Domodra na Yalododonu Edaidai
Dua na Draki ni Tuva Kawa
Droini mai vei Wilson Ong
Me vaka niu tina ni rua na goneyalewa lalai, au ulubaletaka niu na sega ni rawa ni vakaitavi ena so na ka au vinakata meu cakava baleta ga ni sega ni kena “draki” meu cakava. Dua vei ira na cakacaka oqori o ya na tuva kawa.
Dina ga niu a vakaitavi tu e liu ena tuva matanivola me dua na itaviqaravi marautaki ena Siga ni Vakacecegu, au sa dau vakaulubale ni sega na noqu gauna se kila meu marautaka noqu cakacaka ni tuva kawa ena gauna o ya.
Ena dua na mataka lailai ena vica na vula sa oti a veisau na yaloqu niu dabe toka e valetabu. Niu raica na yacadra era sa mate ena kadi ni valetabu, kau masulaka me ra na ciqoma na cakacaka vakalotu ni valetabu e vakayacori ena vukudra, au a vakasamataka,“Ena ka marautaki beka oqo ke ra lewe ni noqu matavuvale? Au vinakata meu na cakava na cakacaka baleti ira.” A vakadeitaka mai na Yalotabu ke sa noqu gagadre dina oqo, sa na vukei au na Turaga meu cakava na noqu tuva kawa, vakabibi ena Siga ni Vakacecegu. Ena rawa ni vukei au meu kunea na gauna kei na kila meu cakava rawa na Nona inaki oqo.
Ena Sigatabu o ya, au a gole i vale ka laki curu ki na FamilySearch.org. A tuturu na wai ni mataqu niu raica na yacai ira noqu qase e liu. Sa kaukauwa cake na noqu sema yani vei ira. A qai vakalevutaki ga na noqu lomani ira o ya na itaba kei na ivolatukutuku, a se qai vakuria oti ga o buqu, ka yaco me ra sa bula tale mai vakalevucake na noqu lewe ni matavuvale vei au. Au vakila na marau niu vakaitavitaki luvequ yabaki rua, sa kila toka na itaba kei tubuna vakarua kei na buna vaka-va, ka cavuta na yacadrau. Au vakila ki na ka e vakamacalataka o Peresitedi Russell M. Nelson, Peresitedi ni Kuoramu ni iApositolo Le Tinikarua: “E vakarautaka na Siga ni Vakacecegu e dua na madigi vinaka ni vaqaqacotaki na matavuvale. Ni sa vinakata tiko mada ga na Kalou, vei keda yadua, na Luvena, me da lesu Vua ni da sa Yalododonu vakaedaumenitaki, vauci vakamatavuvale e valetabu, kivei ira na noda qase e liu, vakakina vei ira na noda kawa” (“Me Ka Rekitaki na Siga ni Vakacecegu,” Liaona, Me 2015, 130).
Vakatekivu mai na kena yaco o ya, au sa tomana tikoga na cakacaka ni tuva kawa ena Siga ni Vakacecegu. Au sa vakalougatataki niu cakava na cakacaka ni valetabu baleti ira na noqu qase eliu era sa mate. E dua na kalougata digitaki o ya na noqu kilai ira na wekaqu ka veivolekati sara kei rau na tubuqu e rau sega ni lewe ni neitou lotu. Sa mai vakaqaqacotaka noqu vakadeitaka meu maroroya na noqu veiyalayalati ka vosota ki na ivakataotioti meu rawa ni isema kaukauwa ki na noqu matavuvale tawamudu.
Dina ga ni se levu tu na cakacaka me caka, au vakavinavinaka vei Tamaqu Vakalomalagi ni vakalevutaka na noqu rawa ni vakaitavi ena Nona cakacaka, vakabibi ena Nona siga. Vei au, na Siga ni Vakacecegu sa ka rekitaki dina.