Sau, Mulimuli Mai ia te A’u: Aoao Atu Aoaoga Faavae Autu i le Fale
Vaega 1
E alaala tusitala i Iuta, ISA.
O mataupu aoaoina o le Aso Sa mo le autalavou—Sau, Mulimuli Mai ia te A’u—o loo aoao mai ai aoaoga faavae autu o le talalelei i masina taitasi. O nisi nei o auala e aoao ai i na mataupu faavae faatasi ma lou aiga.
A o nonofo i lalo i le afiafi faaleaiga, e amata e le tina i le fesili atu i lana fanau e toalua, “O Anafea na e lagonaina ai le taialaina e le Agaga?”
Sa tomumu lana tama teine e 17 tausaga le matua, “Ua tolu a’u lesona e uiga i le Agaga i le masina lenei.
“Lelei, o lona uiga o le a tele ni mea e te faasoa maia,” o le tali atu lea a lona tama. Sa leai se pisa a o faatalitali ma le onosai ia Tina ma Tama a o mafaufau le la fanau e uiga i le fesili.
Mulimuli ane, na faasoa mai e lo la atalii e 14 tausaga se aafiaga mai le aoga i lena aso.
“Ioe,” le tali a lona tina, “ua faamanatu mai ai ia te au ia Nifae sa mulimuli i le Agaga ina ua ia le iloa pe faapefea ona maua mai papatusi mai ia Lapana.”
Sa faasoa mai e lana tama teine lona mulimuli i se uunaiga e talanoa i se teineitiiti sa nofo na o ia i le pasi. Sa viia e lona tama lana faaiuga ma faamatala atu sona aafiaga i le galuega.
Na faaiu le talanoga i le usuina o le “Agaga e Taitai Mai” (Viiga, nu. 78).
O se metotia faigofie o le aoao atu—fefaasoaai o aafiaga e uiga i lenei aoaoga faavae—na manuia ai lenei afiafi faaleaiga.
O lenei tusiga ua tuu mai ai faataitaiga o le olaga moni i le ala na aoao ai e tagata ia mataupu faavae i mataupu aoaoina a le autalavou i Aso Sa, ia o loo faatulagaina i masina. O le mea moni, o nei faataitaiga ua le na o le pau ia o ni auala e aoao ai e uiga i nei aoaoga faavae. E mafai ona e sailia musumusuga mo manaoga o lou aiga.
Ianuari O Le Aiga Atua
O tamalii o le aiga o le Atua—Tama Faalelagi, Iesu Keriso, ma le Agaga Paia—e tolu peresona mavaevae, ae e tasi i le faamoemoe ma le mamalu.
Sa faamatala mai e se tasi o tamaitai talavou le aoaoina e uiga i le aiga Atua: “E taua ia te au e lo’u Tama Faalelagi, o lo’u Faaola ma le Agaga Paia o ni Tamalii eseese e mafai ona ou iloaina taitasi ae mulimuli ai i le lotogatasi. Ua ou iloa ai ma le lotofaafetai e mafai ona avea au e faapei o le Atua ona o le Aiga Atua e le o se mea e le o maioio ma lavelave ae o Tamalii e alolofa, faamanuia, taiala, ma silafiaina au.”
Ina ia aoao atu lenei aoaoga faavae, e mafai ona e taumafai e talanoaina ia fesili e pei o le, “O a mea e mafai ona tatou aoaoina mai le Aiga aua e uiga i le galulue faatasi i le lotogatasi?” po o le “E mafai faapefea ona tatou faamalolosia la tatou sootaga ma tamalii o le Aiga Atua?”
O le faatusatusaina o le Ioane 10:30 ma le Mataupu Faavae ma Feagaiga 50:43 e mafai ona uunaia ai talanoaga lelei ma maua ai malamalamaaga e uiga i le lotogatasi.
Fepuari O Le Ata o le Faaolataga
O le ata o le faaolataga e tali ai le tele o fesili faavae a tagata, e pei o le “O ai au?” ma le “O le a le faamoemoega o le olaga?” O le faia o a tatou lava fesili ma saili mo tali e mafai ona avea o se ala mamana e aoao ai e uiga i le fuafuaga ole fiafia a le Tama.
