Oras para sa Banal na Kasulatan

Pinagaling ni Jesus ang Isang Ketongin

Ni Erin Sanderson

Ang awtor ay naninirahan sa Utah, USA.

Sabay-sabay na pag-aralan ang Bagong Tipan sa taong ito!

Mag-isip ng isang pagkakataon na maysakit ka. Mayroon bang gumawa ng kabutihan sa iyo para bumuti ang iyong pakiramdam?

Sa Bagong Tipan mababasa natin kung paano nagpakita ng kabaitan si Jesus sa mga taong maysakit. Isang araw isang lalaking may sakit sa balat na tinatawag na ketong ang nagpunta kay Jesus. Alam niya na may kapangyarihan si Jesus na pagalingin ang lahat ng taong maysakit. Naniwala siya na mapapagaling siya ni Jesus. Hinipo ni Jesus ang ketongin at sinabing, “Luminis ka” (Marcos 1:41). Pagkasabing-pagkasabi niyon ni Jesus, gumaling ang lalaki.

Masusundan natin ang mga yapak ni Jesus sa pagiging mabait at mapagmahal sa iba pang maysakit o nalulungkot.

Alamin Pa ang Iba: Ang mga Evangelio

Ang Bagong Tipan ay may apat na espesyal na aklat na tinatawag na mga Evangelio, na isinulat ng ilan sa mga disipulo ni Jesus. Inilalahad ng Mga Evangelio ang panahon na nabuhay si Jesucristo sa lupa. Ang kuwento tungkol sa pagpapagaling sa ketongin ay nasa tatlo sa mga Evangelio. Ito ay nasa Marcos 1:40–42 at maging sa Mateo 8:2–4 at sa Lucas 5:12–14.

Mga Ideya na Pag-uusapan ng Pamilya

Magagamit mo ang mga larawang may kaugnayan sa banal na kasulatan sa pahina 74 para isalaysay ang kuwento mula sa Marcos 1:40–42. Pagkatapos ay maaari mong basahin ang Judas 1:22 at planuhin kung paano gagawin ang isang bagay bilang pamilya para makagawa ng kaibhan sa buhay ng isang tao. Siguro maaari mong paglingkuran nang lihim ang isang tao!

Awitin: “Ang mga K’wento kay Jesus,” (Aklat ng mga Awit Pambata, 36)

Mga Banal na Kasulatan: Marcos 1:40–42

Mga Video: Magpunta sa Biblevideos.org para mapanood ang “Jesus Heals a Lame Man on the Sabbath” at “Jesus Heals a Man Born Blind.”

Pagsunod sa mga Yapak ni Jesus

Kasama ang inyong pamilya, magdula-dulaan kung paano ka magpapakita ng pagmamahal sa iba sa mga sitwasyong ito. Mag-isip ng sarili mong mga sitwasyon!

• May bagong lipat na pamilya sa inyong lugar.

• Tinatakot ng ilang bata ang isa pang bata sa paaralan.

• Isang bisita na walang kakilala sa simbahan ang dumalo sa Primary.

• Walang makalaro ang nakababata mong kapatid.

• Umiiyak ang sanggol, at naghahanda ng hapunan ang nanay mo.

• May sakit ang isang miyembro sa inyong ward o branch at hindi siya makaalis ng bahay.

Scripture Tip: Paghahanap sa salita

Sa Marcos 1:41 ang salitang pagkaawa ang ginamit. Kung minsan may malalalim na salita sa Biblia na maaaring hindi mo nauunawaan. Kapag may nakita kang salita na hindi mo maunawaan, maaari mong gamitin ang Gabay sa mga Banal na Kasulatan para matulungan ka! Halimbawa, maaari mong hanapin ang “Awa, Maawain” para malaman kung ano ang ibig sabihin nito at para mahanap ang iba pang mga talata sa banal na kasulatan na gumamit nito. Ano pang ibang mga salita ang maaari mong hanapin sa kuwento tungkol sa pagpapagaling ni Jesus sa lalaking may ketong?