Veiqaravi ena Lotu
Noqu Sigatabu Vakatawani ena Veiqaravi
Na dauvolaivola e vakaitikotiko e Kalifonia, Amerika
Sa sinai tu na noqu vei-Sigatabu, ia au vakavinavinaka ni rawa niu veiqaravi tawadonuya na dredre e so era a lako curuma na iliuliu ni Lotu eliu me vakataki Elder Parley P. Pratt.
Droini mai vei Chidy Wayne
E sa mataka ni Sigatabu. Sa tu oqo e mataqu e 12 na aua vakarautaki ni soqoni, veivakatarogi, veivakadeitaki, kei na veivakatikori. Au na tekivu ena dua na vale ni iteki ka cava ena dua tale na vale ni soqoni ena yasana kadua ni tauni—taucoko ena dua na siga katakata sara.
Au sa nanamaki tu ki na soqoni, veivakatarogi, veivakadeitaki, kei na veivakatikori yadua. Ia e nanoa, niu vakasamataka toka na noqu na oga voli, au a luvuci ena rarawa—me yacova niu dolava na Autobiography of Parley P. Pratt ka tekivu wiliwili mai na vanua au a cegu tu kina. E a tauri vakavesu o Elder Pratt, vata kei Josefa kei Hyrum Simici kei na so tale, donuya na veisiga dredre e Missouri. Ni oti na nodra vakau ki Independence, era a vesu tu na Veitacini ena dua na otela ka moce ena fuloa kei na dua na tiki ni kauvaro me ilokoloko.
Ena dua na mataka cevata batabata, a duri o Elder Pratt ka, tawasiqemi, vakalutu tani mai na otela. A gole vaka ki na tokalau o koya curuma na tauni ka lako ki na veiwere ka tikiva. Ni oti na nona lakova voli e dua na maile (1.6 km), a curuma e dua na veikau o Elder Pratt, ka ra bonata na mawena na waicevata qeqera ka ra vunitaki koya voli na veivunikau.
A railesuva o koya na nona ituvaki drakidrakita. Me tomana voli na ilakolako ena tokalau sa na vakavuna na drotaki bula ki na dua tale na matanitu, ka na rawa ni lako mai kina na nona matavuvale. Me lesu tale ki na otela sa na vakavuna me tiko vakavesu ka beitaki ena veicala bibi. Ni temaki tu me dro, a vakasamataka o Elder Pratt na “cava ni leqa, se na mate saraga” ena vakavuna o koya ki na vo ni kaivesu kevaka a biubiu.
Ena nona veilecayaki voli, a tarai koya e dua na vakasama vakaivolanikalou: “Ia ko koya yadua sa via maroroya na nona bula ena vakayalia; ia ko koya yadua ena vakayalia na nona bula ena vukuqu kei nai tukutuku vinaka, ena maroroya” (raica na Marika 8:35; V&V 98:13).
Sa lesu tale o Elder Pratt ki na otela. Sa na tarava mai na vula ni tiko vakavesu drakidrakita e so—ka sega kina na matavuvale, veimaliwai kei ira na Yalododonu, se na sasaga me veiqaravi ena nona veikacivi vakaiapositolo.1
Ni sogoti na ivola, au vakasamataka vagumatua na nodra vakasewasewani na Yalododonu eliu—e so vei ira na tubuqu vakavica. Me baleta na nodra ivakadinadina ni kosipeli kei na nodra vakabauti Jisu Karisito, era a vosota na veivakararawataki kei na veivakacacani. Me baleta na nodra yalovosota, au sa rawa ni veiqaravi ka sokalou vagalala edaidai, ka sema kivei ira ena vakabauta kei na ivakadinadina.
Niu vakavakarau voli ki na Siga ni Vakacecegu oqo, sa taqomaki tu na noqu matavuvale, ni keitou vakanamata ki na dua na siga ni sokalou ena dua na vale ni soqoni maucokona. Na veitokani ni Yalododonu ena vakamarautaki keitou. Keitou na reki vata kei ira ena veivakadeitaki kei na veivakatikori e vakayacori, na itavi vakataucokotaki e so, kei na vakabauta e vaqaqacotaki. Keitou na vakayagataka na sakaramede, me nanumi na noda iVakabula kei na Nona solibula veisorovaki. Ena bogi nikua keitou na sokomuni vata ena neitou itikotiko me wiliki na iVola i Momani ka masumasu vata ni bera ni keitou davo sobu ena neitou imocemoce dakoba ka vatikora na ului keitou ena ilokoloko malumu.
Sa sinai tu na noqu Sigatabu. Au sa vakavinavinaka kina ka vakalougatataki.