Ua E Iloa e Moni!

Henry (Hank) Brown, Iuta, ISA

Ata na tusia e Allen Garns

I se tasi aso a o ou faigaluega i se faleoloa i Oakland, Kalefonia, ISA, sa tu mai se uo ma valaaulia a’u e fai aiga i le afiafi. Fai mai e i ai ni faifeautalai Mamona se toalua o le a matou faatasi ai.

Ina ua uma le meaai o le afiafi sa faatulaga e faifeautalai se tamai laupapa ie mamoe ma amata ona fesili mai ia te au. Sa oo ina ou tau le fiafia. Sa na ona ou manao lava e faalogologo ia i la’ua ona ou alu lea.

Peitai i le faaiuga o le talanoaga, sa toso mai le nofoa o se faifeautalai talavou mai Iuta, tilotilo mai i o’u mata, ma tuu mai ia te a’u se Tusi a Mamona ma tuu mai lana molimau. Fai mai a ia na te iloa e moni le Ekalesia ma e mafai foi ona ou iloa e ala i le faitauina o le tusi. Ona ia sii maia lea o le Moronae 10:4 ma fai mai afai ou te ole atu i le Atua ma le loto faamaoni, o le a Ia faaali maia le moni o le tusi ia te au e ala i le mana o le Agaga Paia.

Sa ou faitaua ni nai mataupu i le vaiaso, ma sa matou toe feiloai foi i le fale o la’u uo. Ina ua uma le matou talanoaga lona tolu, sa maea le misiona a le faifeautalai mai Iuta ma agai ina toe foi i le fale.

Sa faaauau pea ona ou faitau ma tatalo i po taitasi, fesili atu pe sa moni le tusi. Ina ua maea le tatalo i se tasi po, sa ou alu i lo’u moega ma faitau ai nisi mataupu. Na faafuasei lava ona ou faalogoina se siufofoga o ta’u mai ni upu faigofie se lima: “Ua e iloa e moni!”

Ou te le’i faalogo muamua i le Agaga o tautala mai ia e au. Ae na ou iloaina sa silafia au e le Atua ma e alofa ia te au. Sa lofituina au ma sa le mafai ona taofi o’u loimata. Sa ou iloaina e tatau ona ou auai i le Ekalesia moni a Iesu Keriso. Sa ou malamalama ai foi i le ala na mafai ai e le faifeautalai mai Iuta ona fai mai sa ia iloa e moni le Ekalesia.

Sa ou auai i le Ekalesia ma mulimuli ane faaipoipo i se tamaitai talavou lalelei i le Malumalu o Oakland Kalefonia. E toavalu le ma fanau ma sa matou nonofo i Kalefonia mo le 33 tausaga a e matou te lei masii atu i Iuta.

Ina ua mavae ni tausaga talu ai, sa sauniuni le ma afafine laitiiti e alu i lana misiona, sa fesili mai pe ua ou taumafai e faafesootai le faifeautalai talavou sa aoaoina au.

“E tele tausaga sa ou mafaufau ai ia te ia,” sa ou tali atu ai, “peitai ou te le iloa pe faapefea ona faafesootai o ia.”

I totonu o le 10 minute na toe foi mai ma fai mai, “O lana numera telefoni lea.”

Ina ua ou maua o ia, sa umi se ma talanoaga. Sa ia fesili mai mo la’u imeli ia ia mafai ai ona “ia faamatala mai le mea ua oo i ai lona olaga.” I lana i-meli i le aso na sosoo ai, sa ia fai mai ua silia ma le 40 tausaga e lei toe avea o ia ma se tagata o le Ekalesia ma sa ia faamoemoe ou te le o fiafia ai.

“E faapefea ona ou le fiafia?” Sa ou imeli vave atu ia te ia. “Na e suia lo’u olaga!”

Sa ma feimelia’i atili ma ioe ai o le a ma feiloai. E lei umi ae ou tietie atu i lona fale, lea sa ia valaaulia ai a’u i totonu ma faafeiloai atu au i lona toalua. A o ma talanoa e uiga i o ma olaga i le taimi ua fano, sa ou fesili atu ia te ia pe o i ai sana Tusi a Mamona. Sa alu o ia i le fogafale i luga ma toe foi mai ma se kopi. Sa ou tago i le tusi, ma tilotilo atu i ona mata, ma toe tuu atu i ai le tusi ia te ia: “Ou te iloa e moni lenei tusi! Afai e te faitauina le Moronae 10:4 ma tatalo e uiga i ai, e mafai foi ona e maua se molimau e uiga i lona moni.”

I masina na sosoo ai, sa ia faitau, tatalo, ma salamo. E lei umi ae toe papatisoina o ia e lona atalii ua 18 tausaga le matua, ma sa ou maua le faamanuiaga e faamauina o ia.

Ou te iloa na musuia lo’u afafine e fai mai lana fesili, ma ou te iloa sa saunia e le Tama Faalelagi i ma’ua e toalua mo se toetuufaatasiga o le 45-tausaga. Sa ou aoaoina le mana o le Tusi a Mamona. Ua ou aoao foi ia aua lava nei ou fiu i se tagata sa toe aluese mai le Ekalesia.