Na Cakamana ni Katakata Vakarauta
O sa gadreva sara ga oqo—se o gadreva sara me dodonu?
Raitayalotaka mada ni tiko duadua e vale e dua na cauravou ka sa via kana tiko (e dredre toka, ia tovolea mo raitayalotaka mada) Ia mo raitayalotaka ni sa gadreva o cauravou me tavuna e dua na seniwiji jisi ena imatai ni gauna.1 Raitayalotaka mada ni sega mada ni vakavulici koya o rau na nona itubutubu ena tavu jisi ka sega sara ni bau vulica vakavinaka mai vei rau ni rau dau cakava.
Me da kaya mada, ni sa tu vei cauravou oqo na kena gacagaca kece e dodonu: madrai, jisi, vakalailai na bata ena madrai (ka vakalailai na meanisi e loma baleta ni matai o koya). Tarava, a kauta mai na tavuteke ka taqara ena sitovu. (Eda sa raitayalotaka talega ni sega na nona itavutavu dina se so tale na iyaya me tavuna kina na magiti oqo.)
Ia raitayalotaka mada ni sa mai vakasamataka o koya—e dua na ka e vuqa na tamata era dau sega ni malele kina (se lecaika kina vakalailai) me ra vakasamataka: “Kevaka au na tosoya cake na kena katakata, ena totolo sara na kena caka.”
Raitayalotaka na cava ena yaco. (Se rairai mo kakua ni raitayalotaka.)
Ena cakava rawa o koya e dua na madrai buta damu vinaka se jisi cevata vinaka—sega ni koya ruarua. Ena rairai, cakava na madrai ena rairai ka vakilai (ka vakaikanakana) me vaka na vatu damu katakata kei na jisi cevata vakarauta, sa vaka na talei ni italanoa tukuni vakavo.
Na nona cala, eda raica rawa, na kena coko vata na lecaika (ka rawa ni vosoti) kei na yalototolo (ka sa kilai vinaka tu oqo, ni sega ni vosoti rawa). Kevaka mena tokaruataka tale na cala oqo, ena rawa me sega ni iulubale, ni sega ni rawa me beitaki ena lecaika ia ena yaco kina vakalevu ena vuku ni yalo totolo.
Ni gadrevi me caka vakadodonu, ena vinakati me kila na cakamana ni katakata vakarauta.
Na Vakarauta e Sega ni Ka Malumalumu
Na katakata vakarauta ni sitovu ena tavuni totoka kina na jisi kei na vuqa tale na kakana baleta ni na buta vinaka kina na kakana ka sega ni butadroka kina. Na kena me vosoti o ya ni gadrevi na gauna kei na qaqarauni, ena gadrevi kina na vosota.
A kaya kina na Turaga, “Ia mo dou vosota ka gumatua tikoga me yacova ni dou sa vinaka sara” (V&V 67:13). E tukuna tiko eke na mataqali itovo uasivi cava e uasivia cake na tavu seniwiji jisi; ni gadreva o Koya meda sa vakataki Koya sara. Sa ivakaraitaki uasivi duadua ni vosota o Jisu Karisito. Me tiki ni noda vakamuria na Nona ivakaraitaki o ya me rabailevu na noda rai, raibaleta yani na veika nikua, ka raica na isau cecere e tadu mai na noda bula vakaivakarau, vakabauta, talairawarawa, tudei ka gugumatua, vosota vakabalavu na ka rarawa, kei na loloma—dua tale na kena itukutukuni, meda na vosota.
Sa kena ibalebale, na vosota o ya na wawa, ka rogorogo malai beka, ia me vaka na ka a vakavulica o Peresitedi Dieter F. Uchtdorf, iKarua ni Daunivakasala ena Mataveiliutaki Taumada ni sega walega ni wawa: “Na ibalebale ni vosota o ya na wawa tikoga kei na vosota vagumatua. Sa kena ibalebale me da tudei tikoga ka cakava noda kaukauwa taucoko—cakacaka, nuitaka tiko, ka vakabauta tiko, vosota na dredre ena yaloqaqa, ena gauna mada ga e bera mai na ka eda gadreva. Na vosota e sega walega ni vosota vakadede; ia na vosota vakadede vakavinaka!”2
E sega walega ni tavuni yani na seniwiji jisi ena tavuteke me qai biu tu; ia me wanonovi ka vukici tiko ena kena gauna donu.
E sega walega ni lako yani ki vuli se semineri se lotu; ia na vuli se lotu vagumatua.
E sega walega ni waraki me dua na ivakadinadina baleta na iVola i Momani me vakatikori vei iko baleta ni o sa kerea; ia me wiliki tikoga, vulici, tugani, masu, ka bulataka na ivakavuvuli ni ivola o ya.
E sega walega ni dabe tiko ka ra veiwalitaka mai na itokani na nomu lotu; ia mo masulaki ira ka gadreva dina me veisau na yalodra ka cakacakataka na ka me ra veisau kina.
E sega walega ni wawa sara mo yacova na yabaki 16 nikua; ia mo vulica na talairawarawa ka saga mo kila vinaka na sala ni muri ira na parofita ni na vakalougatataki iko.
Vakalailaitaka na Katakata
Na vosota kei na yalomalua, se lewai iko vinaka, rau sa tiki ni “vua ni Yalo Tabu” (raica na Kalatia 5:22–23). Dina ni tiko na veika me vakatotolotaki me qaravi sara se isau sa tu rawa (me vaka ga na kakana me vakatakatari cake sara), mo na raici iko mada mo vosota vakalevu ka lewai iko vinaka. Ke o vakila ni sa yaco tiko oqo, sa ivakatakilakila ni sa cakacaka tiko ena nomu bula na Yalotabu.
Na cakamana ni katakata vakarauta ena rawa me tavuna vei iko e dua na seniwiji jisi totoka, na bani vakautona e sega ni vaka e dua na disi piqi ni oki, damu vinaka ka sega ni qesa, kei na raisi malumu bota ka sega ni kaukauwa ka dregata. Ia me “tini vinaka na cakacaka” ni vosota (Jemesa 1:4) ena nomu bula, me vukea nomu toso ki liu mo vakataki Jisu Karisito, me yaco na veivakauqeti ni Yalo Tabu, ka yaco me liutaki iko ki na bula tawamudu.
Ni ko sa kila rawa na veika o dau yalototolo kina, mo nanuma sara na seniwiji jisi tavu (se kakana cava ga e dodonu vei iko) kei na veika vinaka o na calata ni ko dauyalototolo. Ke o kila ni ko sa dauyalototolo tu ga, curu ki na ilawalawa. Sa rawa mo veivutuni ka saga tale mo muria na ivakaraitaki i Jisu Karisito kei na nona ivakavuvuli. E levu cake na iwiliwili ni seniwiji jisi me tavuni, ka se vo levu na gauna mo vulica na cakacaka uasivi ena rawa mai na vosota.