Sailia o Lo’u Ala i Puao o le Pogisa

Juventa Vezzani, Kalefonia, ISA

illustration of a book of scriptures on a table by a window

I ni nai tausaga i tua sa ou feagai ai ma se vaitau e sili ona pogisa o lo’u olaga. Sa ou feagai ma le tele o luitau faigata, ma sa ou lagona le faanoanoa ma le lofituina i avega mamafa.

I le lotu i se tasi Aso Sa, sa ou tilotilo solo ai i aiga fiafia uma o usuina viiga ma tofoina le alofa o le Atua. Sa ou manao e faapena o’u lagona, ae sa i ai se mea na ou lagonaina faaletino e sese.

Sa ou lagonaina le Agaga i le taimi ua tuanai, ae sa le mafai ona ou lagonaina mo sina taimi. Faapei i le miti a Liae i le laau o le ola, sa ou lagonaina e pei sa matuai siomia a’u e puao o le pogisa—sa le mafai ona ou vaai i le laau (tagai i le 1 Nifae 8:2–24).

Ina ua amata tatalo o le faamanatuga, sa ou moeiini ma aapa atu i le Tama Faalelagi, ma aioi atu mo se faamautinoaga o Lona alofa. Sa ou fesili atu ia te Ia pe aisea na le mafai ai ona ou tofo i le fua o le laau o le ola.

A o ou mafaufau loloto i le miti a Liae, sa ou maua se malamalama ootia. “Aisea na ou le manatuaina ai lenei mea muamua?” Sa ou mafaufau ai. O le malaga i puao o le pogisa o se vaega atoa o le fuafuaga masani a le Atua. Na te faatagaina i tatou e fetaia’i ai ma faigata mai lea taimi i lea taimi ina ia mafai ai ona tatou matuai faalagolago atoa ia te Ia ma Lona Alo. O le ki o le pipiimau i le ai uamea. Sa ou vaaia pea lava au i puao o le pogisa, ae sa i ai lo’u faamoemoe.

Ina ua tuua e lenei lagona lo’u mafaufau, sa ou lagonaina se faamautinoaga matagofie mai le Agaga Paia o le a mou atu o’u tofotofoga. Na molimau mai le Agaga sa i ai le Tama Faalelagi iina. Sa ou soloia loimata mai o’u mata, ma faafetai ona sa mafai ona ou toe lagonaina le Agaga.

Sa amata ona ou faatofuina a’u lava i tusitusiga paia. Ae sa tele pea ni o’u aso pogisa, ae sa ou faatuatua afai ou te pipiimau i le ai uamea—le afioga a le Atua (tagai i le 1 Nifae 11:25)—o le a faasaolotoina a’u mai puao o le pogisa. Ou te le mautinoa po o le a le umi na alu ai, e i ai se aso sa mafai ai ona ou toe tofo i le alofa o le Atua. Sa pei o le la susulu mafanafana ina ua mavae se taumalulu umi.

A o ou tauivi ma luitau o le olaga, sa ou manatuaina la’u folafolaga ia pipiimau lelei i le ai u’amea e ala i le suesue o tusitusiga paia ma upu a perofeta. Ou te iloa a oo mai puao o le pogisa, ua i ai a’u meafaigaluega e mafai ai ona ou asaina ma le folafolaga o se talileleia i le isi itu.