Taro kei na iSaunitaro
“E so na tamata era kaya niu na gadreva na itokani ka ra sega ni bula tu ena noqu itagede me rawa niu na vaqaqacotaki kina. E dina beka na ka oqo?
Kena ilutua, na vaqaqacotaki ni nomu ivakatagedegede e yaco mai ena nomu vulica ka bulataka na kosipeli i Jisu Karisito, ka rawa ni ra vukei iko se vakaleqai iko kina na itokani. E dua na veivakayarayarataki levu era na cakava vei iko na itokani—ena ivakarau ni nomu vakasama, nomu ivosavosa, kei na ivalavala me yaco sara ki na tamata o na yaco mo vaka. Na iSakisaki ni iTabagone e vakatura, “Digitaka na itokani e tautauvata na nomu ivakarau ni bula me rawa kina ni o ni veivaqaqacotaki ka veivakayaloqaqataki ena kena bulataki na ivakatagedegede cecere” ([2011], 16). Na mataqali itokani vakaoqori ena vukei iko ena bulataki ni kosipeli i Jisu Karisito, maroroya nomu ivakatagedegede, ka yaco mo tamata vinaka cake.
Ia, e sega ni tamata kece o na veitaratara vata kaya e tautauvata na nomu ivakatagedegede se lewe ni Lotu. Sa bibi kina mo veitokani ki na tamata kecega ka raici ira me vaka na nona raici ira na iVakabula—ena loloma kei na yalovinaka. Ni o tomana na bulataka tiko nomu ivakatagedegede, sa rawa mo “yaco mo nodra ivakarau era sa vakabauta, ena vosa ena ivalavala, ena loloma, ena lomadina, ena yalosavasava” (1 Timoci 4:12). Ena nomu ivakaraitaki, era na raica na nomu vakalougatataki ni o bulataka na ivakatagedegede cecere, ka rawa ni o vakayaloqaqataki ira me ra vakakina.
Vaqara na veituberi ni Yalo Tabu—ka rawata na yaloqaqa mo cakava na Nona veivakauqeti—ena nomu digitaka na nomu itokani ka segata mo vaqaqacotaka na nomu ivakatagedegede.
iTokani Dina
Na imatai ni noqu yabaki ena itabavuli e loma au lomaleqa deu na sega ni kunea e dua na itokani ka na rokova na noqu ivakatagedegede. Sega ni dede keirau sa veitokani vinaka sara kei na dua noqu lewe ni kalasi, kau tukuna vua ni o au na Momani. A tarogi au kina, kau solia vua e dua na ivolalailai Me iSakisaki ni iTabagone. Me tekivu mai na siga oya, sa sega tale ni qai vosaca e mataqu. Kevaka era itokani dina na nomu itokani, era na rokova na nomu vakatulewa ka vukei iko mo rokova na nomu ivakatagedegede.
Candela M., yabaki 13, Buenos Aires, Argentina
Muria Nodra iVakasala na Parofita
Ena so na gauna e dau dredre me da vorata na veitemaki kevaka eda dau tiko vata kei ira na itokani era dau digitaka na ca se ra dau tovolea me da digitaka na ca. Era sa tukuna vei keda na parofita ena ivolalailai Me iSakisaki ni iTabagone ni ra na “vakayarayarataka na itokani na ivakarau ni nomu vakasama kei na itovo, ka ra na veivuke sara mada ga ena vakatulewataki ni tamata mo na yaco mo vaka” ([2011], 16). Au nanuma ni dodonu me ra noda itokani o ira era sa tuvakarau me ra rokova na noda ivakatagedegede ka vinakata me ra raica ni da rokova tiko na noda ivakatagedegede.
Calvin W., yabaki 16, Arizona, Amerika
Nanuma na Nomu iVakatagedegede
Na itokani e sega ni duavata kei na nomu ivakategedegede ena vakamalumalumutaka ka vorolaka na nomu ivakatagedegede. Niu se qai toki vou ki na noqu koronivuli, au tovolea meu okati kina ena noqu cavuta eso na ka era na tukuna na tamata era tu vata kei au. E voleka sara niu guilecava na noqu ivakatagedegede ena noqu vinakata meu vakataki ira na tamata kecega. Au sa qai kila oqo, mo tara cake na nomu ivakatagedegede, o na gadreva na itokani ena tokona ka vakabauta na nomu ivakatagedegede. Au vakavinavinaka ni a rawa meu kunea na mataqali itokani vakaoya baleta ni ra vakananuma vei au na noqu ivakatagedegede.
Logan J., yabaki 15, Utah, Amerika
Vakacerecerea Tikoga na Nomu iVakatagedegede
Na itokani e duidui nona ivakatagedegede ena sega ni vaqaqacotaka na nomu, ia ni o nodra itokani, e rawa ni o solia vei ira e dua na ivakaraitaki vinaka me ra muria. Ni ra nomu itokani o ira era duavata kei na nomu vakabauta, e rawa ni vakayaloqaqataki iko mo rokova tiko na nomu ivakatagedegede ka vukei iko mo tutaka na dina.
Warren S., yabaki 14, Oregon, Amerika
Sa Veivakalougatataki na iTokani Vinaka
Kevaka era sega ni duavata kei na nomu ivakatagedegede na nomu itokani, e rawa ni dredre na nomu vaqaqacotaka na nomu. Niu wilika na Me iSakisaki ni iTabagone sa dau vukei au ena noqu digia na itokani vinaka era dau rokovi au. Au sa vakarau tiko qo meu laki kaulotu, kau kila niu tiko vata kei ira e tauvata na noqu ivakatagedegede e vukei au meu yalodina tikoga ki na kosipeli.
Nair M., yabaki 19, Buenos Aires, Argentina
Taura na iTitoko Kaukamea
Na ka saraga o vinakata me nomu itokani e dua e vinaka na nona ivakatagedegede. O na vinakata me ra vakavolivoliti iko na itokani era na vukei iko mo muria na ivunau ka vakauqeti iko mo bula dodonu. Taura dei toka na ititoko kaukamea, ka na mua tiko ki na vunikau ni bula, ka sega ki na vale vakaitamera. Ni o vakavolivoliti iko ena bula sega ni dodonu ena kauti iko ki na veitemaki. Mo vakaitokani vinaka ka ra na vukei iko mo bulataka na kosipeli.
Annie P., yabaki 13, Utah, Amerika
Masu mo Kunea na iTokani
Niu toki kei na noqu matavuvale ki na dua na yasana vou, au dau masu e veigauna meu kunea na itokani e rawa niu veitalanoataka vata kei ira na kosipeli. Niu masu tiko au kunea na vakacegu, ni oti e vica na vula sa so na noqu itokani uasivi sara. Au rawa ni nuitaka na nodra veitokoni, ka ra sa vukei au meu tara na loloma levu cake ena vuku ni kosipeli. Au kila ni sa rui bibi na itokani ka rawa ni ra vakarawarawataka vei keda na bulataki ni kosipeli.
Sarah P., yabaki 16, Rio de Janeiro, Brazil