Agai i Luma
Ua e mafaufau e uiga i le mea o e agai atu i ai ma le mea e te manao e i’u i ai? O le autu o le Mutuale mo le 2016 2 Nifae 31:20, ma o lenei fuaiupu e tasi ua avatu ai ia te oe ni manatu se fitu o le fautuaga e uiga i le itu e te agai i ai i le olaga. O le a e maua ai le taitaiga, o mea e fai, uiga faaalia, aoaoga, ua poloaiina ai faalelagi ma le taui folafolaina mo au taumafaiga. Sei o tatou vaavaai i ni upu autu i lenei fuaiupu.
Ina ia fetaomi atu i luma ua ta’u mai ai e manaomia ona e faia se taumafaiga moni e faasagatau ai i ni nai malosiaga tetee. E tatau ona tatou tuuina atu le malosi e ola ai i le talalelei aua o loo siomia i tatou i se lalolagi tetee i poloaiga a le Atua.
Pe o e mausali ea ia Keriso? Pe o e mausali ea i lou faamaoni ia te Ia?
Afai e te “tumau ia te Ia” (tagai i le Ioane 15:4) ma mulimuli i Ana aoaoga, o lona uiga o loo e mausali moni ma o le a oo moni mai lava ou faamanuiaga.
E faateleina lou faamoemoe ma le alofa i le Atua ma tagata pe a e malamalama ma lagonaina e oe lava le alofa o le Atua. O lenei malamalama e tuputupu ae a o e taumafa fiafia i afioga a Keriso, o lona uiga, pe a e faaaogaina ma le faamoemoe moni ia afioga a Keriso i lou olaga patino.
Ma o le mea mulimuli, e tatau ona e tumau! Pe o se mea ea e nenefu ma faigata? O le mea moni, ina ia tumau e mafai ai ona faauigaina o le faaauau pea ona e faia mea lelei o loo e faia i le talalelei—ia faifai pea au taumafaiga e agai i luma. Pe a e i ai pea ma le mausali i le ala o le talalelei, o loo e tumau.
Pe aoga ea? IOE! E finagalo lo tatou Tama alofa oi le Lagi ia i tatou e toe foi atu ia te Ia, ia maua le ola e faavavau faatasi ma Ia aua Na te silafia o iina o le a tatou maua ai le fiafiaga moni tumau ma le olioli i luga atu o le mea ua mafai nei ona tatou mafaufau i ai. O le mafuaaga lea i le 2 Nifae 31:20, na Ia faamatalaina manino mai ai ma le patino le mea e tatau ona fai ina ia toe foi atu ai ia te Ia. E mafai ona tatou faia lenei mea i Lana fesoasoani. Na te saunia pea lava le ala mo i tatou e fai ai le mea ua Ia poloaiina.