Me Yacova ni da Qai Sota Tale
Na iWalewale Vakalou ena Lotu ni Turaga
Mai na “Sa Sega ni Dau Sosovu, se Moce ko Koya,” Ensign, Me 1983, 5–8. Sa vakarautaki ena kena pagitueti kei na matanivolalelevu.
Sa talia tiko na Kalou na nona lacadrau me vaka na Nona ituvatuva cecere.
iTaba mai vei Mary Ouzounian, iloloma ni Church History Museum
Sa kena ivakadinadina na iwalewale vakalou ni kena tuvalaki na Nona cakacaka kei na ilesilesi vakaveiliutaki. O ira na Vakaitutu Raraba era tamata vakataki ira, ka dui tu na nodra ivakarau ni bula yadua. Era dui kauta mai ki na nodra itavi na kila duidui ka rabailevu. Ni yaco mai na veika eso me veivosakitaki ena matabose liu ni Lotu, era galala me ra vakaraitaka na nodra nanuma. Ni dua e dikeva toka na cakacaka ni iwalewale oqo, e talei ni da raica na veivakauqeti kei na mana ni Yalo Tabu vei ira na turaga oqo. E dau duidui nodra nanuma ia e sega ni dau usumaki vakaukauwa, ka yaco me dau malumu mai ka basika na duavata. “Raica sa virikotori tu na ivakarau kece ni noqu matanitu,” sa kaya na Turaga (raica V&V 132:8). Niu vakadinadinataka na cakacakataki ni iwalewale oqo, au vakila ni vakavoui na noqu vakabauta. …
Eso era vakaraitaka na nodra kauwai ni dau Peresitedi tu ga ni Lotu e dua na kena turaga, kau kaya kina, “sa dua na veivakalougatataki levu!” Na cakacaka ena itabagauna oqo a tauyavutaki taumada mai na ligana na Parofita o Josefa Simici. Ena gauna oya e se tamata gone ka waribariba, ka sega ni dau vagolei na yalona ki na ivakaraunibula ni nona gauna. Na nona vakasama gone a rawarawa ni moica na Turaga me vaka na tete vou ka suasua vinaka ena Nona tekivuna na Nona cakacaka.
Se gone sara na isosomi kei Josefa ena nona colata na itavi vakarerevaki ni nodra liutaki e dua na matatamata me ra kosova na veikauloa ki na dua na vanua vou.
Ia sa cokonaki tu vakavinaka ena gauna oqo na yavutu ni noda ivunau, ka dei vinaka na noda yavu vakatamata, ke yacova mada ga na gauna ena vakarota tale kina na Turaga e dua na veisau. Eda sega ni gadreva e dua tale na kena ivakarau vou. Eda gadreva na yalodina ena kena rogoci ka muri na ivakavuvuli vunautaki vakalou. Eda gadreva na yalodina vei ira na noda iliuliu, sa lesi ira na Kalou. Sai koya na noda parofita, noda daurairai ka dauvakatakila. Ena sega vakadua ni sega na noda parofita kevaka eda bula kilikili kaya tiko e dua. E sega ni gadrevi me tamata gone. Sa dau kitaka ka na tomana tikoga me ra lako e veiyasai vuravura na tamata gone ena cakacaka ni veiqaravi. Sai koya na bete levu vakatulewa, ka taura tu na idola kece sara ni matabete tabu ka domo ni ivakatakila mai vua na Kalou vei ira na nona tamata.
E dua na vosa vakaibalebale makawa e kaya vaqo, “iTabagone ni cakacaka. iTabaqase ni yalomatua.”
Ena noqu vakasama e koto kina e dua na ka veivakadeitaki ena noda kila ni na noda Peresitedi e dua sa vakaivakarautaki ka vakavulici, vakatovolei ka temaki, na nona yalodina ki na cakacaka kei na nona doka na inaki sa vaqaqacotaki mai na veiqaravi, sa matua na nona vakabauta, kei na nona voleka vua na Kalou sa vakabulabulataki tiko mai ena loma ni vica vata na yabaki. …
Eda na sega ni rerevaka na veisiga ni mataka kevaka eda kukuva matua na ivakavuvuli sa vakatakilai mai.