Faamanuiaga o le Fetaomi Atu i Luma
O le ola o se tagata faamaoni o le Ekalesia e aumai ai faamanuiaga ofoofogia. Ae e le faapea la o le a le faigata i nisi taimi. O faaosoosoga, o uo e le faamaoni, o luitau faaleaiga, e tele naua. O le a taumafai le mau mea e toso ese mai oe mai le ala o feagaiga.
O le mafuaaga lena o le tausaga lenei o le autu o le Mutuale, o le “fetaomi atu i luma ma le tumau ia Keriso” (2 Nifae 31:20), o loo i ai se savali mamana. Pe a outou fetaomi atu i luma ma le faatuatua mausali ia Keriso, tumau faamaoni i feagaiga, e mafai ona faia e le Atua ni mea matagofie mo oe ma e ala mai ia te oe. Ma e mafai ona Ia fesoasoani ia te oe ia e lagona ai le faamoemoe, faamafanafanaga, ma le filemu i le taimi e tasi.
O se mea na iloa lelei lava e le Perofeta o Iosefa Samita. Sa faatoa 14 ona tausaga ae ia vaai i le Uluai Faaaliga. A o tootuli o ia e tatalo i le Vao Paia, na osofaia o ia e se malosiaga e lei vaaia o se mana ofoofogia faapea sa faamata’uina e faaumatia o ia. E na o le tuuina i ai o lona mana uma e valaau atu i le Atua na laveaiina ai o ia ma maua ai le asiasiga mai le Tama ma le Alo.
Mulimuli ane, ina ua faasoa mai e Iosefa lona aafiaga, sa tauemuina o ia e uo ma taitai i le lotoifale (tagai i le Iosefa Samita—Talafaasolopito 1:15–17, 21–26). E le’i malolo lava na sauaga, ma na iu lava ina faaumatia ai lona soifua i le 24 tausaga mulimuli ane.
Ae sa agai atu pea i luma Iosefa ma le faamoemoe, ma sa fiafia o ia e faia lena mea i le galuega a le Alii. A o tumau ma le mausali ia Keriso ma faaaoga le faatuatua e faia le mea sa’o, sa faamanuiaina o ia e le Atua ma lagolagoina o ia. Ma o le a Ia faia foi le mea lava lena e tasi mo oe.
O le fetaomi atu i luma. Tautino atu e ola i le talalelei. Ia faamausali lau vaai i le Faaola. Ia i ai “se susulu atoatoa o le faamoemoe, ma le alofa o le Atua ma tagata uma.” “[Taumafa] i le Afioga a Keriso” Galue i lalo o le taitaiga a le perisitua. Saili ia avea ma tagata e finagalo le Atua e avea ai oe.
A o outou fetaomi atu i luma, osia ma tausia feagaiga i le ala i le ola e faavavau, matou te molimau atu o le a e maua ai le fiafia.