Oras para sa Banal na Kasulatan

Ang Mabuting Pastol

Ni Erin Sanderson

Ang awtor ay naninirahan sa Utah, USA.

Sabay-sabay na pag-aralan ang Bagong Tipan sa taong ito!

Isang araw isinalaysay ni Jesus ang isang kuwento (o talinghaga) tungkol sa isang pastol na lubos na minahal ang kanyang mga tupa kaya handa siyang ibuwis ang kanyang buhay para protektahan ang mga ito. Tulad tayo ng mga tupa sa kuwentong iyan. At ang pastol ay tulad ng ating Tagapagligtas na si Jesucristo. Tinatawag Siya kung minsan na Mabuting Pastol.

Ipinakita ni Jesus ang Kanyang pagmamahal nang dalhin ng ilang magulang ang kanilang mga anak upang makita Siya. Sabi Niya, “Pabayaan ninyong magsilapit sa akin ang maliliit na bata, at huwag ninyo silang pagbawalan: sapagka’t sa mga ganito nauukol ang kaharian ng Dios” (Lucas 18:16). Pagkatapos ay kinarga Niya sila at binasbasan.

Pumikit at isipin kunwari na karga kayo ng Tagapagligtas at binabasbasan kayo. Madarama ninyo ang Kanyang pagmamahal kapag nakilala o inisip ninyo Siya. Tinutulungan kayo ng Espiritu Santo na madama ang pagmamahal ng Mabuting Pastol na si Jesucristo.

Alamin ang Iba Pa

pabayaan—hayaan o payagan

huwag ninyo silang pagbawalan—huwag silang pigilan

Pag-uusap ng Pamilya

Basahin ang Juan 10:1–5, 11–16. Pagkatapos ay ilista ang mga paraan na si Jesus ay tulad ng isang pastol at ikuwento ang mga pagkakataon na nadama ninyo ang pagmamahal ng Tagapagligtas.

Awit: “Ako ay Nagninilay Tuwing Mababasa,” (Aklat ng mga Awit Pambata, 35)

Mga Banal na Kasulatan: Lucas 18:15–17; Juan 10:1–5, 11–16

Mga Video: “Suffer the Little Children to Come Unto Me” at “Jesus Teaches That We Must Become as Little Children” (Biblevideos.org)

Ang Ating Mabuting Pastol

Tanggalin ang larawang ito. Itupi ito na parang pamaypay na sinusundan ang mga puting linya. Pagkatapos ay ibuka ito at tingnan ito mula sa kanan at mula sa kaliwa. Paano ninyo nadarama ang pagmamahal ng ating Mabuting Pastol?

Tip sa Banal na Kasulatan

Hanapin sa “Ebanghelyo, Mga” sa Gabay sa mga Banal na Kasulatan ang isang tsart na nagpapakita kung aling mga aklat ang nagsasalaysay tungkol sa bawat kaganapan o turo. Ang aklat lamang ni Juan ang nagsasalaysay tungkol sa Mabuting Pastol. Ang tatlong aklat—Mateo, Marcos, at Lucas—ay nagsasalaysay tungkol sa pagbabasbas ni Jesus sa mga bata.

Mga paglalarawan ni Phyllis Luch (kaliwa) at Paul Mann (kanan)