ការអញ្ជើញព្រះអង្គសង្គ្រោះឲ្យយាងចូលមក
« មើល យើងឈរនៅមាត់ទ្វារទាំងគោះ បើអ្នកណាឮសំឡេងយើង ហើយបើកទ្វារឲ្យ នោះយើងនឹងចូលទៅឯអ្នកនោះ » ( វិវរណៈ 3:20 ) ។
កាលពីខ្ញុំនៅក្មេង ពេលបុណ្យគ្រីស្ទម៉ាស ម្ដាយរបស់ខ្ញុំបានដាក់តាំងរូបភាពព្រះអង្គសង្គ្រោះគោះទ្វារ ។ យើងពុំទាន់ជាសមាជិកសាសនាចក្រនៅឡើយទេ ហើយខ្ញុំតែងសួរថា « ហេតុអ្វីព្រះយេស៊ូវគោះទ្វារ ? » តើអ្នកណានៅក្នុងផ្ទះនោះ ? »
ប៉ុន្មានឆ្នាំក្រោយមក ខ្ញុំបានរកឃើញថា គ្មានដៃទ្វារនៅខាងក្រៅលើទ្វារដែលព្រះអង្គសង្គ្រោះបានគោះឡើយ ។ បុគ្គលដែលនៅខាងក្នុងត្រូវបើកទ្វារនោះ ។ ឥឡូវនេះខ្ញុំដឹងថាអ្នកដែលនៅទ្វារម្ខាងទៀតជានរណាហើយ ។ គឺយើងទាំងអស់គ្នា ! ព្រះអង្គសង្គ្រោះកំពុងគោះទ្វារ ហើយយើងទាំងអស់គ្នាត្រូវបើកទ្វារ ហើយអញ្ជើញទ្រង់ឲ្យយាងចូលមកក្នុងជីវិតរបស់យើង ។
ពេលខ្ញុំនៅវ័យជំទង់ ខ្ញុំបានសម្រេចចិត្តអញ្ជើញព្រះអង្គសង្គ្រោះមកក្នុងជីវិតរបស់ខ្ញុំ ដោយការជ្រមុជទឹក ហើយក្លាយជាសមាជិកសាសនាចក្រនេះ ។ មិត្តខ្ញុំបានធ្វើជាគំរូល្អដល់ខ្ញុំ ។ រួមទាំងជីដូនរបស់ខ្ញុំផងដែរ ។ គាត់ជាអ្នកធ្វើការក្នុងព្រះវិហារបរិសុទ្ធឡូស អេនជេឡេស កាលីហ្វ័រញ៉ា ។ គាត់បានចេញពីផ្ទះនៅម៉ោង 4:00 ព្រឹក ដើម្បីទៅបម្រើព្រះអម្ចាស់នៅក្នុងព្រះវិហារបរិសុទ្ធ ។
គ្រាន់តែរយៈពេលពីរឆ្នាំបន្ទាប់ពីខ្ញុំបានជ្រមុជទឹក ខ្ញុំបានសម្រេចចិត្តថា ខ្ញុំចង់បម្រើព្រះអម្ចាស់ជាអ្នកផ្សព្វផ្សាយសាសនាពេញម៉ោង ។ ក្នុងបេសកកម្មរបស់ខ្ញុំ ខ្ញុំបានជួយមនុស្សជាច្រើនឲ្យរៀនពីព្រះអង្គសង្គ្រោះ ដើម្បីពួកគេអាចអញ្ជើញទ្រង់មកក្នុងជីវិតរបស់ពួកគេ ។
ក្រោយមក ខ្ញុំបានបម្រើជាប្រធានបេសកកម្មក្នុងប្រទេសសាម័រ ។ ខ្ញុំតែងសួរដល់ពួកអ្នកផ្សព្វផ្សាយសាសនាថ្មីថា តើពួកគេបានសម្រេចចិត្តបម្រើបេសកកម្មតាំងពីពេលណា ។ មានពួកគេជាច្រើនបាននិយាយថា ពួកគេបានសម្រេចចិត្តធ្វើការបម្រើតាំងពីពួកគេនៅថ្នាក់កុមារ !
ថ្នាក់កុមារនឹងជួយអ្នករៀបចំខ្លួនសម្រាប់ការបម្រើជាអ្នកផ្សព្វផ្សាយសាសនា ។ សូមរៀនឲ្យបានច្រើនតាមដែលអ្នកអាចធ្វើបាន ។ ដាក់គោលដៅមួយ ដើម្បីបម្រើបេសកកម្ម ។ បន្ទាប់មកអ្នកក៏នឹងអាចជួយដល់មនុស្សដទៃទៀត ឲ្យអញ្ជើញព្រះអង្គសង្គ្រោះមកក្នុងជីវិតពួកគេបានផងដែរ ។ ការធ្វើជាអ្នកផ្សព្វផ្សាយសាសនានឹងផ្លាស់ប្ដូរជីវិតរបស់អ្នក—វាបានផ្លាស់ជីវិតរបស់ខ្ញុំ ។
រចនាដោយ ចេននីហ្វឺរ តុលមែន