Seia Tatou Toe Feiloai
O Le Faataoto i le Lulu o le Po
Mai le “Faataoto e Tolu—Le Pi Faavalevalea, Lulu o le Po, ma Lamepa e Lua,” Liahona, Fep. 2003, 36–41.
Sa ou mafaufau loloto i upu a le inisinia ua palapala, ma ua suauua.
Ata © Hemera/Thinkstock, iStock/Thinkstock
I le taimi a o ou aoga i le kolisi, o au o se tasi o se vasega o tamaiti aoga na tofi e faia sailiiliga i tua, o se vaega o le matou kosi i le teolosi. …
E tele aso sa matou i ai i tua i laufanua ona o se galuega patino. … Ina ua lata ina uma le taimi na fuafua mo la matou suesuega, sa matou fetaiai ma se afa matautia, ma sa sosoo mai ai ma le mamafa o le kiona—ae le o se taimi e tatau ai ona toulu, ma e faafuasei foi, ae a matua faateteleina o le a matou punitia i atumauga ma pagatia ai. Na matua faatetele le afa ina ua matou faaifoifo ane i se tafamauga tifato, e mamao ese mai se auala itiiti o nofoaafi lea sa matou faamoemoe e pue ai [se] nofoaafi i lena po e foi atu ai i le fale. Ona o se taumafaiga tele sa matou taunuu ai i le mea e pue ai le nofoaafi aua ua tuneva le po a o agi malosi pea le matagi. …
… O le nofoaafi sa matou faatalitali ma faamoemoe i ai o le Lulu o le Po—o se nofoaafi saoasaoa i le va o taulaga tetele. …
Ua leva ona te’a le vaeluaga o le po ae taunuu mai loa le nofoaafi i le taavilivili o le savili ma le kiona. Sa ou faifai lemu atu i tua o a’u uo a o faataalise atu i luga, ona sa tosina la’u vaai i le inisinia, i lenei malologa puupuu, a o utu e lona fesoasoani le vai, sa pisi solo o ia e vaai le afi, ma faasuauu totoga o le nofoaafi, fetuunai nisi, ma auiliili le siakiina o le afi. Sa ou taumafai e talanoa atu ia te ia, e ui lava ina pisi. Sa ou fesili pe o le a sona lagona i sea ituaiga o po—matautia, uiga ese,ma le matamataita, ina ua foliga mai ua talaia mana o le faatafunaga i le ala ma ua le mataofiofia, ina ua agi malosi le afa ma taufai taufaamatau mai itu uma. …
O lana tali o se lesona e le mafai ona galo. Fa mai a ia, e ui lava ina motumotu mai ana fuaiupu: “Vaai i le moli la e i luga o le afi. Faamata e le malamalama ai le auala i le mamao e selau iata [90 m] pe sili atu foi? Pau lava le mea ou te taumafai e fai o lo’u alu ia maua le selau iata lena o le auala e malamalama. O le mamao lena e mafai ona ou vaaia ma o loo avanoa ma saogalemu lena ogaala. … E mua lava le moli o le masini ia te au!”
Ina ua oso o ia i lona nofoa i le nofoaafi, sa ou faatopetope atu i le vaega pito i luma e nonofo ai le pasese; ma a o ou faapalasi ifo i le nofoa faamalu, ma le fiafia i le mafanafana ma le manaia, ma le iloa lelei o le eseesega o le po matautia i le togavao, sa ou manatunatu loloto i upu a le enisinia toeaina palapala. O ana upu sa tumu i le faatuatua—o le faatuatua e mafai ai mea sili, o le faatuatua e maua ai le lototoa ma le loto tauivi. …
Atonu tatou te le iloa pe o a mea o faatalitali mai o i luma, po o ao ma itula o loo sosoo atu nei. Peitai, o ni nai iata, pe atonu foi o ni nai futu itiiti, o loo manino lava le auala e faigofie foi lo tatou tiute, ua malamalama foi le mea tatou te agai i ai. Mo lena va puupuu, mo le isi laasaga, e faamalamalama e musumusuga mai le Atua, ia agai atu pea!