Sa Ou Iloaina le Afioga a le Atua

José Evanildo Matias Fernandes, São Paulo, Pasila

Ata na tusia e Allen Garns

A o ou i ai i se malaevaalele i ni nai tausaga talu ai i São Paulo, Pasila, sa ou vaai i se faamalama o se faletusi i se tusi e igoa “O Le Tusi a Mamona: O Se Tasi Molimau ia Iesu Keriso.” Sa ou le talitonu o le a taliaina e lo tatou lalolagi ua mate ma leai se faasinoga se tasi molimau ia Iesu Keriso, ma sa ou faaaluina le faaiuga o le vaiaso e mafaufau ai e uiga i le tusi.

Na iu, ina le mafai ona onosaia lo’u fia iloa, ma sa ou toe foi i le faletusi e faatau mai. Ae peitai, ina ua ou taunuu atu, sa le mafai ona ou maua. Sa ou faamatalaina le tusi i le tagata faigaluega o le faleoloa, ae sa fai mai na te le’i vaai lava i ai. Sa le mafai foi ona ia maua se mea o faamaumau ai, e ui o tusi sa faaali i le faamalama ua uma ona faamaumau i le lisi o tusi.

I se taimi mulimuli ane, ao ou i ai i se faletalavai, sa ou matauina ai se tusi i luga o se fata o loo tatala. Ina ua amata ona ou faitau i ai, sa ou aoao ai e uiga i se tagata e igoa ia Korioa na tumau lona masalosalo i le mana o le Atua ma sa iu ina taia ma gugu ai. Ina ua ou toe manatu i upu na ou faitauina, sa ou iloaina o ni upu mai le Atua.

I le taimi lea sa ou saili atu mo se taitaiga faalelagi. I se tasi aso na ou tootuli ma tatalo faatauanau e fesili atu i le Atua e faaali mai ia te au le ala moni e aumaia ai au ia te Ia. I ni nai aso mulimuli ane sa ma’i lo ma atalii, ona ou toe foi lea i le faletalavai. Ina o le a ou aluese mai, sa ulufale atu ni alii talavou Amerika se toatolu e fai a latou pine o igoa. Sa vave ona ou lagonaina se mafanafana i lo’u fatafata, lea na uunaia a’u e talanoa ia i latou.

Sa latou fai mai o loo latou talai le talalelei a Iesu Keriso i Pasila. Sa ou talosaga atu pe mafai ona latou aoao atu ia te au, ma sa faatulagaina se taimi.

Ina ua ou faalogo e uiga i le Perofeta o Iosefa Samita mo le taimi muamua, sa ou iloaina ua tali mai la’u tatalo. Ona tuu mai lea e faifeautalai ia te au se tusi. Sa ou ofo tele, o se Tusi a Mamona—pei lava o lea sa ou vaai i ai i le faleoloa. Sa ou toe lagonaina le mafanafana e suamalie ma o lo’u fiafia tele sa tau le mafai ai ona ou tautala.

Sa faamalamalama mai e faifeautalai le uluai tusi ona fai mai lea ou te tatalo ma ole atu i le Atua pe moni. Ua i ai lava so’u mautinoa atoatoa i le paia o le tusi, aua na faaali mai e le Alii ia te au—faalua. E ui i lea, sa ou suesueina auiliili. Ina ua ou faitauina le mataupu e 17 i le 3 Nifae, sa ou iloa sa i ai se tala e paia aua o loo i ai afioga a Iesu Keriso.

O le faavae o la’u molimau ua i ai lea i le iloaina o le Tusi a Mamona o loo i ai le afioga a le Atua. Na suia ai a’u ma o loo faaauau pea ona suia au.