O Le Mea Tatou Te Talitonu I Ai
Matou te Talitonu i le Faamaoni
E masani lava ona maua fautuaga i tusitusiga paia e “fiafia” ma “ia outou loto tetele.” Ua ta’u mai e le Alii ia i tatou i le 2 Nifae 2:25, “Ua i ai le tagata, ina ia latou maua le olioli.” O le faamoemoega o lenei olaga o le taitai atu ai o i tatou i le olioli na folafola mai e le Alii.
O le fiafia e le faapea o le valea po o le manatu faasamasamaoa i luitau o le olaga. Na faamatalaina e Elder Neal A. Maxwell (1926–2004) o le Korama a Aposetolo e Toasefululua o le fiafia o “se faatuatuaga loloto i faamoemoega o le Atua—e le gata mo tagata uma, ae mo i tatou o tagata taitoatasi.”1 E mautinoa lava e oo mai luitau, aua o se vaega masani o le ola faaletino, ae e le tatau ona mamafatu ia i tatou e ala i le lotovaivai ma le faanoanoa. E mafai ona tatou tuu atu lo tatou faalagolago i le Alii ma ia talitonu.
Na folafola mai e Keriso ia i tatou o le a tatou oo i puapuaga, ae sa Ia uunaia mai foi, “Ia outou loto tetele; ua ou manumalo i le lalolagi” (Ioane 16:33). Na aoao mai Peresitene Ezra Taft Benson (1899–1994), aua ua tatou maua le talalelei, “o i tatou o le Au Paia o Aso e Gata Ai e tatau ona sili ona talitonu ma ia itiiti le leai o se faamoemoe.”2
Tatou te lagona uma le faanoanoa ma le lotovaivai mai lea taimi i lea taimi, ae o le a mafai lava ona tatou loto tetele. Na saunoa mai Elder Richard G. Scott (1928–2015) o le Korama a Aposetolo e Toasefululua, “Ou te molimau atu o le faatuatua i le Faaola ma le usiusitai i Ana aoaoga, e le uma ai lava le fiafia, ae muta le faanoanoa.”3 E mafai ona tatou ola i le olioli ma le iloaina o o tatou “puapuaga e na o sina minute laitiiti” (MF&F 121:7).
A tatou tuu atu lo tatou faalagolago i le fuafuaga a le Atua mo i tatou ma filifili e ola ai ma se uiga faaalia lelei, o le a faamalosia lo tatou gafatia e taulima ai luitau o le olaga. O le a faaitiitia le aafia o i tatou i lo tatou popole ma atugaluga, ma o le a tatou oo i le olioli e finagalo ai o Ia mo i tatou.