mga tao sa inyong paligid, at sundin ang Espiritu para malaman kung ano ang sasabihin at kailan ito sasabihin. Maaari ninyong isadula ang ilang halimbawa sa isang family home evening o ibahagi ang inyong patotoo sa isang lesson sa Sunday School.

Mga Araling Pang-Linggo

Paksa sa Buwang Ito: Ang mga Kautusan