Pe Na Lava Lo‘u Suesueina?

Angie Nicholas, Texas, ISA

Na ou faitauina ma le faamaoni le Tusi a Mamona i aso taitasi talu ina o o’u talavou. E oo lava i po ou te taoto ifo ai ma le lava i lo’u moega ma le iloa e lei faia la’u faitauga mo le aso, ou te tago ai i ai ma faitau tusa lava pe na o ni nai fuaiupu.

E lua tausaga ua mavae, na talosagaina ai au e faiaoga i le Feagaiga Tuai i le seminare i le vaveao. Sa sili ona ou le masani i le Feagaiga Tuai nai lo se isi tusi o le tusi paia, o lea o nisi aso ou te faaaluina ai ni itula pe tolu i le fa e suesue ai ma sauniuni ia a’u lesona. Aua sa ou faaaluina le tele o le taimi i le suesueina o le Tusi Paia ma faaaliga o aso e gata ai, sa ou tuua ai le faitauina o le Tusi a Mamona i aso uma. Sa matou faitauina o se aiga i le po, ma ou te faaaogaina i nisi taimi ni mau fefaasinoai, o lea sa ou lagona ai ua lava ma totoe a’u suesuega o le talalelei i aso taitasi.

I le ogatotonu o le tausaga aoga ia Ianuari, sa luiina ai e lo’u peresitene o le siteki ia le siteki atoa e faitau se mataupu i le Tusi a Mamona i aso taitasi. E ui ina sa ou tau mafaufau pe faapefea ona ou maua se taimi ona o le mamafa tu o au aoaoga faaseminare, ae sa ou filifili e tatau ona talia le lui. E tatau ona ou faia e le gata e faamalosia ai au lava ia ae faapea foi ona fai ma faataitaiga mo la’u fanau ma tagata o le vasega.

Mai lena taimi sa ou faitau ai se mataupu mai le Tusi a Mamona i aso taitasi a o amata ona ou saunia au lesona o le seminare pe sauni e moe. Sa toe foi mai i lo’u olaga se agaga ma se mana sa ou le i iloaina o misi. O a’u lesona o le seminare, ia sa lelei, ua sili atu ona lelei. O vaega o le Feagaiga Tuai sa faigata ona malamalama ai, ua manino atili. Sa ou iloa foi ua ou malamalama atili i le Tusi a Mamona o se taunuuga o le suesue loloto lea sa ou faia i perofeta ma le tulafono a Mose.

O loo aofia ai le folasaga i le Tusi a Mamona le saunoaga lenei mai le Perofeta o Iosefa Samita: “Na ou tauina atu i le usoga e faapea o le Tusi a Mamona o se tusi silisili ona sa’o i tusi uma lava o i le lalolagi, ma o le maa autu o la tatou ekalesia, ma e sili atu ona latalata le tagata i le Atua e ala i le usitaia o ona mataupu, nai lo se isi lava tusi.”

O le Tusi a Mamona o loo umia faatasi ai vaega uma o le talalelei ma o loo i ai se molimau mamana ia Iesu Keriso ma le ata o le faaolataga. Ua fesoasoani ai e faatauaina isi mea uma i lo’u olaga. Ou te faafetai i le avea ai o le Tusi a Mamona o se vaega o lo’u olaga i aso taitasi.