Mo se faataitaiga, na amata e se tasi alii talavou lana suesuega o tusitusiga paia e ala i le fesili, “E faapefea ona faatusatusa ia uiga faaleatua o le Atua i o’u uiga ile muai olaga?” o o’u uiga o loo i ai nei? o o’u uiga i le ou faamoemoe ia maua i le isi olaga?” Na ia tusia i lalo ia tali i nei fesili a o ia sueina i tusitusiga paia ma faaaoga e aoao atu ai i isi e uiga i le ata o le faaolataga.
O a ni fesili a lau fanau e uiga i le ata o le faaolataga?
Mati O Le Togiola a Iesu Keriso
E faapefea ona tatou aoao ai e le gata o le Togiola a Iesu Keriso ae faapea foi o lo tatou Faaola faamaoni ma faamoemoe o le a tatou faaaogaina Lana Togiola i o tatou olaga?
Talu ai ua tatou oo uma i le tuuatoatasi, faia mea sese, ma manaomia le malosi, e manaomia e i tatou uma ona malamalama atili ma faaaoga le Togiola. Se faaaoga e se faufautua o Tamaitai Talavou se vitio e fesoasoani ai ia malamalama atili lana vasega i le Togiola a le Faaola.
O se aafiaga lea a se tasi tamaitai talavou:
“Sa matou matamata i le ‘Ua leai se Tasi Na i ai ia te Ia’ (vitio, LDS.org). A o iliina e se fagufagu se tasi o fatuga faanoanoa, sa saunoa mai Elder Jeffrey R. Holland o le Korama a Aposetolo e Toasefululua e faapea, ‘O se tasi o faamafanafanaga tele o lenei vaitau o le Eseta o le savalia e Iesu o se ala umi na matuai tuua toatasi, tatou te le tau faia lena mea.’
“Sa ou lagonaina le maasiasi i le manaomia ai le Togiola a le Faaola, ae o le faatofuina i le Agaga, sa ou lagonaina le faamoemoe i Lana Togiola o liligi ifo ai lo’u lagona o le tausalaina. Na tuuina mai e le Alii Lona soifua atoa mo au; Sa lei faanoanoa ai o Ia, e faapena foi au.”
Ona o le Togiola o le mea taualuga lea o lo tatou faaolataga, e tatau ona tatou aoao atu ma aoao e uiga i ai faatasi ma le taitaiga a le Agaga Paia. Atonu foi o le a tata’i oe e talanoaina ia tusitusiga paia po o le molimau faaaposetolo e pei “O Le Keriso Soifua: O Le Molimau a le Au Aposetolo” (Liahona, Apr. 2000, 2). Mafaufau e talanoaina se fesili e pei o le, “O anafea na e lagonaina ai le faamalologa, faamalolosia, po o le mana togiola o le Togiola?”
Aperila Tisipenisione, Liliuese, ma le Toefuataiga
Faatusa o ipu © moodboard/Thinkstock
O le malamalama i le liliuese—o se pa’ū ese mai le talalelei moni—e fesoasoani tatou te malamalama ai i le manaomia o se toefuataiga o le talalelei, o le perisitua, ma o le Ekalesia a Iesu Keriso.
Sa fesoasoani le lesona faatino lenei i ni faifeautalai e aoao ai se tagata sailiili e uiga i le Liliuese ma le Toefuataiga.
“Sa ma faaaogaina ma la’u soa ni ipu palasitika sa faaigoa i vaega o le Ekalesia moni, ma fausia ai se tafatolu tu a o faamalamalama atu le ala na faavaeina ai e Iesu Keriso Lana Ekalesia.
“Ona faamatala atu lea o le Liliuese a o ma aveesea ia ipu na fai ma sui o le au Aposetolo ma tilotilo atu i le solovi ifo o le fausaga atoa. A o faamatala atu le Toefuataiga o le talalelei e ala i le Perofeta o Iosefa Samita, sa ma toe fausia le olo, faaali atu o le Ekalesia i le taimi nei ua faatulagaina i le ala lava lea na muai faatulaga ai e Keriso.
“Mo le taimi muamua, ua malamalama ai lenei tagata. Na iu ina ia iloa le taua o le Toefuataiga ina ua ia malamalama i le mafuaaga na manaomia ai.”
