O La Tatou Avanoa
Mauaina o La’u Asoa a Tamaitai Talavou
Luga i le itu tauagavale ma le taumatau: ata na tusia e David Malan
Ua ou matua fiafia lava ina ua maua lo’u taui o le Aloaiaina o le tulaga Faatamaitai Talavou. Ou te mitamita e fai atu, sa ou tausia au lava ia atoatoa ma mama ma e mafai ona ou ulaina la’u asoa ma le mitamita. “O le ava amio lelei, o ai ea se ua maua? e silisili lona tau i penina.” (Faataoto 31:10).
E matagofie tele le faalapotopotoga a Tamaitai Talavou. E fesoasoani ia alualu i luma ia tamaitai talavou ma saunia i latou lava mo se faaipoipoga i le malumalu paia. Ou te faafetai i lo’u Tama Faalelagi mo lenei faalapotopotoga. E ala i le mauaina o la’u asoa, ua ou faamaeaina ai se tasi o sini sa ou faatuina mo lo’u olaga, ma ou te iloa e mafai ona ou faaauau pea ona faia mea lelei e tele i le galuega a le Alii.
Katherine Moreno, Venesuela
O a Tatou Taleni e mafai Ona Faia le Lalolagi o se Nofoaga e Sili Atu Ona Lelei
Faatasi ai ma le fesoasoani a lo’u tina ma lo’u uso, sa ou valiina ai se fu’a mo taaloga a le Aualofa na faia i la matou siteki. Sa fautuaina atu a’u e lo’u tina i le peresitene o le Aualofa a le matou siteki, lea na talosagaina au e fai le latou fu’a mo i latou. Sa ou taliaina la latou talosaga ma amata ona faia na o ni faataitaiga. E ala i a’u taumafaiga tuufaatasi ma lo’u aiga, sa mafai ai ona matou fatuina se galuega matagofie o faatufugaga e aumai ai le autu, “Saili Le Faatausala ma le Olioli i le Tulaga Faatina.” ma le Olioli i le tulaga Faatamaitai.”
Ou te iloa afai tatou te faaaogaina a tatou taleni e auauna atu ai i isi tagata, e le gata ina tatou avatu ai le fiafia ia i latou ae faapea foi ona atinae ai o tatou lava tomai. E faamanuiaina e le Alii i latou o e faaaogaina a latou meaalofa mai ia te Ia e fausia ai Lona malo. Pei ona aoao mai le faataoto i taleni, afai tatou te le faasoaina a tatou meaalofa i isi, tatou le toe maua na meaalofa (tagai i le Mataio 25:24–29). Ae afai tatou te faaaogaina a tatou taleni mo le lelei, e mafai ona e faia le lalolagi o se nofoaga e sili atu ona lelei.
Vanessa Pamittan, Filipaina
O Le A Se Mea e Mafai Ona e Aoaoina mai le Tiute i le Atua
Toaaga e auai i gaoioiga o loo i le Faataunuuina o Lo’u Tiute i le Atua e manaomia ai lou loto atoa, o le faapaiaga, malosi, ma sili atu nai lo soo se mea, o le faatuatua. E moni lava e musuia le tiute i le Atua.
A o talavou, e mafai ona e aoao ai mea ofoofogia e mafai ona e faaaogaina i lou olaga atoa e ala i le faamaeaina o le sini i le Tiute i le Atua: faaleagaga, faaleolaga nei, faaletino, ma le tele o isi.
E mafai ona ou fai atu, e matua aoga ai lava le taumafaiga ina ia tuuto oe lava i le faamaeaina o nei sini. Ua ou aoao e avea ma se tagata sili atu ona lelei, ua faatupulaia la’u molimau o le talalelei a Iesu Keriso, ma ua sili atu ona ou saunia au lava ia maua le Perisitua Mekisateko. E faamalieina lava le iloa o le a mafai ona avea a’u ma se faataitaiga lelei i la’u fanau i le lumanai i se aso ona ua ou ausia lenei sini matagofie, ma le taua.
Jonathan Argüello, Venesuela
Sa Sili Atu se Misiona nai lo le Mea na Faamoemoeina
Luga i le itu tauagavale ma le taumatau: ata na tusia e David Malan
A o talavou, sa ou tulimatai atu i le aso ou te auauna atu ai o se faifeautalai faamisiona. Ina ua ou ulufale atu i le galuega faamisiona, sa ou iloaina o le galuega faafaifeautalai e le o le mea lea sa ou faamoemoeina—sa sili atu ona lelei. Sa faigata atu nai lo le mea sa ou manatu ai, ae o le faamalieina na oo mai i le faia o le mea na poloaiina ai au e le Alii sa le mafaamatalaina.
Ou te lei iloaina muamua le olioli i le fesoasoani atu i se tasi e alu i le lotu. Ou te lei lagonaina muamua le fiafia i le faalogo atu i se tasi o fai mai, “Ioe, susu mai i totonu” ina ia mafai ona latou faalogo i le talalelei toefuataiina. Ou te lei lagonaina muamua le moni o le mana lea na oo mai ao ma tautino atu le salamo. Ou te lei tatalo muamua ma se loto faamaoni. E lei i ai se taimi muamua na vave ai ona alu le itula o suesuega o tusitusiga paia. Ou te lei iloa muamua so’u tagi i le iloaina o o’u le atoatoa. Ou te lei iloa muamua le faatafunaga e oo mai i upu, “Ia lua Susuga, faamolemole aua lua te o mai i lo‘u fale.” Ou te lei iloa se taimi muamua na pei ai o le tele o lo’u limamatua se mafo’e o lo’u vae. E lei i ai se taimi muamua na ou lagonaina ai lo’u puipuia. E lei i ai se taimi muamua na ou lagonaina ai le tele o lo’u tiutetauave mo a’u amioga, aua na ou tauaveina le suafa o “Iesu Keriso” i lo’u fatafata.
E lei i ai se taimi muamua na ou matua latalata ai i lo’u Tama Faalelagi ina ua ou i ai i la’u misiona talai.
Nahuel Cabranes, Peru