O Tatou Aiga, O Tatou Auaiga
O Lo tatou Puipuiga Sili mai Ponokalafi
O le tusitala e alaala i Uosigitone, ISA.
I se tasi o fuaiupu o se mau, sa ou maua ai le ki i le taumamao ese mai ata ua tuusao mai ia ua foliga mai ua i mea uma.
Sa ma faatau mo ofu a’oga ma la’u tama tama e iva tausaga ina ua suia le ma talanoaga mai se talatalanoaga faasamasamanoa i se fesili e sili ona matuia. “Mama, aisea latou te tuu ai la mea i faamalama o faleoloa uma?”
“La mea” na faasino o ia i ata e le talafeagai sa faaali i faamalama e toetoe o faleoloa uma sa ma ui atu ai. E ui lava o ata faapea sa i ai lava iina, ae sa le tele so’u ano i ai muamua. Ae o le mea moni ua amata ona ano i ai la’u tama matua, o lea na fagua ai a’u. I le aluga o vaiaso na sosoo ai, sa amata ona ou vaai i nei ata i soo se mea: i le televise, i le faleoloa, i faleaiga, i faasalalauga na oo mai i le meli. Sa le mafai ona aveesea mai ia te au. O nisi ata sa matua iloagofie ma sa amata ai ona ou lagona le faaletonu, ma sa amata ona tuputupu ae i lo’u loto se lagona faaosofia. E faapefea ona ou puipuia lo’u aiga mai mailei o ponokalafi?
O konafesi aoao uma tatou te faalogo ai i lapataiga e uiga i lona aafiaga faataumaoi, ma ua tatou iloa e ua aafia ai. Sa matou muai faia faaeteetega uma i le fale i la matou komepiuta ma alafaasalalau sa matou faaaogaina iina, ae ua manino lava, sei vagana ua matua tavavaeese a tatou fanau, e foliga mai e leai se auala e matua aloese ai mai le vaai i ata e le manaomia ia e ono taitai atu ai i le fia iloa atili. Pe mata e mafai i le autilo a la’u tama i le faleoloa ona liliu atu i se tauiviga i le olaga atoa ma ponokalafi? Na tuputupu ae lo’u popole i le aluga o lenei faafitauli, ma sa amata ona ou maua se lagona o le leai o se faamoemoe ma le le gafataulimaina o le puipuiga o la’u fanau.
Faamatalaga mai le Laau o le Ola, saunia e Kazuto Uota.
Ona oo lea i se tasi aso a o ou faitau i le Tusi a Mamona, sa faafuasei ona ou maua se faamautinoaga i le 1 Nifae 15. O loo faamalamalama ai e Nifae le faaaliga a Liae o le laau o le ola ia Lamana ma Lemuelu ina ua la fesili atu i le uiga o le vaitafe. Ua tali atu Nifae i le fuaiupu 27: “Ma sa ou fai atu ia te i latou o le vai lea sa vaai i ai lo’u tamā o le eleelea lea; ma sa matua tele lava le tofatumoanaina o lona mafaufau i isi mea sa lē iloa atu ai e ia le eleelea o le vai” (faaopoopo le faamamafa). Sa taulai atu le mafaufau o Liae i le laau o le ola ma le aveina atu o lona aiga ia aai i ona fua! Na te le i vaai atu lava i le eleelea ona o le mea na ia taulai i ai.
O le tali lena! O le le aumaia o ala faasalalau e le talafeagai i lo tatou fale o se amataga lea, ae o se taumafaiga e sili ona tuusao ma le faautauta e aoao a tatou fanau i le talalelei, o le mea lea e sili ona puipuia ai mai soo se mea e ono mafai ona taitaiese atu ai i latou.
Ona o lenei aafiaga i tusitusiga paia, na tonu ai ia i ma’ua ma lo’u toalua o le a toe faaluaina a ma taumafaiga i le aoaoina o la ma fanau ma o le a taulai atu la ma vaai i le alofa o le Atua nai lo mea eleelea i le lalolagi. Na uunaia i ma’ua e taulai atu i itu eseese e tolu*:
1. Faateleina a matou lava suesuega patino o tusitusiga paia ma faaitiitia le “pisa” i lo matou siomaga. Faapei o Liae, e tatau ona faatumulia o matou mafaufau i mea lelei ina ia lagonaina ia uunaiga a le Agaga ma tausisi atu ai le taulai i le taulaina o lo matou aiga i le talalelei. Sa ma taumafai ma lo’u toalua e faaalu e le aunoa taimi e talanoa ai e uiga i mea e manaomia faaleagaga e tagata taitoatasi i le aiga ma pe mafai faapefea ona foia na manaoga ma fatufatuina se fale e mafai ona olaola ai le Agaga.
2. Faia o suesuega o tusitusiga paia sili atu ona anoa. E ui lava e manaomia ai le tele o taumafaiga i le na ona faapotopoto o le aiga faatasi i aso uma e faitau tusitusiga paia, ae ua ma taumafai ia tele atu le talanoaina pe a matou faitaua tusitusiga paia. E fai se eseesega tele o le matutua o le ma fanau, o lea matou te faitaua ai tusitusiga paia ma tamaiti laiti i se taimi mulimuli ane o le aso, ae o tamaiti matutua i le taeao po a o momoe le au laiti, ina ia le tele ai se faalavelave ma tele avanoa e talanoaina ai. E toetoe o aso taitasi uma e i ai lava se talanoaga o mea fou e tutupu e o faatasi ma mau matou te faitauina.
O le tele o taeao e mamao lava mai se mea e mananao ai, ae o le faapalepale ua iloa ai e faalogologo lava tamaiti ma auai mai, e ui o nisi taimi e tele naua ni taumafaiga e tuufaatasia ai tagata uma.
3. Faia o le galuega faafaifeautalai. Pe a tatou molimau atu, e molimau le Agaga o le mea o loo tatou fai atu ai e moni, ma e tuputupu ae ai a tatou molimau. Ua matou taumafai e faia le galuega faafaifeautalai o se mataupu faaleaiga. Matou te talanoa e uiga i le faasoa atu o le talalelei, ma e matou te valaaulia e le aunoa ia uo i lo matou fale. Matou te faaaogaina foi avanoa uma e aumai ai faifeautalai ma tagata sailiili mo se talanoaga faaletalalelei. Sa matagofie ni o matou aafiaga ma tagata fou o le Ekalesia ma tagata sailiili i lo matou fale, ma ua i ai se uunaiga i le ma fanau a o latou tomanatu i a latou lava molimau ma faalogologo atu i molimau a na faifeautalai.
Ou te matua faafetai lava mo le Tusi a Mamona ma le ala faavavega o se fuaiupu se tasi o tusitusiga paia na tuuina mai ia te au se faamautinoaga ma se faatonuga manino mo lo matou aiga. O tusitusiga paia e mafai ona suia moni le fefe ma le leai o se faamoemoe i le mana ma le toafilemu.