E tele isi auala e faatusa i le taamilosaga o le tisipenisione, liliuese, ma le toefuataiga. E mafai ona e faitauina ia mau e uiga i nei autu ma mulimuli i uunaiga a le Agaga e fatufatu ai au lava faatusa o mea e te aoaoina (tagai, mo se faataitaiga, Amosa 8:11–12; 1 Nifae 13; MF&F 136:36–38; Mose 5:55–59).
Me Perofeta ma Faaaliga
E popole tele le Alii e uiga i le fesootaiga ma i tatou. Tatou te maua Lana taitaiga i o tatou olaga e ala i faaaliga Na te tuuina patino atu i Ana perofeta ma i tatou.
E tele taimi e mafai ai ona tatou malamalama atili i mataupu faavae o le talalelei pe a tatou faatusatusaina i mea faitino ma aafiaga o le olaga i aso faisoo. Na faamatala e se tamaitai talavou le ala na fesoasoani ai se faatusatusaga na te iloa ai faaaliga:
“Sa ou aoaoina e uiga i le faaaliga e ala i se perofeta o ona po nei. Na saunoa Elder David A. Bednar o le Korama a Aposetolo e Toasefululua i le agaga o faaaliga ma faamatala mai ai e ala i se upu valiata o le malamalama. O nisi taimi, o faaaliga e faafuasei ma manino e pei o le kiina o se moli i se potu pogisa. E sili ona taatele, e oo mai lava ina pei o le oso a’e o le la e oo lava ina malamalama tele. O le tele o taimi, o le tala lea a Elder Bednar, o faaaliga e pei o le malamalama i se aso puaoa. ‘O loo lava le malamalama e te … mafai ai ona vaai ia faia ni nai laa i luma i le puao’ (i le “Mamanu o le Malamalama: Agaga o Faaaliga” [vitio], LDS.org). O lenei upu valiata, e ui ina faigofie, ae sa matua aafia ai lava au aua sa ou iloaina e avanoa mai faaaliga pe a ou tuu atu se taimi e maua ai.”
A o tatou faaalu se taimi e suesue ai upu valiata, faataoto, ma faatusa, e mafai ona faaauau pea ona tuputupu ae lo tatou malamalama i aoaoga faavae. O nei metotia faafaiaoga e fesoasoani tatou te aoao atili ai pe a tatou tuu atu i le Agaga e faaalia mai vaaiga fou ia i tatou.
Iuni Perisitua ma Ki o le Perisitua
O le perisitua o se mataupu taua mo tagata uma. O le mana o le Atua ma e mafai ona faamanuiaina ai i tatou uma. Ua tofu i tatou ma se matafaioi taua e faia i le galuega a le perisitua.
O nisi tagata e le masani ma le tiute, tofi, ma le talafaasolopito o le perisitua. E mafai ona avea se suega ma ala malie e aoao ai manatu nei.
E faalagolago i le mea e te manao e aoao ai, e mafai ona e faaaogaina ai nisi o fesili nei ma fai i lau fanau e saili mo tali i tusitusiga paia ma aoaoga a perofeta o aso nei.
-
O a tofi ma tiute o le Perisitua Arona? o le Perisitua Mekisateko?
-
O a ki o le perisitua? O ai e umiaina? Aisea e tatau ai ona i ai ki?
-
O le a le eseesega i le va o le tofi o le perisitua, pule, ma le mana?
-
E faapefea e le perisitua ona faamanuiaina alii ma tamaitai?
E mafai ona maua tali i tusitaiala e pei o le Mataupu Faavae o le Talalelei (2009) ma le Faamaoni i le Faatuatua: O Se Tusitaiala o le Talalelei (2004), ma i tusitusiga paia e pei o le Mataupu Faavae ma Feagaiga 13, 20, ma le 107.
O le tali i le fesili mulimuli, “Pe faapefea e le perisitua ona faamanuiaina alii ma tamaitai?” e mafai ona maua i tusitusiga paia, ae o le mea aupito sili ona taua i le mafaufau ai pe o faapefea e lenei aoaoga faavae ona aafia ai i tatou lava ia.