Lesoni mai vei Nana

Mai Vei Jairo Mazzagardi

Ena Vitusagavulu

Niu tubu cake tiko, ena veigauna kece e dua kina na neitou ilavo, ena taura noqu nana na noti vinaka duadua—o koya e sega ni sasanukinuki se duka—ka solia vua na italatala ni lotu keitou a lewena. E dau vakayacora vakakina ena nona bula taucoko. E dau kaya, “Oqo na nona na Kalou.” Au dau nanuma tu ga na veimalanivosa oqori me tekivu mai na gauna ko ya. Niu papitaiso ki na Lotu i Jisu Karisito ni Yalododonu Edaidai niu sa uabula mai, a sega ni dredre na noqu sauma na ikatini baleta ni a vakavulici au na tinaqu meu talairawarawa ki na lawa oya.

A vakavulici au talega na tinaqu meu dau dina, kevaka sara mada ga e kena ibalebale meu cakava na veika dredre. O iratou na wekai keitou ena vale kadua eratou tea tu na veimataqali vuanikau kei na kakana draudrau. Ena so na gauna e dau ulabaleta mai na bai ki na neitou yasana na nodratou vuanikau. Ena dua na gauna au a betia eso na vuanikau oqo ka kauta vei na. A raici au mai o koya ka kaya, “Oqori e sega ni nodatou.” Au a sega ni vakabauta. Au kaya yani, “Na cava o tukuna tiko? Sa tu ena nodatou yasana!” Baci kaya tale, “E sega ni nodatou qori.” Qai taura na ligaqu, ka keirau gole ki na nodratou vale neitou neiba. Keirau kerea nona veivosoti ni keirau betia na nona vuanikau. E kaya na tinaqu kevaka keitou vinakata e dua na ka, keitou na gadreva me keitou lai kauta mai ena kena ivakarau dodonu.

Erau sega beka ni lewe ni Lotu na nomu itubutubu, se o sega beka ni dau duavata kei na veika erau vinakata. Se rawa tikoga ni o vulica mai vei rau na ivakavuvuli dina, me vaka na dina, itavi, bula rawati koya, kei na cakacaka vagumatua. Era na yaco me veivakalougatataki ki na nomu bula na ivakavuvuli eso oqori.

Taroga e dua na itubutubu!

• Na cava na ka vinaka duadua vei iko ni o itubutubu?

• Na cava na ka dredre duadua?

• Na cava e dau vakamarautaki iko?

• Na cava na ka bibi duadua o dau vakayacora e veisiga?

• Ena vukei iko vakacava na kosipeli mo itubutubu vinaka cake?

• Na cava na iotioti ni ka o dau cakava e veisiga?

• Na taro cava tale e rawa ni o taroga?

Mo dau veivuke vakavinaka vei na se o ta ena dua na siga! Vola se droinitaka ena nomu ivolaniveisiga na ka o sa vulica. Vakavinavinakataki rau na nomu itubutubu ena veika kece erau dau cakava.