O TALI mai Taitai o le Ekalesia
Pe Faapefea ona Fetaomi Atu i Luma
Elder Neil L. Andersen
O le Korama a Aposetolo e Toasefululua
Mai se saunoaga na tuuina atu i le Iunivesite o Polika Iaga–Hawaii i le aso 14 Tesema, 2013.
Faamatalaga mai le Pipiimau, saunia e Liz Lemon Swindle
Fetaomi atu i luma e faatatau i se mea e sili atu nai lo le na o le agaigai i luma. Fetaomi atu e ta’u mai ai o i ai se mea o loo taofiofia ai lou agai i luma ma e tatau ona e tuleia. Ina ia agai i luma i lenei olaga, e tatau ona e fetaomia i autafa ia faaosoosoga, fetaomi atu i faafitauli, fetaomi i lalo o ou vae le masalosalo ma le fefe, ma talileleia ia uiga auau mama paia o le faatuatua, faamoemoe, ma le alofa.
E faapefea ona e faia le fetaomi atu i luma? Na tali Nifae “O le mea lea e tatau ai ona outou fetaomi atu i luma ma le tumau ia Keriso ma se susulu atoatoa o le faamoemoe ma le alofa i le Atua ma tagata uma” (2 Nifae 31:20).
Fetaomi atu i luma ma le tumau ia Keriso o lona uiga o le faatuatua ia te Ia. O lona uiga ia faia o Ia o le taulaiga autu o ou mafaufauga ma amioga. Afai o Ia o loo e mulimuli ai, o le fetaomi atu i luma o le mea sili fou lea.
Fetaomi atu i luma o lona uiga o le tuleia ese “o faaosoosoga ma mea e popole ai” o le lalolagi ma tausia poloaiga ma le atoatoa. “Afai tou te alolofa mai ia te au,” na fetalai ai Iesu, “ia outou tausi mai i a’u poloaiga” (Ioane 14:15).
Ua faaopoopo e Nifae faapea, ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma. E soisoi mai i o tatou luma ma le susulu le faamoemoe. Tatou te maua ai le filemu e oo lava i faigata. O le avea ma soo e mafai ai ona tatou vaai i lo tatou faamoemoega moni i le lalolagi. O na faamoemoega e taulai atu i le fesoasoani i o tatou aiga, o i latou tatou te alolofa i ai, ma i latou o siomia ai i tatou. E aofia ai le fausia o le malo o le Atua, ma a tatou faia, e avea i tatou ma tagata e tatau ona avea ai i tatou.
Ua ta’u mai e Nifae ia i tatou e tatau ona tatou fetaomi atu i luma, ma taumamafa i afioga a Keriso. Ua ia faamatala mai ia i tatou o le meaalofa o le Agaga Paia, e mafai ona tautatala (ma malamalama ai i) le gagana a agelu (tagai i le 2 Nifae 32:2–5). Ua ou iloa lena siufofoga. O se leo e tatau pea lava pea ona tatou saunia e faalogo ai.
A o e fetaomi atu i luma ma le amiotonu, o Iesu Keriso “o le a taitai atu ai outou i le ala” (MF&F 78:18) ma o le a e iloa ma le mautinoa e sili atu o Lona moni ma Lona alofa mo oe. A o e fetaomi atu i luma i le faatuatua, o le a ta’u atu e le Agaga Paia ma faaali atu ia te oe o mea e tatau ona e faia (tagai i le 2 Nifae 32:5).