Savali a le Au Peresitene Sili
O Le Fiafia mo i Latou Tatou Te Alolofa I Ai
Saunia e Peresitene Henry B. Eyring
Fesoasoani Muamua i le Au Peresitene Sili
O i tatou uma e mananao i le fiafia mo i latou tatou te alolofa i ai, ma e tatou te mananao foi ia laitiiti lava se tiga mo i latou pe a mafai. A o tatou faitau i tala o le fiafia—ma le tiga—i le Tusi a Mamona, e gaepu a’e o tatou loto pe a tatou mafaufau i e pele ia i tatou. O se tala moni lenei o se taimi o le fiafia:
“Ma sa oo ina leai se finauga i le laueleele, ona o le alofa o le Atua sa mau i loto o tagata.
“Ma sa leai se mataua, po o ni feeseeseaiga, po o ni faanunununu, po o ni faitaaga, po o ni pepelo, po o ni fasiotiga tagata, po o soo se mea faamataaitu; ma e moni e le mafai ona i ai o ni tagata e sili atu ona fiafia i totonu o tagata uma na foafoa e le aao o le Atua.”
Ona tatou faitau ai lea:
“Ma sa faamanuiaina tele lava i latou! Aua sa faamanuiaina i latou e le Alii ia latou mea uma na fai; ioe, sa faamanuiaina lava ma faauluolaina i latou seia oo ina mavae atu le selau ma le sefulu o tausaga; ma sa oo ina mavae atu le tupulaga muamua mai ia Keriso, ma sa leai se finauga i le laueleele atoa” (4 Nifae 1:15–16, 18).
E tatalo ia soo alolofa o Keriso ma galulue mo se faamanuiaga mo isi ma mo i latou lava. Mai tala o le Tusi a Mamona ma, mo le toatele o i tatou, mai o tatou lava aafiaga, ua tatou iloa o le meaalofa o le fiafia e mafai ona maua. Ua tatou iloa ua matai makaina lelei lava le ala i le fiafia. Ua tatou iloa foi o le faatumauina o le fiafia e le faigofie, sei vagana ua, faapei o sa Nifae ina ua mavae le asiasiga a le Faaola, sa nofo ai “le alofa o le Atua” i o matou loto.
O lena alofa sa i loto o sa Nifae ona sa latou tausia le tulafono lea ma mafai ai. O se aotelega o lena tulafono o loo maua i tatalo o le faamanatuga, lea e amata i se aioiga faamomoiloto i lo tatou Tama Faalelagi alofa. Tatou te tatalo ma se loto e tumu i le faatuatua i le, ma faatasi ai ma se alofa loloto mo lo tatou Faaola patino. Tatou te tautino atu ma le loto e ave i o tatou luga Lona suafa, ia manatua o Ia, ma tausi Ana poloaiga uma. Ma le mea mulimuli, tatou te faaaoga le faatuatua i le Agaga Paia, o le sui lona tolu o le Aiga Atua, ia mafai ona faatasi ma i tatou, molimau atu i o tatou loto i le Tama ma Lona Alo Pele. (Tagai i le MF&F 20:77, 79.)
Faatasi ai ma le mafutaga a le Agaga Paia, e mafai ona suia o tatou loto ina ia tatou mananao ma faaulufale mai le alofa o lo tatou Tama Faalelagi ma le Alii o Iesu Keriso. E faigofie lava le ala e maua ai le alofa o le Atua i o tatou loto e pei foi o le auala e le maua ai lena alofa i o tatou loto. Mo se faataitaiga, e mafai e se tasi ona filifili e le tatalo soo i le Tama Faalelagi pe le totogiina se sefuluai atoa pe taofi le taumamafa i afioga a le Atua pe le amanaiaina e matitiva ma e le tagolima.
Soo se filifiliga e le tausia o poloaiga a le Alii e mafai ona aluese ai le Agaga mai o tatou loto. O le le faia o na mea, e tuuitiitia ai le fiafia.
O le fiafia lea tatou te mananao ai mo e pele ia i tatou, e faalagolago i a latou filifiliga. Po o le a le tele o lo tatou alolofa i se tamaitiiti, se tagata sailiili, po o a tatou uo, e le mafai ona tatou faamalosia i latou e tausi poloaiga ina ia latou agavaa mo le Agaga Paia e pa’i atu ma suia o latou loto.
O lea, o le fesoasoani sili ona lelei e mafai ona tatou tuuina atu o soo se mea e taitai atu ai i latou o e tatou te alolofa i ai ina ia mataituina a latou lava filifiliga. Na faia ai e Alema i se valaaulia e mafai ona e ofoina atu:
“Ia outou faamaualalalo outou lava i luma o le Alii, ma valaau atu i lona suafa paia, ma mataala ma tatalo e lē aunoa, ina ia lē faaosoosoina outou i luga atu o le mea e mafai ona outou lavatia, ma faapea ona taitaiina ai outou e le Agaga Paia, ma lotomaualalalo ai, agamalu, agamalolo, onosai, tumu i le alofa ma le tali-tiga atoa;
“O le faatuatua i le Alii; ua i ai se faamoemoe o le a outou maua le ola e faavavau; ua i ai le alofa o le Atua e le aunoa i o outou loto, ina ia mafai ona sii a’e outou i luga i le aso mulimuli ma ulu atu i lona malologa” (Alema 13:28–29).
Ou te tatalo ia talia e i latou e te alofa i ai se valaaulia musuia e filifili le ala i le fiafia tumau.