Atili Lelei le Faitau i Aso Uma
E alala le tusitala i Iuta, ISA.
Sa susue e Iosefa le itulau i lana tusi. Na faauu o ia. Toe lua ana itulau ona uma lea.
“O a mai oe?” O le fesili lea a mama.
“Ou te fiafia e faitau,” o le tala lea a Iosefa. “Ae e gese tele. E faapefea ona aoao ia atili lelei la’u faitau?”
“E i ai so’u manatu,” o le tala lea a Tina. “Faitau se mataupu o le Tusi a Mamona i aso uma. O le a fesoasoani e atili lelei ai lau faitau.”
Na taumafai Iosefa. I le taimi muamua sa umi se taimi. Sa tatau ona ia faaleoina upu uumi. Ae sa ia faitau i aso uma. E lei leva ae mafai ona ia faitaua le sili atu ma le tasi le mataupu.
Na mavae atu vaiaso e lua. Sa sii atu le faailogatusi a Iosefa mai le 1 Nifae i le 2 Nifae. Ona oo lea i le tusi a Iakopo!
I se tasi po ua oo le faasologa ia Iosefa e faia le lesona i le afiafi faaleaiga.
“Ua ou iloa le mea e fai!” Sa mafaufau ai Iosefa. Sa ia aumaia le tusi o Tala o le Tusi a Mamona. E i ai upu ma ata. Na susueina itulau seia oo ina ia maua le tala tonu lava.
Sa faitau e Iosefa le tala i lona aiga. Sa ia faitauina upu puupuu, e pei o le vaa. Sa ia faitauina upu uumi e pei o le poloaiina. Ua leva ona tusia e Perofeta nei upu. Sa faigofie ona faitau ia upu.
Ina ua uma le tala, sa loimata mata o Mama.
“O a mai oe, Mama?” O le fesili lea a Iosefa.
“Ioe,” na fai atu ai Mama. “Ua ou fiafia. Sa e galue malosi.”
Sa faaali atu e Iosefa se ataata tele.
“O loo ou faitau i aso uma, e pei lava ona e fai mai ai.” Sa ia faaali atu ia Mama lana Tusi a Mamona. Sa i ai lana faailogatusi i le tusi a Alema!
E i ai se aso o le a i ai le faailogatusi a Iosefa i le faaiuga o le tusi. Ona mafai foi lea ona ia toe amataina!